भांगरभूंय | प्रतिनिधी
भांगरभूंय । प्रतिनिधी
म्हापशेंः अडवलपाल- दिवचले हांगा धनगरवाड्या लागीं तिळारीच्या खारजांत काँक्रिट मिक्सर पडलो. हो खारीज अस्नोडें उदका शुद्धिकरण प्रकल्पाक जोडला. खारजाचें उदक घेवपाचें बंद केले, प्रकल्पाक आमठाणे धरणाच्या उदकाची पुरवण सुरू केल्या. बिरेस्तारा सकाळी 10च्या सुमाराक ही घडणूक जाली.
अडवलपाल हांगा शिमीट काँक्रिटाचो प्रकल्प आसा. थंयच्यान काँक्रिट भरिल्लो हो मिक्सर टॅक तिळारीच्या सर्व्हिस रस्त्या वयल्यान वतात आनी करकाण हांगा मुखेल रस्त्यार येतात. ड्रायव्हराचें नियंत्रण गेल्ल्यान तो खारजांत पडलो. ह्या अपघाताक लागून खारजाची मोडतोड जाली.
उदकास्रोत खात्याच्या अधिकाऱ्यांनी बेगोबेग पावलां घालून आमठाणे धरणांतल्या उदकाची अस्नोडें शुद्धिकरण प्रकल्पाक पुरवण केली. मजगतीं, खारजाचो सर्व्हिस रस्तो खारजाची दुरुस्ती करतात तेन्नाच वापरतात. उदकास्रोत खात्याच्या आशिर्वादान काँक्रिट प्रकल्प धनी आपल्या मालाची येरादारी करपा खातीत हो रस्तो वापरता. दिसपट्टे काँक्रिटाचे सुमार 50 ट्रक ताचे वयल्यान वतात देखून तो खचिल्लो आनी ताका लागून व्हो अपघात जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
