भांगरभूंय | प्रतिनिधी
म्हापशें: अंदूं आतां मेरेन बार्देस म्हालांत 9 भिरांकूळ रस्तो अपघात जाले आनी तातूंत 14 जाणांक मरण आयलें. तशेंच खूबशे जाण जखमी जाले.
अंदूंचो पयलो अपघात 22 जानेवारीक जालो. पर्वरेच्या ओ कोकेरो जंक्शना लागसार कंटनेर ट्रका पोंदां चिड्डिल्ल्यान मोहमेमद अली (32) आनी शाहिद चांदवाले (16) हांकां दुचाकी वयल्यान वचप्यांक मरण आयलें.
7 मार्चाक मोंतेगिरी उड्डाण पुला कडेन जाल्ल्या अपघातांत प्रमेश प्रताप मडगांवकार (21, पालयें उसकय) हाका मरण आयलें जाल्यार सिद्धेश कळंगूटकार (कळंगूट) हो जखमी जाल्लो.
पर्वरेच्या नियो मॅजेस्टीक हॉटेला लागसार चलत वचपी ताप्ता बहादूर रावल (31, कालापूर सांताक्रूज, मूळ नेपाळ) हाका एका अज्ञात वाहनान धपको दिल्ल्यान मरण आयलें. हो अपघात 21 मार्चाक जालो.
बस्तोडें मयड्यां रस्त्या वयल्यान चलत वचपी समीर पांडुरंग खोर्जुवेंकार (35, पोडवाळ खोर्जुवें) हाका दुचाकीचो नेटाचो धपको बसलो. हो अपघात 23 मार्चाक रातच्या 10 वरांच्या सुमाराक घडिल्लो. जाल्यार 29 मार्चाक ताचेर उपचार चालू आसतना ताका मरण आयलें. दुचाकी बंद पडिल्ल्यान पांडुरंग आपल्या मेवण्यां वांगडा घरा चलत येतालो.
13 एप्रीलाक म्हापशेंच्या नव्या बसस्टॅण्डा मुखार दुभाजकाक मोटरसायकलीन धपको दिलो. ह्या अपघातांत दुचाकी चलोवपी धर्मेंद्र राठोड (गंगानगर, म्हापशें) हाका मरण आयलें.
22 मे ह्या दिसा फांतोडेर 3 वरांचेर कुचेली मार्ना रस्त्याचेर स्विफ्ट मोटारीन नेटाचो झाडाक धपको मारलो. ह्या भिरांकूळ अपघातांत नायर हसनसाब अनगोळकर (28, रा. टिळकवाडी, बेळगांव), रोहन महादेव गडद (26, रा. रामदेव गल्ली बेळगांव) आनी सनी उर्फ धिरज पोसाप्पा अणवेकर (32, रा. गणेशपूर बेळगांव) ह्या तिगांक सुवातेचेरूच मरण आयलें. जाल्यार विशाल विलास कारेकर (27, रा. दत्तात्रय गल्ली, वडगांव, बेळगांव) हो अपघातांत जखमी जाल्लो.
26 जूनाक कळंगूटे दुचाकीन सिव्हरेज टँकराक फाटले वटेंतल्यान नेटाचो धपको मारलो. ह्या अपघातांत मयूर महादेव डेगवेकर (17, मुड्डीवाडो साळगांव) हाका मरण आयलें. जाल्यार अमन शिरोडकार (21, साळगांव) हो गंभीर जखमी जाल्लो.
23 जुलयाक सांगोल्ड्यां चोघम रस्त्याचेर कर्नाटकांतल्या पर्यटकांचे गतीन आशिल्ले इनोव्हा मोटारीन दुचाकीक धपको दिल्लो. ह्या अपघातांत कपील लमाणी (25, रा. बागा, मूळ कर्नाटक) हाका मरण आयलें. जाल्यार दुचाकीचेर फाटल्यान बशिल्लो व्यंकटेश लमाणी (23, गदग कर्नाटक) हो गंभीर जखमी जालो.
28 जुलयाक पर्वरे अटल सेतूचेर स्विफ्ट मोटारीचो अपघात जावन तातूंत पुलीस कर्मचारी संदीप नायक उर्फ केयश मडकयकार (32, बामणभाटी मेरशी) हाका मरण आयलें. जाल्यार मालवाहू ट्रक चालक जखमी जाल्लो.
14 सप्टेंबराक म्हापशेंच्या टॅक्सी स्टॅणअडा लागसार महाराष्ट्रांतले एसटी बशीन धपको दिल्ल्यान एका अज्ञात मनशाक मरण आयिल्लें. म्हापशेंच्या भोबे जंक्शनाचेर 13 सप्टेंबराक एके खाजगी बशीन धपको दिल्ल्यान महेंद्र रेडकार (33, रा. कुंकळ्ळी, मूळ मळेवाड सावंतवाडी) गंभीर जखमी जालो. ताचेर उपचार चालू आसतना 17 सप्टेंबराक मरण आयलें.
मजगतीं, 14 जूनाक पर्वरे राष्ट्रीय म्हामार्गाचेर कदंब बशीन झाडाक नेटाचो धपको दिल्लो. ह्या अपघातांत बसचालक मुकेश शेटगांवकार, कंडक्टर सुनील कोरखणकार आनी प्रज्योत बर्वे हे कदंब म्हामंडळाचे कर्मचारी जखमी जाल्ले.
30 एप्रीलाक सिरसय रेल्वे पुला लागसार पणजी ते वाळपय रस्त्या वयले खाजगी बशीन लायटीच्या खांब्याक धपको मारलो. ह्या अपघातांत बसचालक राजेश गोडकार (पीर्ण), कंडक्टर इम्रान शेख (नेरूल), दत्ताराम शिरोडकर, रतिकेश ताळगांवकर (कुडाळ), राजेश बोर्डेंकार (सांखळी), सारा आंद्रेद (अस्नोडें), अश्मिता गांवकार, सुवर्णा नायक, सुरेखा नायक, फातिमा सय्यद, प्रवीणबानू सय्यद (दिवचल), प्रणाली देविदास (शिरगांव), संजना वरक, कल्पना वरक, अंजली प्रभू आनी रिमा शिंगणेकार हे 16 प्रवाशी जखमी जाल्ले. कोलवाळे बंदखणी लागसारच्या राष्ट्रीय म्हामार्गाचेर खडयेचेर मोटार निसरली आनी ताका लागून चालकाचो गाडये वयलो ताबो गेलो. उपरांत ती उरफाटे दिशेन येवपी स्विफ्ट मोटारीक आदळ्ळी. ह्या अपघातांत शेळपे धुळेरांतले अमन नरसिंह देसाय (38), नरसिंह अच्युतराव देसाय (60), निलप्रभा देसाय (55), अनन्या अमन देसाय (52) आनी अमन देसाय (5) जखमी जाल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
