भांगरभूंय | प्रतिनिधी
पुराय गोंय तशेंच गोंया भायर जांकां ‘भाई अग्नी’ ह्या नांवान वळखतात, जे फाटलीं कितलीशींच वर्सां शिक्षणाच्या मळार वावुरतात आनी फकत एक फामाद स्तंभलेखक, सुत्रसंचालक, तरणाट्यांचे मार्गदर्शक अशीं साबार तासां आशिल्ले व्यक्तिमत्व अनंत अग्नी हांचो लेखसंग्रह ‘आत्मसोद’ हें पुस्तक संजना पब्लिकेशन्स हांणी उजवाडाक हाडलें.
पयलीं सुवात मेळपाकच जाय अशें ना पूण तें काम बरे तरेन करून आनंद मेळप म्हत्वाचो ही देख आमकां सरान सदांच दिल्या. भुरग्यांचो आत्मविश्वास वाडोवपी तशेंच भुरग्यांतले कलागूण वळखून ताका प्रोत्साहन दिवपी अग्नी सर हांचो दर एक दीस वेगळो आनी ह्याच आगळ्या वेगळ्या दिसाचे अणभवाची पोटली म्हळ्यारच ‘आत्मसोद’. एकूण 23 लेख ह्या पुस्तकांत आसात आनी तेविसूय लेख पालक, शिक्षक, तरणाटे हांकां दिका दाखोवपी आसात. हे वाचून काळजाक हात घालपाची कळाशी खऱ्यांनीच तोखणायेक पात्र थारता.
पालक आनी शिक्षकांच्या कर्तव्यांचेर खूबशा लेखांनी भाश्य केलां. कृष्ण आनी सुदाम्याची इश्टागत, आपली सर्त आपलेच कडेन, भुरग्यांचे करियरः जापसालदारकी कोणाची?, कोण पास? कोण नापास?, कोंकणी माध्यम- भुरग्यांचो अधिकार, ‘गांधी’ जितो उरपाक जाय आनी अशा कितल्याशाच लेखांतल्यान हें स्पश्ट जाता. सगळेच लेख जरी देख दिवपी आनी वाचनीय आसले तरीय कांय लेखांचो उल्लेख करीन दिसता. यश जाय जाल्यार अपेसाक लेगीत आमकां सामकार वच्चें पडटलें हें आमकां पावला पावलाक हें पुस्तक वाचतना दिसून येता.
‘तुमीच जायात उजवाडाचो दिवो’ आयचे तरणे पिळगेक आनी पालकाक हो लेख मार्गदर्शनाचो आदार अशें म्हणूं येता. भुरग्यांचो सगळ्यांत मोटो आदार आपले पालक आसतात त्या खातीर पालकांनी भुरग्यां कडेन वेळोवेळ संवाद सादून तांच्या मनांत कितें चल्ला, तांची आवडी-निवडी समजुवप खूब म्हत्वाचें आसता. इतलेंच न्हय तर भुरग्यांचेर विश्वास दवरून तांकां फाटबळ दिवपाची गरज आसा. अशें केल्ल्यान भुरगो आपल्या जिविताचो दिवो आपुणूच पेटोवपाक सक्षम जातलो आनी ताका पालकाचें मार्गदर्शन लाभतलें हीच देख ह्या लेखांतल्यान आमकां जाणवता.
‘मोबायलाचें वेसन- एक गंभीर समस्या’ ह्या लेखांत आपले दिसपट्टे जिणेंत आयिल्ले अणभव, तरणाट्या भुरग्यांक लागिल्लें मोबायलाचें वेसन आनी तांचेर उपाय हे बेस बरे तरेन पालकां मेरेन पावोवपाचो यत्न लेखकान केला. लेखक म्हणटा, ‘मोबायलाचो चड आनी चुकीचो वापर जाल्ल्यार भुरगीं फकत संवेदनशुन्यच न्हय तर तांचे शारिरीक आनी मानसीक भलायकेचेर परिणाम जाता’. हाची पालकांक जाणीव आसपाक जाय. तशेंच ह्या वेसनांतल्यान सुटका कशी मेळोवची हेंय सादें आनी सरळपणान सांगलां. आनी अशेंय सांगला की मोबायलांतल्या वेसनांतल्यान भुरग्याक भायर काडपाचो होच वेळ आसा. त्या खातीर आयच्या काळांत हो लेख खूब उपेगी थारता अशें म्हाका दिसता.
‘गांधी’ जितो उरपाक जाय हो लेख आमकां खूब बरी शिकवण दिता. आमचें घर म्हणल्यारच एक शाळा, ही गांधीजीचीं उतरां घेवन तांणी आत्मनिर्भरता, स्वाभिमान, निर्भयता, स्वच्छता, सत्य, अहिंसा, शांतिकाय, मानवता, देशप्रेम अशीं खूबशीं तत्वां भुरग्यां मदीं रुजोवपाचो ह्या लेखाचो यत्न आसा. आयज काल मनशा मदलो दुस्वास वाडत चल्ला. ताकाच लागून देश संघटीत जावपाक पावना. आनी अशा वेळार फक्त गांधीजीचेच विचार आमकां फुडें सरपाक शक्त दितले, आमकां एकचारान बांदून दवरतले. हो विचार आयज भुरग्यां मदीं रुजोवपाची खूब गरज आसा असो सुंदर विचार तांणी ह्या लेखांतल्यान आमच्या मुखार दवरला.
हे सगळे लेख पालक-शिक्षक तरणाटे हांणी वाच्चे. जे प्रस्न पालकांक आपल्या भुरग्यांचे बाबतींत पडटात वा शिक्षकांक आपल्या विद्यार्थ्यांचे बाबतींत पडटात तांच्यो जापो ह्या पुस्तकांत मेळटल्योच हातूंत दुबाव ना.
खुशी प्रभुदेसाय
8788951529
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
