कावळो आफुडिल्ली अस्तुरी व्हडा प्रमाणांत बाजार, शॉपिंग करतनाच शाळा, कार्यालय आनी हेर सगल्या मळांचेर वचून दादल्यां बराबरीन काम करता. उत्सवांनी तिणें वांटो घेतल्यार कोणाक कळचें पसून ना. सॅनिटरी नॅपकिन्सांच्या उद्येगान केल्ली क्रांती पळयल्यार ती ब्रह्माडांत कावळो आफुडिल्ले स्थितींतय वचूंक शकता. कावळो आफुडप हो तर अस्तुरेचो निसर्गधर्म, कावळो आफुडचे आदीं, उपरांत त्रास जातात हें खरें, तेंच बाळंटेराचेंय. बाळंटेर, कावळो आफुडपाचे सुटयेची नवी अस्तुरीनीत केंद्र सरकाराच्या अस्तुरी आयोगान भासाभास करून थारावची पडटली.एल अँड टी कंपनीचे अध्यक्ष एस एन सुब्रमण्यम हांणी आपल्या कंपनींतले अस्तुरेक पगारा सयत कावळो आफुडटकीच एका दिसाची सुटी दिवपाची आंतरराष्ट्रीय अस्तुरी दिसा निमतान खबर दिली. उद्येगसमुहाचे इंजिनियरिंग, कन्स्ट्रक्शन कंपनींतल्या अस्तुरे खातीर हो निर्णय घेतला. अभ्यास केलो, भासाभास केली तेन्ना आनीकय कांय कंपनींनी, राज्यांनी तशेच तरेची सुटी दिवप सुरू केलां अशी म्हायती मेळ्ळ्या. कावळो आफुडपाचे सुटयेची नीत संवसारांत कशी आसा? देशांतले अस्तुरेचेर कावळो आफुडटकीच वावरांत राविल्ले वेळार कितें परिणाम जातात ताचो अभ्यास राष्ट्रीय अस्तुरी आयोगान करचो पडटलो, एक सारकी नवी नीत करपाची गरज आसा.उद्येगीक कंपनींनी देशांत अस्तुरेचें बळगें कशें खंय वाडटा? तिका बराबरीन व्हरतात? तिचे पासत मेकळें वातावरण आसा? तिका सुटी घेवपा पासत फ्लेक्सीबिलीटी आसा? हे विशीं अभ्यास करून, भासाभाशेंतल्यान नीत जावची. अस्तुरीनिती, धोरण थारावप आनी ती चालीक लावपच ना अशेंय कंपनीं, उद्योगांनी घडटा आसूंये. अस्तुरीनीत कामगार कायद्यांनी मुखेलपणान हाडची पडटली. अस्तुरी कितल्याशाच उद्येगांनी रातपाळयेचेर वावुरता तेन्ना तिका राखण मेळटा? रातपाळयेंत वावुरपाक तिका आवडटा? दीसभर, रातपाळयेंत वावुरपी अस्तुरे पासत कावळो आफुडपाची सुटी म्हयन्याक दोन दीस तरी मेळपाक जाय.एल अँड टी कंपनीच्या अध्यक्षांनी घेतिल्लो निर्णय बरो. फाटल्या दिसांनी सप्तकाक णव्वद वरां कामकाजाचो विशय तांणी मांडलो, घरकान्नीच्या तोंडा कडेन आयतारा दीसभर पळयत रावतले? अशें उलोवन वाद केलो, तांचेर टिकाय जाली. मागीर कळ्ळें उद्येगाच्या शेअर बाजाराचें गणीत कंट्रोवर्सींत लिपिल्लें. व्हड उद्येगांतले कर्मचारी कंपनींनी शेअरहोल्डर्स आसतात. उंचेलें शिक्षण घेतिल्ल्या उत्कृश्ठतायेक उद्येग सोदून, आपोवन व्हरतात, अस्तुरेक उद्येगांनी मल्टीटास्कर जावचें पडटा, अणभवापरस नोकरेंत तिगून रावपाक आयज म्हत्व आयलां. साबार कंपनींतल्या अस्तुरेक बराबर घेवन एल अँड टीच्या अयोध्येचें राम मंदीर बांदपा पासत केल्ल्या वावराची केंद्र सरकार आयज ना फाल्यां तोखणाय करतलें हातूंत दुबाव ना. उत्तर प्रदेशाक पर्यटन उद्येग वाडोवपाक, नामना जोडपाक राम मंदिराचो वांटो आसा. अजून प्रकल्पाचो वावर पुराय जावपाचो आसा. राम मंदिराची भोंवतण पांचवीताल्ल करपाची मोख उत्तर प्रदेश सरकाराची. तातूंत कितल्याशाच उद्येगपतींचो आसपाव आसतलो मालकी सरकाराची, ट्रस्टाची.अस्तुरे विशींच्या नवे बाळंटेराचे सुटयेचें, चायल्ड केअर सुटयेच्या नितीचें गणीत व्हड आसा. धा वर्सांपयलीं केंद्र सरकारान नवीं पावलां मारलीं, नवें धोरण जालें. जैत कितलें मेळ्ळां? 75 वर्सांचें कामगार कायदे बदलून तातूंत विंगड विंगड रुपांतली अस्तुरी दिसतली हे पासत यत्न अस्तुरी आयोगाक करचे पडटले. बाळंटेराची सुटी तीन वर्सां मेरेन वाडोवपाची गरज आसा ? अस्तुरेचे विचार कितें आसात तें समजून घेवन नवी नीत जावची. भुरगेपणांत आवय घरा जाय तितलीच भुरगीं व्हड जातनाय हें सत. आवयक घरा रावनय करपासारके उद्येग आसात, लाडू, चिवडो, मसालो, लोणचीं पापडांतल्यान भायर सरून, तीं करून. ऋतुमाना नुसार उद्येगाचें रुप बदलूंक येता. एका तेंपार लाडू, चिवडो, चकरी उत्सवांवेळार दिसताली आतां ती सदांय जाता. स्वयंपूर्णा अन्न प्रक्रिया उद्येगांतल्यान गोंयची अस्तुरी कितली जैतवंत जाल्या? मार्केटिंगाची कुशळटाय, पोशक अन्नाचें म्हत्व तिका खबर आसा हाचो सर्वे राज्यांत जावंचो. गृह आधारांतल्यान स्वयंपूर्णा जाल्ली अस्तुरी करोडपती जावपाचे वाटेर आसा ? गोंयच्या मुखेलमंत्र्यांनी आपले घरकान्नीचे, अस्तुरी आमदारांचे, आयोगाचे मजतीन स्वयंपूर्णेची नवी नीत ठरोवची, देशाकय ती उपेगी ठरुंक येता. आदल्यो एफडीएच्यो संचालक ज्योती सरदेसाय हांणी सेवेच्या निमण्या वर्सांनी केल्ल्या कामकाजाची तुस्त देशान केली. कावळो आफुडलो, बाळंटेराच्या सुटयेची देशांतली नवी नीत थारावपांत तांणी, तांच्या सारक्या बायलांनीय विचार मांडपाक जाय, सरकारी वावरांत आशिल्ले अस्तुरेक नवी दिका मेळपा पासत. कामकाजांत खासगी, सरकारी आशिल्ली अस्तुरी निमणे आवय, भयण, घरकान्न आसता हें ती विसरना, विसरचीय ना.
सुहासिनी प्रभुगांवकार9881099260
भांगरभूंय | प्रतिनिधी
सरकारी जमीन बळकावप्यांचेर जातली कायदेशीर कारवाय
भांगरभूंय I प्रतिनिधीपणजी : पणजेंतल्या जिमखान्याच्या जमनीचो फुडल्या आठ दिसांत सर्व्हे जातलो. सरकारी जमीन कोणाकूच बळकावपाक दिवचे नात. तसो कोणी यत्न केल्यार तांचेर कायदेशीर कारवाय करतले, अशी शिटकावणी खेळां मंत्री गोविंद गावडे हांणी सोमारा दिल्या.खेळां खात्याचे जमनीचेर पणजी जिमखानान अतिक्रमण केल्ल्याची खबर ‘भांगरभूंय’त प्रसिद्ध जाले उपरांत ह्या खबरेची दखल घेवन खेळां मंत्री गावडे हांणी जिमखाना मैदानाचो पळोवणी करपाचे जाहीर केल्ले. ते प्रमाण गावडे हांणी सोमारा सकाळीं खेळां खात्याच्या अधिकाऱ्यां सयत मैदानाची पळोवणी करून नियाळ घेतलो. ते उपरांत ते पत्रकारां कडेन उलयताले.2012त पणजी जिमखानान महसूल खात्या कडेन कबलात करून 49 हजार चौखम मिटरांतल्यान 30 हजार चौ. मि. जमीन घेतिल्ली. ताका लागून 19 हजार चौ. मि. उरप गरजेचें. पूण नियाळा मजगतीं 19 हजार चा. मिटरांतली साडेतीन हजार चौ. मि. जमनीचेर जिमखानान अतिक्रमण केल्ल्याचे दिसून आयले. ताका लागून फुडल्या आठ दिसांत सरकारी आनी जिमखाना अशा दोगांच्या सर्व्हेयरा वरवीं हे जमनीचो जोड रितीन सर्व्हे करपाचे निर्देश आपूण खेळां खात्याक दिसात. हातूंतल्यान खरे कितें फट कितें ते भायर येतले, अशें खेळां मंत्री गावडे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
March 16, 2025
