भांगरभूंय | प्रतिनिधी
भारताच्या आंतरराष्ट्रीय चित्रपट महोत्सवाचें (इफ्फी) संचालकपद एका सिनेनिर्मात्याक पयलेंच फावट फावो जालां. 55 वे इफ्फीचे संचालक शेखर कपूर हांणी ‘मासूम – 2’ सिनेमाचे निर्मणेची घोशणा केल्या. फिल्म दिग्दर्शक, निर्माते सुभाष घई हांणीय आपूण ‘ऐतराज’ फिल्माचो सिक्वल करतलों अशी म्हायती दिल्या. दोगय 75 वर्सां वयले. ते पिरायेंत मनशाच्या फाटल्यान दुयेंसांची माळ लागिल्ली आसता. कपूर, घई भलायकी सांबाळून समाजाचीं दुखणीं, खोस, तंटे, गाराणीं सिनेमांतल्यान मांडटात. सिने साधनेंतले हे दोगांचेय येत्न तोखणायेचे. दोनय सिनेमांचे सिक्वल फुडल्या पांच वर्सांत इफ्फी मेरेन पावतलेच.
‘मासूम 2’ चो विशय आर्टिफिशल इंटेलिजन्सच्या माध्यमांतल्यान मेळयला अशें कपूर हांणी सांगलां. 78 वर्सांचे पिरायेर ‘मासूम 2’ करप सोंपें न्हय. बॉलिवूड ते हॉलिवूड, फिचर फिल्म ते डॉक्युमेंटरींच्या वावरांत पांच दसकां वयर घुस्पून उदक व्हांवोवपी कपूर. तांकां घराब्यांतले तंटे, तातूंतल्यान समाजाचेर, भुरग्यांचेर जावपी परिणामांचो अभ्यास आसा. तंत्रगिन्यानांत पाविल्ले पिळगेच्या प्लस, मायनस पॉयंटसांची काणी तांच्या सिनेमांतल्यान लोकां मुखार वतली अशीं चिन्नां दिसतात. सिनेमाच्या कथानकांत ए आय येवपाक लागलां, बुद्धिमता फाटल्यान आसले बगर तें शक्य आसा ? ‘लकडी की काठी, काठी पे घोडा..’ हें कपूर हांच्या मासूम सिनेमांतलें अज्रंवर गीत आयजूय लोकांच्या ओंठार घोळटा. त्या सिनेमांतले उर्मिला, जुगल हे बाल कलाकार पिरायेन, अणभवांतल्यान व्हड जाल्यात. पयलींच्या कलाकारांक घेवन ‘मासूम २’ करपाची इत्सा परगटायतना नव्या सिने तंत्रगिन्यानाच्या उपेगांतल्यान जाणट्यांक वेगळें रुपांरंगांत व्हरपाचें कपूर हांणी चिंतलां. एकादरे सिनेमा लांबायेन ल्हान जायत पूण सदचेवरी तो वादांतल्यान जैता कडेन वचपी आसतलो अशी आस्त बाळगुया.
पोरण्या सिनेमाचें नवें रुपांतर, ब्लॅक अँण्ड व्हायट सिनेमा रंगीत करप तंत्रगिन्यानांतल्यान सिने उद्येगाक फाटल्या कांय वर्सांनी शक्य जालां. इफ्फींत येवपी संवसारीक सिने तंत्रज्ञान, तंत्रज्ञांचे भासाभासेंतल्यान मेळिल्लें तें देणे. अंदूचे इफ्फीतय संवसारीक सिने तंत्रज्ञानाची सया आसा. शोले पळोवपाचो विक्रम करतल्याचेर सिनेमा येता जाल्यार शोले – 2 करप कित्याक शक्य जावचें न्हय?
इफ्फी पेपरलेस
इफ्फी गोंयच्यान सिने ज्ञान, तंत्रज्ञानात पेपरलेस जाला. एक गोंयकार दिग्दर्शक सिनेमाचे मुखेल धारेंत पावला हाची गवाय म्हळ्ळ्यार 55 वो इफ्फी. गोंयकार सिने दिग्दर्शक इंजिनियर आदित्य जांभळे हांणी दिग्दर्शित केल्लो आर्टिकल 370 सिनेमा अंदूचे इफ्फींतल्या मुखेल सर्तींत आसा. पयल्या इफ्फी वेळार सिने संस्कृताय गोंयांत ना अशें हिणसावप्यांक आदित्यान जाप दिल्या. खरवस, आबा ऐकताय ना ह्या सिनेमांतल्यान पुराय लांबायेच्या हिन्दी सिनेमा मेरेन पाविल्लो आदित्य हो तरणाटो सिनेमाच्या मळार नामना जोडटलो हें इफ्फींत ताका मेळिल्ले वेळार होल्मल्लें. राष्ट्रीय सिनेमा पुरस्कारय ताका मेळ्ळा. गोंयांत 21 वर्सां आदीं इफ्फी आयलो तेन्ना सावन दरवर्सा नासत पूण दोन तीन वर्सांनी एकदां भारतीय सिनेमा इफ्फींतले सिनेमाचे सर्तींत आसता. भांगरामोर मेळोवपाचे सर्तींत गोंयकार तरणाट्या दिग्दर्शकाचो सिनेमा वचप ही ल्हान गजाल न्हय. सिनेमा वादांत सांपडलो पूण अर्थिक येणावळींत उणो पडलो ना.
पर्यावरणाचो विशय
गोंयचे म्हादय न्हंयेचो विशय तांणे सिनेमातल्यान संवसारांत पावोवपाक जाय. म्हादय न्हंय कथा, कादंबरी, पर्यावरण विशींच्या लिखाणाचो वांटो जाल्या. हवामान बदलाचो विशय संवसाराक भेश्टायता तेन्ना गोंयच्या म्हादयचेर सिनेमा जाल्यार म्हादयचो तंटो सुटावो जावपाक बळगें मेळूंक येता. पश्चिम घाटाच्या दर्शनांतल्यान. न्हंयो, माती, सैम, अन्न सुरक्षा, मनीस जीणेशैली हे संवसारीक विशय. हवामान बदलाक लागीचे. इफ्फींतल्यान रानवटी जनावरां, रानां, न्हंयो, इतिहास, दायज, आदिवासी भूंयेच्या तंट्यांच्या विशयाचेर सिनेमा इंडियन पॅनोरमांतल्यान जैतवंत जाल्यात.
भुरग्यांक जागोवपी सिनेमा
मोबायलार पळोवंक मेळटा त्या सिनेमाचेर भासाभास जावपाक जाय. मोबायल भुरग्यांच्या हातांत अभ्यासा खातीर आसता तेन्ना भुरगींय इंटरनेटा पासून पयस उरतलीं? अशेवेळार वायट बऱ्या परिणामाचेर भासाभाशेंतल्यान अभ्यास करुन भुरग्यांक जागोवपी सिनेमा काडप हो उपाय. चड वेळ मोबायलाचो उपेग करप, रात दीस मोबायल हातांत घेवन रावप हातूंतल्यान भलायकी इबाडटा? संशोधनातल्यान तो विशय मांडपाक जाय. इफ्फींत स्त्रीशक्त, अस्तुरेचो वेंचिक सिनेमा येता, अंदूय ह्या सिनेमाचीं विंगड विंगड तासां दिसतलींच. इफ्फी व्हड जातना अस्तुरेचीच न्हय जाल्यार इफ्फी प्रतिनिधींक राखण दिवप, तांचें खाण, जेवण, येरादारी, उदकाची बरी वेवस्था जावप म्हत्वाचें. खाणा जेवणाचो दरजो, ताजें खाण वाडिल्ल्या सगल्या मल्टीप्लेक्सांत मेळपाक जाय.
इफ्फी गांवांनी व्हरुंक जाय
इफ्फी फुडारांत ओ टी टी च्या माध्यमांतल्यान काणकोण मेरेनच्या सभाघरांनी व्हरुंक जाय. थंयच इफ्फी राज्यांतल्या कोनशांनी पावतलो. इफ्फींत गोंयकार साहित्यिकांच्या पुस्तकांचें ल्हानशें प्रदर्शन जावचें. कलेच्या मळार क्रांती हाडपी, सिने संस्कृती गोंयकारांमदीं चडांत चड केळोवपी इफ्फी तसो आठ दिसांचो गोंयचो सोयरो. स ते आठ म्हयने ते खातीर बांदावळ राजधानी दिल्लींतल्यान जाता. वीस वर्सांआदीं इफ्फी गोंयांत आयलो तेन्ना शेंकड्यांनी अधिकारी, बसका, पार्ट्यांनी शिरकल्लो. ते दीस आयज उरुंक ना, अधिकारी येतात निमण्या आठ दिसांनी. देसी इफ्फीक आयज विदेशांतय लोकमान्यता मेळ्ळ्या. गोंयांत इफ्फी पासत व्हडल्या घराची गरज ना. सिनेमाचें शिक्षण आनी तंत्रगिन्यान आॅनलायन विद्यापीठांतल्यान गोंयकारांक मेळपाची सरकाराची मोख आसची. गोंयची कला, परंपरा मात्सो वेगळोचार आसलो तरी भारतांतल्या हेर राज्यांवरीच. ती कलाय इफ्फीच्या आंगणांत, माचयेर दिसता. तीच इफ्फीची नवी वाट.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
