भांगरभूंय | प्रतिनिधी
फ्रान्सीस मास्कारेन्हास: आपल्याचेर केल्ले आरोप तथ्यहीन
फोंडें: गोमंतक ऊस उत्पादक संघटणा आनी सुविधा समितीचो ऊस तोडून हेर राज्यांनी येरादारी करपाचो कसलोच संबंद ना. राखी नायक सेगीत लोकांक ‘ब्लॅकमेल’ करून आपली पोळी भाजून घेतात. आपल्याचेर केल्ल्या आरोपांत कसलेंच तथ्य ना. पुरावे आसल्यार तांणी सिद्ध करून दाखोवचे वा फुडल्या वर्सा ऊसाची तोडणी करून हेर राज्यांनी येरादारी करून दाखोवची अशें थेट आवाहन फ्रान्सीस मास्कारेन्हास हांणी पत्रकार परिशदेंत केलें.
फोंड्यां घेतिल्ले पत्रकार परिशदेंत अदीक म्हायती दितना फ्रान्सीस मास्कारेन्हास हांणी राखी नायक हांणी केल्ले सगले आरोप भायरायतना, हाचे पयलीं रोख रक्कम दिवपाची मागणी केल्ली. रक्कम दिवंक नाशिल्ल्यान गरजे भायर आरोप करून तें प्रसिद्धी मेळयता. फाटले विधानसभा वेंचणुकेंत एका पक्षाचे तिकेटीचेर वेंचणूक लडयिल्ली. फुडल्या वर्सा लोकसभा वेंचणूक आशिल्ल्यान लोकांक ‘ब्लॅकमेल’ करून निधी एकठांय करपा बरोबर प्रसिद्धी मेळोवपाचो यत्न ताणें सुरू केला अशें मास्कारेन्हास हांणी सांगलें.
ह्या वर्सा गोंयच्यान 5200 टन ऊसाची येरादारी कर्नाटकांत केल्ली. ताका लागून गैरवेव्हार करपाचो प्रस्नूच येना. ऊसाची येरादारी करून ऊस उत्पादकांक फटोवपाचो यत्न केन्नाच केलो ना. राखी नायक हांणी फुडल्या वर्सा गोंयचो ऊस कर्नाटकांत येरादारी करून दाखोवचो अशें आवाहन फ्रान्सीस मास्कारेन्हास हांणी दिलें.
ह्या वेळार रिमा गांवकार, रमीला गांवकार, महादेव गांवकार, व्हेरॉन फर्नांडीस, थॉमस फर्नांडीस आनी हेर ऊस उत्पादक पत्रकार परिशदेंत हाजीर अशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
