गोंयांत बाल साहित्याचो उणाव, देखून मागोवची पडली

भांगरभूंय | प्रतिनिधी

– एससीईआरटी संचालका कडल्यान विसकावणी

– 9वी ते 12वेच्या पुस्तकांत गोंयच्या लेखकांंच्या साहित्याचें प्रमाण वाडटलें

— पुस्तकांंचो खासा समिती वरवीं जातलो नियाळ

पणजी : गोंयच्या लेखकांं कडल्यान ल्हान भुरग्यांं खातीरचे साहित्य (बाल साहित्य) उण्यां प्रमाणांत उपलब्ध जालें. हाका लागून पयली आनी दुसऱ्या यत्ते खातीर महाराष्ट्रांतल्या लेखकांनी बरयिल्ल्या साहित्याचो आस्पाव करचो पडलो. काय लेखकांं कडल्यान धडे बरोवन घेवचे पडले. यत्ता 9वी ते 12वेच्या मराठी आनी कोंकणी पुस्तकांंत गोंयच्या लेखकांंचें साहित्य चड प्रमाणांत आसतलें, अशें एससीईआरटीन स्पश्ट केलांं. पुस्तक तयार जातकच खासा समिती वरवीं ताचो नियाळ जातलो, अशें संंचालक मेघना शेटगांवकार हांंणी सांंगलें.

यत्ता आठवी मेरेनच्या मराठी पुस्तकांंनी गोंयच्या लेखकांं परस महाराष्ट्रांतल्या लेखकांंच्या साहित्याचेर आदारीत धडे, कविता चड आसा. हे विशीं जाणकार तशेंच गोंयच्या साहित्यिकांं कडल्यान खर टिका जाले उपरांत एससीईआरटीन ही म्हायती दिल्या. पुस्तक तयार जाले उपरांत खासा समिती वरवीं ताचो नियाळ घेवपा सयत गोंयकार लेखकांंच्या साहित्याक मराठी, कोंकणी पुस्तकांंनी फावो ते प्रमाणांत सुवात मेळटली, अशेंय एससीईआरटीन स्पश्ट केलांं.

गोंय शिक्षण संंशोधन आनी प्रशिक्षण मंंडळाच्यो (एससीईआरटी) संंचालक मेघना शेटगांवकार हांंणी पत्रकार परिशद घेतली. पत्रकार परिशदेक संंचालक (प्रशासन) सरिता गाडगीळ, अनिल सामंंत, सुशांंत नायक आनी रुपेश सावंंत हाजीर आशिल्ले.

गोंयांत राष्ट्रीय शिक्षण धोरणाची (एनईपी) कार्यवाय सुरू जाल्या. फाटले वर्सा यत्ता तिसरी आनी सवे खातीर पुस्तकांं तयार जाल्ली. अंंदूं यत्ता पयली, दुसरी, चौथी, पांचवी, सातवी आनी आठवी यत्ते खातीर पुस्तकांं तयार केली. एससीईआरटीन अंंदूं 41 पुस्तकांं तयार केल्या. हातूंत 16 पुस्तकां भाशेची आसात. ही पुस्तकां तयार करपाच्या प्रक्रियेत 150 शिक्षकांंचो आस्पाव आशिल्लो. हे भायर संंपादक मंंडळ तशेंच परिक्षण मंंडळ आशिल्ले. हे भायर पयली ते चौथी मेरनच्या पुस्तकांतलो मजकूर दोन भाशांंतल्यान (बायलिंंग्युल) तयार करपाचो वावर आशिल्लो. ह्या पुस्तकांंनी आक्षेपार्ह वा नितीमत्तेक बादा हाडपी कसलोच मजकूर नाशिल्लो. नॅशनल करीकुलम फोरम (एनसीएफ) हांंचे मार्गदर्शक तत्वांं प्रमाण पुस्तकांं तयार जाल्या. ही पुस्तकां एनईपीचेर आदारीत आसा, अशें संंचालक मेघना शेटगांवकार हांंणी सांंगलें.

आमी जी मराठी पुस्तकांं तयार केल्या ताची शिक्षक तशेंच जाणकारांंनी तोखणाय केल्या. पयलीच्या मराठी पुस्तकांं परस आतां तयार जाल्ल्या पुस्तकांंनी गोंयच्या लेखकांंच्या साहित्याचो आस्पाव आसा. गोंयच्या लेखकांनी बरयिल्ले बाल साहित्य उणें उपलब्ध जालें. हाचे खातीर भायल्या लेखकांंच्या बालसाहित्याचो आस्पाव करचो पडलो. हाचे फुडें णवी ते बारावी मेरेनच्या पुस्तकांत गोंयच्या लेखकांंच्या साहित्याचो व्हड प्रमाणांत आस्पाव जातलो, अशें अनिल सामंंत हांंणी सांंगलें. विद्यार्थ्यांक कशा प्रकारच्या पुस्तकांची गरज आसा आनी दर्जो हाचो विचार करून पुस्तकांं तयार जाल्या. धडे गोंयच्या लेखकांंचे आसचे का भायले आसचे, तो मुद्दो नाशिल्लो. एनसीएफाच्या मार्गदर्शक तत्वांं मदीं लेगीत हो मुद्दो नाशिल्लो, अशें संंचालक मेघना शेटगांवकार हांंणी सांंगलें. ही पुस्तकां योग्य आनी दर्जेदार आशिल्ल्यान ती फाटीं घेवचे नात, अशें तांंणी स्पश्ट केलांं.

——————–

एससीईआरटी आतां णवी ते बारावी मेरेनची पुस्तकां तयार करतली. दरेकी पुस्तकाचो नियाळ घेवपा खातीर समिती नियुक्त जातली. पुस्तक तयार जाले उपरांत ही समिती पुस्तकाचो नियाळ घेतली. तशेंच मराठी, कोंकणीच्या पुस्तकांं खातीर मराठी अकादमी, कोंकणी अकादेमी, कोंकणी भाशा मंंडळ हांंचे प्रतिनिधी समितीचेर आसतलें.

कोंकणी पुस्तकांंनी व्याकरणा विशीं चुको जाल्या. ताची सुदारणा जातली. गोंय कोंकणी अकादेमीन जी प्रमाण कोंकणी थारायल्या ते प्रमाण पुस्तकांं तयार जाल्या, अशें सुशांंत नायक हांणी सांंगलें.