भांगरभूंय | प्रतिनिधी
उत्सव खंयच्याय धर्माचो आसुं, एकमेकांच्या सांगातान मनोवपाक जाय. दर एकल्याक खोस, आनंद, ऊर्बा मेळूं हो उत्सवा फाटलो हेतू आसता.
आमचें गोंय जरी माणकुलें आसलें तरी तें तरेकवार कलांची खण जावन आसा. तरेकवार जात, धर्म, पंथाचे लोक एकजुटीन हातांत हात घालून हांगा वावुरता. साबार तरांचे सण, उत्सव तिथी प्रमाण मनयतात.
हिंदु लोक उमेदीन शिमगो मनयतात. शिमग्या मांडार धोल- ताशे वाजयतात. मुखामळाक वेगवेगळ्या रंगाचीं, आकाराचीं म्होवाळीं, दोळ्यांक गाॅगल, माथ्याक रंगीत तरेकवार आकाराच्यो तोपयो, साबार तरांची डिझायनेबल मुस्तायकी घालतात. हिंदूं प्रमाण, आमचे क्रिस्तांव भाव- भयणां ह्याच दिसांनी एकठांय जावन कार्नावाल सण मनयतात.
बारीकसाणेने पळोवपाक गेल्यार आदल्या तेंपार शिमग्याकूच कार्नावालाचें रूप दिलां आसतलें. शिमगो धार्मिकतायेक लागीं आसा तर कार्नावालाचेर पश्चिमी संस्कृतायेचो प्रभाव दिसून येता. दोंगरेर इंत्रुज जाता तो शिमगोच. पुर्तुगेज तो मनोवपाक दिनासले म्हूण इंत्रुज नांव दिवन तो मनयताले. हे दोनूय उत्सव एकमेकांच्या फाटोफाट येतात. पद्दत उत्सवाची लागीं लागीं सारकीच. मौज, मस्ती, मजा हांचो त्रिवेणी संगम.
सध्या गोंयच्या साबार वाठारांनी कार्नावालाची तयारी नेटान चल्ल्या. आयज पणजे तो जाता. आमची तरणाटी पिळगी, बच्चा कंपनी नेटान चित्ररथ करतात. कोण नाचाची तालीम करतात. तरणाटे जानेवारी सुरु जालो काय रोखडेच चित्ररथाचे तयारेक लागतात. रातीचे दीस करून सोबीत चित्ररथ तयार करतात. लोकांनी तोखणाय केली की तांचें मन सामकें भरून वता. ताण, तणाव, हुस्को सोडून ते कार्नावालच्या दिसाची वाट पळयतात. एकठांय येवून हातांत हात घालून पदां म्हणत गांवभर नाचतात.
म्हापशें, मडगांव, वास्को, पणजे ह्या शारांनी हो उत्सव उमेदीन मनयतात. हजारांनी लोक, देश- विदेशाचे पर्यटक हजेरी लायतात. पणजे शारांतली येरादारी पसून दनपारा दोन वरां उपरांत बंद करतात. बसी चलोवपी सगले कार्नावाल पळोवपाक वतात. सगले कडेन खोशेचीं ल्हारां पातळतात.
ह्या उत्सवान चित्ररथाच्या रुपान, मुस्तायकी सर्तीच्या निमतान भेस केल्लें पाडेली, नुस्तेकार, पुलीस, ड्रायव्हर, दोतोर हातांत हात घालून नाचतात. ‘न्यु कपल’ अशी भुमिका लोकां मुखार सादर करपी आमचे क्रिस्तांव भाव- भयणींक पळोवन जिवाक धादोसकाय भोगता. विदुषक, किंग मोमो पळोवन ल्हान भुरग्यांचें मनोरंजन जाता. ती खोशयेन नाचूं लागतात. कांय पर्यटक हातात बियरीचे कॅन घेवन नाचतात. तेय कोंकणी पदां म्हणटात, डान्स करतात.
सांगीन दिसता, कार्नावाल हो सगळ्या धर्मांचो एकवट. हातांत हात घालून उमेदीन पश्चिमी संगीत, कोंकणी संगीताचेर नाच करप. उत्सव खंयच्याय धर्माचो आसुं, एकमेकांच्या सांगातान मनोवपाक जाय. दर एकल्याक खोस, आनंद, ऊर्बा मेळूं हो उत्सवा फाटलो हेतू आसता.
कार्नावाल, शिमगो ह्या माध्यमांतल्यान आमच्या गोंयांक साबार कलाकार मेळटात. सदाच्याच वाजवण्याच्या कामा पासून मात्शी तकली वयर काडून उत्साही वातावरणांत वावुरपाचो भांगराचो खीण म्हणल्यार कार्नावाल.
सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
