भांगरभूंय | प्रतिनिधी
डिसेंबराचे 6, 7 तारखेक रातीं हडफड्यां उज्याचें कांड जालें आनी तातूंत 25 लोक घुस्मटून मेले. तसलो प्रकार पयलीं गोंयांत केन्नाच जावंक नाशिल्लो. खाची- कोनशांतल्यान टिका जावंक लागतकच प्रशासन जागें जालें आनी तपासणी सुरू केली तेन्ना बरेच बेकायदेशीर नायट क्लब, पब, पर्यटन आस्थापनां मेळ्ळीं. कांय जाणांनी परवाने पसून घेवंक नाशिल्ले. दुसऱ्या राज्यांत वचून अशें वागप म्हणल्यार केदें व्हडलें धाडस!! दुडवांच्या बळग्याक आवय सोडून संवसारांतली खंयचीय वस्त विकत घेवं येता खंय! पूण हे लोक आवय पसून विकत घेवपाचो यत्न करपी. अर्थांत 100 टक्के तेच जापसालदार अशें म्हणप पिशेपणां थारतलीं! दोन म्हयन्यां उपरांत आतां नायट क्लब, पब, बंद सभाघरांनी इलेक्ट्रीक फोग लावपाक सरकारान बंदी घाल्या. दोन म्हयन्यां खातीर ती आसतली. खरें म्हणल्यार ती कायमची जाय. कारण हालींसराक झिगी आशिल्ले बाॅम्ब, नारगां लावप खूबच वाडलां. काॅलेजीच्या गॅदरिंगांनी, संगीत कार्यावळींनीय तें पळोवंक मेळटा.
हडफड्यां नारंगाचो उजो वयर वायरीक लागलो, शाॅर्ट सर्किट जालें तें व्हिडियोंत दिसलें. परिणाम 25 जाणांक मरण. दुर्घटना टाळपाक सरकारान हो निर्णय घेतला. नेम मोडप्यांक (तातूंत पर्यटन मळा वयले बरेच वेवसायीक हुशार.) खर ख्यास्त जातली खंय! संरक्षण उपाय, धोको उणो करपाची येवजण आनी हेर कागदां (?) सादर केल्यार मात परवानगी दितले खंय, अशेंय म्हणलां. पर्यटन मळार स्पार्कलर, धुंवर, झिगी- बेगड आशिल्ले बाॅम्ब, फ्लेम थ्रोव्हर.. असल्या उपकरणांचो वापर जाताच. लायटीचेर चलपी स्मार्कल्सांतल्यान चकचकीत किट्ट्यो उसळटात. पळोवपाक सामकें ‘कूल’ तरी तांचें तापमान 800 सेंल्सियस मेरेन आसूं शकता. पड्डे, फोम, केबल, लाकूड रोखडेंच पेटपाक शकता. रसायन गरम करून धुंवर सोडटात. शाळेंत नाच करपी दोन ल्हान चलयो धुंवर येतकच पळून गेल्ल्याचो व्हिडियो व्हायरल जाला. ह्या धुंवरान फुडलें काय दिसना. स्वासाक त्रास जावं येता. बार्नल्स, कोल्ड फ्लेम वापरतात. प्रत्यक्षांत तांकां लागून शाॅर्ट सर्किट जावपाची भिरांत आसता. फाॅरेनाच्यान हाडलां म्हणजे सुरक्षीत हो गैरसमज तकलेंतल्यान काडून उडोवंक जाय.
पर्यटन आस्थापन सुरक्षीत दवरपाक उजो पलोवपाचीं सगलीं उपकरणां कर्मचाऱ्यांक हाताळूंक येवंक जाय. उजो पालोवपी दळा कडल्यान वर्साक एकदां तीं तपासचीं. दुर्घटना घडल्यार पर्यटकांक भायर काडपाक 2- 3 तरी आपत्कालीन मार्ग आसचे. भायर सरपाचो मार्ग हो सामान दवरपाचो गुदांव न्हय. जनरेटर, इर्न्व्हटर सक्तीचे. चुडटां, कागद, पुठ्ठे, पड्डे वापरून सजावट करतना जतनाय घेवप बरें. कारण तांकां रोखडोच उजो लागता. इलेक्ट्रीक फोग लावपाक उजो पालोवपी दळाची लेखी परवानगी आसची. दुर्घटनेचें माॅक ड्रील अदींमदीं जावचें. तातूंत सुरक्षा रक्षकां सयत वेटर, डिजेंचोय आसपाव आसचो. कार्यावळी वेळार चालू आसतलो असो सीसीटीव्ही जायच. नायट क्लब म्हणल्यार फक्त मनोरंजन, पयसो जोडपाचें साधन न्हय, तर लोकांचे सुरक्षेचोय तो प्रस्न.
जें जालें तें परत घडूं येता. बोस्टनांत 1942 त कोकोनट ग्रोव्हांत जाल्ले दुर्घटनेंत सजावटीक उजो लागून 492 लोकांक मरण आयिल्लें. उजो पालोवपी दळाचे कायदेच तेन्ना बदलिल्ले. ब्राझिलांत 2013 त किस नायट क्लबांत पाख्यांतलो फोम लासून लायट बंद जाली आनी पर्यटक एकाच दारा वटेन धांवले. 242 मेले, 630 जखमी जाले. फिलिपिन्सांत 1996 त ओझोन डिस्कोंत उजो लागून 162 मेल्ले. तांकी परस भितर चड लोक आशिल्ले. असल्यो दुर्घटनां दरवर्सा घडटात.
फक्त उज्या आडच्योच सुरक्षा न्हय, तर पर्यटकांची हेर सुरक्षा,
आवाजाचें, हवेचें प्रदुशण ह्या गजालीं कडेनूच सरकारी यंत्रणांनी लक्ष दिल्यार बरें जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
