भांगरभूंय | प्रतिनिधी
म्हजें मत
तंदुरुस्त भलायके खातीर सगल्यांत म्हत्वाचें आसा, तें म्हणल्यार आहार. आहार तज्ञूय हेंच सांगतात. मात आमच्या देशांत पुश्टीक आहार खावपाचें प्रमाण सामकें उणें आसा. एका अभ्यासा उपरांत हें मुखार आयलां. हेर दक्षीण आशियाई देशां परस भारतांत पुश्टीक आहाराची स्थिती खूब हुस्क्याची आसा, अशें तज्ञांचें मत.
पुश्टीक आहार घेवप्याचें प्रमाण उणें आशिल्ल्यान भारतांत कुपोशीतांचो आंकडोय व्हडलो आसा. फाटल्या कांय दिसां सावन देशांत ‘कुपोशण हटाव’ मोहिमो चलतात. तरीय भारतांत स्थिती बरी नाशिल्ल्याचें राष्ट्रीय पोशण संस्था, इंडियन कावंन्सील आॅफ मेडिकल रिसर्चचे आदले संचालक डाॅ. बी. शशिकरण हांणी सांगलां. जीवनसत्व ए, आयोडीना सयत लोखंड, फोलिक अॅसिड, बी 12 आनी इ जिवनसत्वांच्या उणावाक लागून कुपोशणांत वाड जाता. उण्या वजनाचीं भुरगीं जल्माक येवपाचें प्रमाण उणें जाल्लें आसलें तरी भारतांतल्या कांय राज्यांनी हाचें प्रमाण चड आसा अशें शशिकरण सांगतात.
संवसारीक भलायकी संघटनेच्या ताज्या अहवाला प्रमाण, 25 लाख भुरग्यांक दरवर्सा कुपोषणाक लागून मरण येता. चीनांत कमी वजन आशिल्ल्या पांच वर्सां सकयल्या भुरग्यांचे प्रमाण फक्त सात टक्के आसा. भारतांत हें प्रमाण 42.5 टक्के इतलें चड आसा, अशें शशिकरन सांगतात. भारतांत आमी पुश्टीक आहारा विशीं जागृताय करप गरजेचें जालां.
– गजानन बा. नायक भाटकार
आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
