भांगरभूंय | प्रतिनिधी
तेंपा प्रमाण कुरपणें घालत बदल आपणावन जो फुडें वता ताकाच जैत मेळटा. प्रधानमंत्री नरेंद्र मोदी हांचो 75 वो वाडदीस मनयतना तुटली, मोडली अशी बदनामी जाल्ले कला अकादमीन देसाचे उदरगतीचीं पावलां दाखयलीं. राजपाटणातलें कलेचे आंगण अजून पाचवेंचार आसा असो रकाद ते निमतान गोंयभर गेलो.
पणजेचे आमदार कोयर वेवस्थापनमंत्री बाबुश (आतानासियो) मोन्सेरात मिरामार दर्यादेग नितळ करपाक धांवले. स्मार्ट पणजेंतल्यान नितळसाण, उदरगत राज्यांतल्या हेर कोनशाक वतली अशी आस्त आसा. पोरण्यां गोंयां कोयर वेवस्थापन प्रकल्प उबारपाची गरज आसा. भूंय राखून दवरल्या, विरोधकांक जाप दिवपाक मुख्यमंत्री डाॅ. सावंत उणें पडचेनात. बदल आपणायत फुडें पावलां मारतना मुख्यमंत्री डाॅ. सावंत हांणी आपल्या भुजां वयले खात्याचें वजें आनीक देंवयल्यार बरें. मंत्र्यांच्या खात्यांनी बदलांचे वारें हाडल्यार तांकांय नवी दिका दिसतली.
प्रधानमंत्र्यांचो 75 वो वाडदीस मनयतना कांय कार्यावळींचो आरंभ जाला, तातूंत स्वस्थ नारी, सशक्त परीवार अभियानाचो आसपाव आसा. याद जाता राष्ट्रपिता महात्मा गांधी हांच्या उतरांची. ‘अस्तुरेची उदरगत म्हणल्यार गांवांची उदरगत, गांवांची उदरगत म्हणल्यार देसाची उदरगत.’ भारतीय अस्तुरी उच्च शिक्षणांतय मुखार गेल्या. अस्तुरेक विधानसभेत, संसदेंत 33 टक्के राखीवतेन व्हरपा पासत विधेयकाक प्रधानमंत्री मोदीजींच्या तेंपार मान्यताय मेळ्ळी. तेंच तर तांचें व्हड जैत. 33 टक्के अस्तुरेक बिहार, केरळ, उत्तराखंड, गुजरात, गोंय विधानसभा वेंचणुकेंतल्यान विधानसभेंत पावोवपाचे लागणुकेक केंद्र सरकार पाळो दितलें, हातूंत दुबाव ना. गोंय सरकारान एके अस्तुरेक मंत्रीपद आयज दिल्यार 2027 चे वेंचणुकेंत भाजपाक बळगें मेळटलें. चड वगत कित्याक? तीन सक्षम अस्तुरी लोकप्रतिनिधी सरकारांत आसात. एकलेक जरी मंत्रीपद मेळ्ळें तांचे घरकार तांच्या फाटल्यान रावतले. सभापतीपद देविया राणे हांकां कित्याक दिवचें न्हय? तांचें शिक्षण, गिन्यान, अणभव सभापतीपदा खातीर फावोसो आसा. नेपाळांत तात्पुरतें प्रधानमंत्रीपद एके अस्तुरेक मेळ्ळां, ती देख हेर राश्ट्रांय घेवंक शकतात. भारताक अस्तुरी प्रधानमंत्री फुडारांत दिवपा पासत भाजपा उणी पडचीना हें दिसता.
प्रधानमंत्र्यांचे संवसाराचो निरोप घेतिल्ल्या आवयवेल्यान राजकारण कित्याक करप? काँग्रेस पक्षाच्या नांवांत भारतीय उतर आसा तें पक्ष विसरुन गेला व्हय? याद जाता लोकसभेचे विरोधी पक्ष मुखेली राहुल गांधी हांचे बापूय आदले प्रधानमंत्री राजीव गांधी हांची. तांच्या मुखामळार तिडक केन्नाच दिसली ना. राहुल हांणी एक वर सदांच राजीवजींच्या फोटो मुखार बसचें. एक म्हयनो कित्याक आठ दिसां भितर ते बदलतले. राजकारणात बदल वेगीं येतात तें समजून घेवपाची, सकारात्मकता समाजा भितर हाडपाची तांक तांचे मदीं येतली. राजकी पक्ष, सरकार, विधिमंडळ गट हांचे भितरली दुराय पयसावपाची संद काँग्रेस पक्ष घेत व्हय?
भौशीक बांदकाममंत्री दिगंबर कामत भाजपांत घरा आयले. तांचेंय मूळ काँग्रेसींतलें. ते काँग्रेसीचे (रागार जावं नाकात तेन्ना नगरपालिकेचे वेंचणुकेंत राजकी पक्ष नासताले) नगरसेवक, राज्य पावंड्यावेल्या तांच्या राजकारणाचो आरंभ भाजपांतल्यान जालो. प्रधानमंत्री मोदीजींचे ते इश्ट, भाजपांतल्यान दिगंबरबाब पयस गेल्ले तेन्नाय तांची इश्टागत उरिल्ली. ते इश्टागतींतल्यान दिगंबरबाब परतून भाजपा वटेन आयलेच, पूण ताचें मुखेल कारण तांकां काँग्रेसीन दुखयिल्लें. तांकां प्रदेस काँग्रेसाध्यक्षपद दिल्लें जाल्यार ते काँग्रेस सोडपाचे? दिगंबरबाब हे भौशीक बांदकाम खात्याक वेगळे उंचायेर व्हरतले जाल्यार तांकां रात दीस भोंवचेंय पडटलें. भोंवप तांकां लावाचें, वाटेर एखाद्रे नावेले आदले मुख्यमंत्री लुईझिनबाब फालेरो मेळ्ळ्यार जोड रस्त्यांवेल्या सिग्नलाची याद करुन दितले. दोगांयनी एकदां मोपा विमानतळा मेरेन वचचें. मोपा विमानतळार भुतां नात. देवस्पण बुन्याद घालतना केलां.
पयलींचे मुख्यमंत्री लक्ष्मीकांतबाब पार्सेकार राजकी घरा भाजपांत परतुपाच्यो खबरी येवंक लागल्यात. जिणेच्या एका पावंड्यार तांचो हो निर्णय तांकांच न्हय पक्षाक लावाचो. तांची घरकान्न, धूव, पूत राजकारणांत येत व्हय? अनघाताई राजेंद्र आर्लेकार हांकांय राजकारणाचीं दारां ‘अस्तुरी राखीवतें’तल्यान उगतीं जावचीं. राखीवतेंतल्यान 33 न्हय तर 50 टक्के अस्तुरी खासदार फुडल्या धा वर्सां भितर भारतीय संसदेक मेळ्ळ्यार अजाप दिसचें न्हय.
‘स्वस्थ नारी, सशक्त परीवार’ अभियानाखाला बायलां आनी भुरग्यांची भलायकी, कायदे, शिक्षण, उद्येग, पर्यटन तशेंच साबार उदरगतींतली प्रतिमा तपासपाचो होच वगत. गरज ते बदल उदरगतीचीं पावलां मारतना जावचेच, फाटीं सरप ना, मात्शी फाटल्यान नदर मारची.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
