भांगरभूंय | प्रतिनिधी
चिंतन – 36
तुकाराम महाराजांचे अभंग म्हणल्यार जिविताचे सोंपे मार्ग सांगपी दिवे.
तुका म्हणे किती ठकलीं बापुडीं ।
गव्हा नाही गोडी मांडे पुऱ्या ॥
ह्यो ओळी वाचतना म्हजी इश्टीण सीमाची याद जाली. ती चित्रकार. तिका बेगीनांत बेगीन नांव मेळोवपाची इत्सा आशिल्ली. ती एका फाटल्यान एक चित्रां प्रदर्शना खातीर तयार करताली. पूण तिच्या चित्रांनी ‘जीव’ नाशिल्लो. ताकतिकेन, कसलोच यत्न करिनासतना ती काम करताली. तिचीं चित्रां खपनाशिल्लीं आनी ती निर्शेली.
एकदां एका ज्येश्ठ चित्रकारान तिका सल्लो दिलो, “सीमा, तुजे ‘गंव’ बरे आसात, पूण तूं ‘मांडे- पुरयो’ करीना.” म्हणल्यार मुळावें काम ती बरी करताली, पूण तातूंत यत्न, संयम आनी कलाकुसर घालनाशिल्ली. हो अभंग तिचे खातीर एकदम बरो आशिल्लो. फकत गंवाचे पिठ खाल्यार गोडसाण मेळना, तें मळून, सारकें भाजून आनी वेगवेगळे पदार्थ केल्यारुच त्या पिठाक खरी गोडसाण येता. तेच प्रमाण खंयच्याय मळाचेर यशस्वी जावपाक फक्त ताकतीक करून चलना.
जायत्या कलाकारांक असोच अणभव आयला. नामनेचे संगीतकार ए. आर. रहमान हांचीच देख घेयात. संगीत शिकपा खातीर, वेगवेगळ्या वाद्यांचो अभ्यास करपा खातीर आनी स्वताच्या संगीताक वेगळी वळख दिवपा खातीर तांणी जायतीं वर्सां कश्ट घेतले. जायत्या संगीतकारांचें संगीत तांणी समजून घेतलें, पूण तांची नक्कल करपाक न्हय, तर स्वताचो स्वतंत्र मार्ग तयार करपाक. ‘रोझा’ ह्या सिनेमा खातीर ताणें संगीत रचलें आनी संवसारभर ताची नामना जाली. पूण त्या यशा फाटल्यान जायत्या वर्सांची साधना आशिल्ली.
वा तुमी गायिका श्रेया घोशालाक पळयात. तिणें रियलिटी शोंत गावपाक सुरवात केली, पूण तिणें येस मेळोवपाक धांव घेतली ना. दरेका गीताचेर तिणें खूब कश्ट घेतले, आवाजाक योग्य आकार दिलो आनी आयज ती व्हडल्या पांवड्याचेर आसा.
हे सगळे अणभव आमकां हेंच शिकयतात की येस मेळोवपाचो मार्ग उतावीळपणाचो नासता, तर कश्ट, संयम आनी साधनेचो आसता. आयच्या ‘इन्स्टंट’ जगांत, जंय प्रत्येक गजालीचो निकाल रोखडोच लागता, थंय ह्या अभंगाचें म्हत्व आनीक वाडटा. आमकां जाय आशिल्लें यश मेळोवपाक धांवपळ, ताकतीक करचे परस आमच्या कामांत ‘गोडी’ कशी मेळटली हाचेर लक्ष केंद्रीत करचें. कारण अखेर ‘गंवा’क खरी गोडसाण ‘मांडे-पुरयो’ केले उपरांतच येता!
– ह भ प देवदत्त दिगंबर परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
