भांगरभूंय | प्रतिनिधी
सर्तीच्या रोंप्याचो आयज रूख जाला : अनिल पै
भाशा मंडळ फाटलीं 24 वर्सां नेमान कोंकणी कथाकथन सर्त घडोवन हाडटा. सर्तकांचो आंकडो वाडत आसा, ही खोशयेची गजाल. वांटेकार जावपी भुरगीं आनी तांचे पालक उमळशीकेन जून लागलो काय सर्तीची वाट पळयतात, कथा सोदपाक लागतात. गोंयकारां मदीं शणै गोंयबाब कथामाळेची आवड रूजल्या, अशें जेश्ठ पत्रकार आनी पालक अनिल पै (मडगांव) हांणी सांगलें.
भारतांत काणयांची परंपरा हजारांनी वर्सा सावन चलत आयल्या. एकवटीत घराब्यांत आजो-आजी तिळसांजेर दिवे लावपा वेळार नातरांक पणटुंरांक बसोवन रामायण महाभारतांल्यो काणयो सांगतालींच. रातचे न्हिदतना काणयो सांगून आनी बालगीतां गावन न्हिदयतालीं. आतां एकवटीत घराबे नात, मोबायलाच्या वेसनाक लागून काणयो आयकुंवपाक उसरपत ना.
गोंयात कोंकणी भौसा मेरेन पावोवपा खातीर लळितक सुरू केल्लें. गोंयचे दरेके शाळेंत वचून काणयो सांगतालें. काणकोणां, मडगावां, शिरोड्यां, कुडचड्यार आयोजनांत हांवें यत्न केल्ले. मराठीचें वातावरण आसतनाय कोंकणी कथा भुरग्यांक भावताल्यो. उपरांत भाशा मंडळान गोंय पातळीचेर शणै गोंयबाब कथाकथन सर्त सुरू केली. सुरवेक साबार आडखळी आयल्यो. वर्सां वतात -तशीं हे कथामाळेन लोकां मदीं आवड निर्माण केली. आयज कथाकथन सर्त ही लोकांक काळजाचो आंवडो जाल्लो दिश्टी पडटा. मंडळान बोध घेवपा वांगडा रानां- वनां, जनावरां, वनस्पती, पर्यावरण, सैमा सारखे विशयाचेर कथा कथन करपाची पावलां मारलीं. देखून तसल्यो कथा लेखक बरोवक पावले.
आयज नवे- नवे बाल कथाकार तयार जाले. वांटो घेवपी भुरगीं कथा बरोंवक शिकलीं. कविता रचपाक शिकलीं. बाल कथाकार, बाल कवी निर्माण जाले. आज कोंकणीत शेंकड्यांनी कथाकार आसात, शेंकड्यांनी बालकथाचीं पुस्तकां उजवाडाक आयल्यांत. हजारांनी भुरगीं दर वर्सा कथाकथन स्पर्धेत वांटो घेतात. 24 वर्सां आदीं रोयिल्या रोंपाचो आयज वडाचो रूख जावंक पावलो. रूखाक रूंदाय, घटाय आनी खोलाय आयल्या.
सर्तींतल्यान भुरग्यां भितर आशिल्ले प्रतिभेचा वाव मेळटा. काणी सांगप ही एक कला. आवाज, सांगपाची कळाशी, सभेमाजार उबे रावपाक धिटाय आनी आयकुवप्याच्या मना मेरेन पावोवपाची कला रूजवण घेवन जण एक भुरगें उदरगत करूंक पावता. हे सर्तीन भुरग्याच्या काळजांत नवें चैतन्य निर्माण केला. तांच्या व्यक्तिमत्त्वाचो विकास करपाचें काम भाशा मंडळान केलां. ताका लागून कोंकणी भाशा मंडळाक आनी आयोजकांक परबीं फावतात. हांव ह्या उपक्रमाक यश आंवडेतां..
शिरोड्यां सर्त बरीच रंगली : प्रतिमा आनी संदेश गावडे
रुतुशा हें म्हजें चली तामशिऱ्यां सरकारी शाळेंत शिकता. ताचें शिकपाचें माध्यम मराठी. कोंकणी भाशा मंडळा वतीन कथासर्त केंद्र पांवड्यार आसा. तातूंत वांटो घेवपाचें चलयेन सांगलें. काणी कोंकणी सोदपाक हांवें मजत केली. काणी बरोवन जातकच वाचपाक मात्शी कठीण जावंक लागली. ल्हवू ल्हवू रुतुशा वाचपाक शिकलें. शिक्षकांनी ताची उर्बा वाडोवन तालीम घेतली. 2 ऑगस्टाक आमी केंद्राचेर शिरोड्यां गेलीं. ही सर्त तीन गटांनी जाली. भुरग्यांक वेवस्थीत खावपाक दिलें. पयल्या गटांत रुतुशाक पयलें इनाम फावो जालें. आमी आनी शिक्षिका मेहक शिरोडकार, जॅकलीन कॉस्ता खूब खोशी जालीं. आमचे शाळेचें नांव वयर काडलें. शिरोड्यां सर्त खरेंच खूब बरी जाली. सुमार 60 भुरग्यांनी वांटो घेतलो, अशें पालक प्रतिमा गावडे आनी संदेश गावडे (बोरी- शिरोडें) हांणी सांगलें.
जिल्लो पांवड्यार जैतिवंत भुरग्यांच्यो प्रतिक्रिया…
1) पोरूंय हांव सर्तींत वांटेकार जाल्लें. खोस आनी उमेद भोगतां. काणी सांगतनाय मज्जा येता. सर्तक खूब आशिल्ल्यान एक आव्हान आसता. काणी सांगपाक मम्मा, पप्पा आनी शिक्षकांचो भोव आदार लाबला. फुडारांतूय सर्तींत वांटो घेतलें.
निरवी दामोदर गांवकार, सरकारी शाळा, पेडणें
2) खरें सांगपाचें म्हणल्यार सुरवेक सावन हांव खूब अस्वस्थ आशिल्लों. मागीर म्हजो भाव स्वस्तीक आनी शिक्षक अमोल प्रभू गांवकार हांणी उर्बा दिली. म्हज्या भावान ‘कासादोर’ ही वास्तवाचेर आदारिल्ली काणी बरयली. ती शिकतना मज्जा आयली. घरचीं आनी विद्यालयांतल्या शिक्षकांनी मजत केली. फुडारांतूय सर्तींत वांटो घेतलो.
संचित व्यं. नायक, श्रद्धानंद विद्यालय, काणकोण
सोंपयतना…
बारीकसाणेन पळयले जाल्यार ही कथाकथन सर्त आयज फक्त सर्त उरिल्लीं ना. 24 वर्सां आदीं रोयिल्लें रोंप आयज रुख जालां. तो नेटान वाडत आसा. कलेचे मळार भुरग्याच्या काळजांत नवें चैतन्य निर्माण करतनाच भुरग्यांच्या व्यक्तिमत्त्वाची सर्वांगी उदरगत करपाचें काम कोंकणी भाशा मंडळ करता. आदले सर्तक आयज संयोजक म्हूण कथामाळेची जापसालदारकी घेवन ही परंपरा मुखार व्हरतात, हेंच कथामाळेचें जैत. हाका लागून सगल्यांक परबीं फावतात. फुडल्या वर्सांनी नव्यो- नव्यो बऱ्यो काणयो मेळटल्यो आनी सर्तकांचो आंकडो नेटान वाडटलो, अशी आस्त बाळगुया.
(सोंपलें)
विशाल सिनाय खांडेपारकार
8080622370
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
