भांगरभूंय | प्रतिनिधी
1) कोंकणी कथा सर्तीन खासा वळख तयार केल्या. : डॉ. रमिता गुरव
दर वर्सा कोंकणी भाशा मंडळ गोंयच्या शालेय विद्यार्थ्यां खातीर, शणै गोंयबाब कथा माळेचें आयोजन करता. पयली ते धावेचे विद्यार्थी, तांचे शिक्षक आनी पालक, ह्या सगळ्यांचो उत्स्फुर्त प्रतिसाद सर्तीक मेळटा. एकाच दिसा गोंयभर वेग-वेगळ्या केंद्रांनी ही सर्त घडोवन हाडप सोंपी गजाल न्हय. शालेय ते राज्य पांवड्या मेरेन जावपी, हे सर्तीचें आयोजन करतना बरींच आव्हानां पेलचीं पडटात. पूण तांचेर मात करुन, आपले वांगडी तशेंच कितल्याश्याच आप-वावुरप्यांच्या सांगातान कोंकणी भाशा मंडळ तुस्त करपा सारकें येसस्वी आयोजन करता.
ही सर्त भुरग्यां मदी वाचनाची आवड निर्माण करता. तांका कोंकणीं संस्कृताये कडेन जोडपाचें व्हड काम करता. हातूंत कांयच दुबाव ना. पूण हाच्या वांगडा आनी एक म्हत्वाचे काम ही सर्त करता. काणी सांगपाची परंपरा मनशां इतलीच पोरणी आसा. पूण आयज एकमेकां मुखार बसून उलोवपा परस मोबायलां वांगडा आमचो चड वेळ वता. संवाद आयज ना जावंक लागला. अश्या वेळार सर्तीच्या माध्यमांतल्यान काणी सांगपाची आनी आयकुपाची संवय भुरग्यांक लायतात, लोकां मदीं संवाद सुरु करपाचे दिकेन शणै गोंयबाब कथामाळ एक मोलादीक काम करता.
हांव फाटल्या कांय वर्सां सावन कथामाळेचें परिक्षण करतां. पयले फावटीं वांटो घेतना जाल्ल्यो चुको लक्षांत घेवन, जेन्ना भुरगें परत सर्तीन वांटो घेता. तेन्ना त्यो चुको टाळटा आनी बऱ्या तरेन कथा सांगता, ते पळोवन खोस भोगता. हांव जाणां, भाशा मंडळ भुरग्यांनी कथा सांगची, नाटक करचें न्हय हाच्या खातीर शालेय शिक्षकांचें मार्गदर्शन करता. पूण तरी लेगीत सर्तींत कितलीशींच भुरगीं काणी सांगचे सोडून मोनोलोग करतात शी दिसता. खुबदां हातूंत अतिनाट्याचो आस्पाव आसता. ह्यो गजाली टाळपाचे दिकेन आनीक यत्न करपाची गरज आसा अशें म्हाका दिसता.
एका वेळार भाग घेवपी कितलींशींच भुरगीं आयज कोंकणीच्या मळार वावुरतना पळोवन खोस भोगता. म्हज्या खातीर कथामाळेचे खाशेलेंपण म्हणल्यार हांगा कोंकणीच्या तरेकवार बोलयांचो स्वर आयकुंपाक मेळटा. गोंयच्या शिक्षणीक – सांस्कृतीक मळार आपली खासा वळख तयार करपी, ह्या उपक्रमा खातीर भाशा मंडळाक परबीं.
2) परिक्षक म्हणून वांटेकार जावप हें व्हडलें भाग्य : ममता बिभास पार्सेकर.
शणै गोंयबाब कथामाळेक परिक्षक म्हणून वांटेकार जावप म्हळयारूच एक व्हडले भाग्य अशें हांव समजता. आमच्या मायभाशेंत जेन्ना शाळेचीं माणकुलीं भुरगीं काणयो सादर करतात तेन्ना मजा येताच, पूण तितलेंच परिक्षक म्हणून कठीण जाता. वर्सान वर्स हजारां वयर भुरगीं वांटेकार जावप हें एक जैत, सर्तीचो निकाल कितेंय आसूं, वांटो घेवप म्हत्वाचें. तुमचो हो उपक्रम असोच चालूं उरूं. आमचे फुडले पिळगेक आमचे मायभाशेंचे म्हत्त्व समजूं. तुमच्या ह्या उपक्रमांत म्हाकाय वांटेकार केलें म्हणून मंडळांक मना काळजांतल्यान दिनवासतां.
ही फक्त सर्त न्हय, तरणाट्यांचीं संघटीत चळवळ : सह- आयोजक गौरांग बिडये
गोंयभरांतल्यान हजारांनी वांटेकार जावपी सर्तक कोंकणी कथाकथनांच्या गिरेस्त दायजाक मुखार व्हरतात. भुरग्यांची उमेद, उत्साह आनी काणी सांगपाची कळाशी पळोवन, हे वर्सां मन भारावन गेलें. 24 वर्सांचो प्रवास जेन्ना कथामाळ करता. तेन्ना सगळे सर्तक, परिक्षक, संयोजक आनी हेरांचो वांटो आसता. हे कथामाळेचो हांव एक आदलो सर्तक आशिल्लों. आयज जेन्ना आयोजक म्हूण वावुरतां तेन्ना विद्यार्थी वयांचेर एक परत फेरो मारिल्ले वरीं जाता. सर्तींत वांटेकार जावपी भुरग्यांची उमेद पळोवन मुखार ही सर्त कोंकणी, तरणाट्यांचे चळवळीची एक म्हत्वाचो वांटो थारतली. हातूंत दुबाव ना.
(मुखार चलता)
विशाल सिनाय खांडेपारकार
8080622370
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
