रूपड्यांतलो उच्चभ्रू आतंकवाद

भांगरभूंय | प्रतिनिधी

पाकिस्तान आतंकवाद्यांक अर्थीक मजत, बळगें दिता ते सगळ्या देशांक आनी संयुक्त राश्ट्रांक खबर आसा. आमच्या ऑपरेशन सिंदूराचे मजगतीं चीन …..

ग्रीक देव जानूस हाका दोन तकल्यो दाखयतात. एक तकली सद्गुण तर दुसरी दुर्गुण दर्शयता. जगांतल्या प्रधानमंत्री, राश्ट्राध्यक्षांच्या सभ्य, आदरणीय, नागरी रुपड्यां फाटल्यान क्रूर आतंकवादीय लिपिल्ले आसतात. आतंकवाद आनी आतंकवाद्यांक सगळ्याच देशांचो खर विरोध आसता खरो, पूण आपल्या गोपांतल्या देशांच्यो आतंकवादी कारवायो ते आडनदर करतना दिसतात.                        

जगांतल्यो एकाधिकारशाही, अतिरेकी राजवटींचें ट्रंपाची अमेरिका वा शी जिनपिंगाचे चीन ह्या दोन म्हाशक्तींच्या गोपांत ध्रुविकरण जाल्लें दिसता. दोनूय दिव्यांत तेल घालपीय देश आसात. महाशक्ती अमेरिकेच्या ट्रंपाक आतंकवाद्यांची इश्टागत आदींय आवडटाली, पूण ताच्या दुसऱ्या कार्यकाळांत वागणुकेंत, उलोवण्यांत आनी देहबोलींत ती आवड आता निस्संकोच, नियमित उघडपणान दिसपाक लागल्या. अमेरिकी संसदेचेर (कॅपिटोल) हल्लो चडोवन सुरक्षाकर्मींक जखमी करपी, मारून उडोवपी ट्रंप समर्थकांक  दोशी थारावन न्यायालयान बंदखणींत धाडिल्ले. त्या गुन्यांवकारांक आपूण वेंचून आयले उपरांत ट्रंपान विशेशाधिकार वापरून सरसकट माफी दिवन मुक्त केले. विश्विक मळार ट्रंप हुकुमशाह आनी आतंकवादी हांचे मदीं वावुरतना दिसता. आपल्या राजकी विरोधकांक विशप्रयोग करून, बंदखणींत धाडून काबार करून उडोवपी रशियेचो पुतिन, उत्तर कोरियाचो किम जोंग उनाची संगत ट्रंपाक मानवताली आनी आतां ट्रंप स्वताच एकाधिकारशाह जाल्लेवरी वागपाक लागला. हारवर्ड सोंपोवपाक भायर सरला. किम आनी पुतिन हे चीनच्या शी जिनपिंगाचेय तितलेच खास. ह्या वेळा ट्रंपान एल साल्वादोराचे हुकुमशाह नायिब बुकेले वांगडा दोस्ती वाडयल्या. आपल्या शपथ समारंभाक बुकेलेक आमंत्रित केलो, मित्र मोदीक आपोवणें धाडलें ना. 

ट्रंपान 104 बेकायदेशीर स्थलांतरीत भारतीयांक हातांत पांयांत बेडयो बांदून लश्करी विमानान चाळीस वरांच्या प्रवासाचेर भारतांत धाडले. लॅटीन देश, म्यानमार आनी वियतनामच्या प्रवाशांक जांकां एल साल्वादोर आनी सुदानच्या बंदखणींत धाडल्यात, थंय तांची बंदखणींतल्यान सुटका जावप कुस्तार. तांचो शेवटूय थंयच जावपाचो. योग्य न्यायीक प्रकियेविणें आनी न्यायालयांच्या आदेशांची ‘अनदेखी’ करत अमेरिकेंतल्या बेकायदेशीर स्थलांतरितांक अमानवी, अतिरेकी क्रूरपणान देशा भायर धाडप ही ट्रंपाची अतिरेकी कृती म्हणूं येता.

पुतिनान विनाकारण युक्रेन आड 2014  सावन चलयिल्ल्या युद्ध मोहिमेंत 7 लाख रशियन सैनिकांची जीण कारण नासतना सोंपयली. पुतिन हो ट्रंपाचो इश्ट खरो, पूण शी जिनपिंगाचो परम इश्ट. हमास विरोधांत केल्ले कारवायेंत नेतनयाहून 53,000 मारले, तातूंत बायलो, भुरगीं, दोतोर, हॉस्पिटल कर्मचारी आनी संयुक्त राश्ट्र संस्थे खातीर वावुरप्यांचो आस्पाव आसा, जांचो हमास आनी आतंका वांगडा कसलोच संबद ना. हो ट्रंपाचो इश्ट नेतनयाहूचो आतंकवाद. त्याच आतंकवादी हमासाक आनी इतर इस्लामी आतंकवाद्यांक अर्थीक मजत दिवपी आतंकवाद्यांचो गॉडफादर कतरचे एमीर तमिम बीन हमद अल- थनी हांचे कडल्यान $ 40 कोटींचे बोइंग 747 जेट स्विकारून ट्रंपान ताचेय नांव आपल्या इश्टांच्या वळेरींत जोडलां. शिवाय हालींच्या आखाती भेटींत ट्रंप आदलो अल कायदा शाखेचो प्रमुख आनी सिरियाचो तथाकथित  अध्यक्ष अहमद अल-शाराची तोखणाय करतना दिसलो.   

सौदी राजकुमार मोहम्मद बीन सलमान ट्रंप आनी शी जिनपींग दोगांकूय लागीचो. आपल्या सत्तेच्या मार्गांत येवपी सोयऱ्यां आड ताणें अर्थीक गुन्यांवांचे, भ्रश्टाचाराचे आरोप लावन तांकां बंदखणींत धाडल्यात. कांय जाणांक सोंपयल्यात. ताणें आपलो राजकी विरोधक मूळ सौदी अमेरिकन नागरिक पत्रकार  जमाल खाशोगीक तुर्कींयेत 15 मारेकरी धाडून सौदी दुतावासांत मारून उडयला. हो मोहम्मद बीन सलमनाचो आतंकवाद. खाशोगी खून प्रकरण तुर्कीयेच्या प्रशासनाचो सहकार आनी राश्ट्राध्यक्ष एर्दवान हांच्या आशिर्वादा शिवाय जावप शक्य नाशिल्लें. अमेरिकेच्या कोर्टान बीन सलमानाक दोशी थारायिल्लो. गेल्ले सप्तकांत ट्रंप सौदींत ताका भेट दिवपाक गेल्लो तेन्ना सलमानान ताका उर्बेभरीत येवकार दिवन वेंग मारली. तुर्कीयेच्या एर्दवानान हाली आपलो राजकी प्रतिस्पर्धी इस्तंबूलच्या मेयराक बंदखणीत धाडलो. राजकी विरोधक आनी आंदोलनकारींचेर तुर्कियेंत अत्याचार वाडल्यात. देशांत दडपशाही, आतंक पातळावपी तुर्कीयेचो एर्दवान अमेरिकेक आनी ट्रंपाक मानवता. अमेरिकेन पाकिस्तानाक दिल्ली F-16 जेटांची दुरूस्ती आनी रखरखाव तुर्कीयेंत जाता. तुर्कीयेचे चीना वांगडाय बरे अर्थीक आनी राजकी संबद आसात. ट्रंप राजवटींत अमेरिका आयज एकाधिकारशाही जाल्ली आसा खरी, पूण इतिहासांत लोकशाय आसतनाय सद्दाम हुसेन (इराक), पार्क चुंग ही (द. कोरिया), फुल्जेनसिओ बातिस्त (क्युबा), होस्नी मुबारक (इजिप्त), फर्डिनंड मार्कोस (फिलिपिन्स) आनी इराणचो शाह ह्या हुकुमशाहांक तेंको दिताली.  

सुरक्षा काँट्रेक्टर अर्थांत मर्सिनरीज अर्थांत भाडोत्री मारेकरी वापरपाचेर 1989  सावन आंतरराश्ट्रीय परिशदेंत बंदी घाल्या, तरीय अमेरिका, ऱशिया, चीन, पाकिस्तान, इराण सारकिल्ले देश बेकायदेशिरपणान झुजांत भाडोत्री मारेकरी वापरत आयल्यात. ते देशाचे गणवेशधारी सैनिक नाशिल्ले कारणान जिनेवा अधिवेशनान घालून दिल्ले झुजाचे नेम ते पाळिनासतना निश्पाप लोकांचे अपहरण करप, तांका यातना दिवप, मारून उडोवप, बायलांचो लैंगिक छळ करप सारकिल्ले गुन्यांव करूनय खास्त जायनासतना सुटतात. इराकांत अमेरिकनांनी ‘ब्लॅक वाटर’ काँट्रेक्टर मारेकरी पंगड वापरिल्ले. तांची संख्या अमेरिकन सैनिकां इतलीच म्हणल्यार देड लाखांच्या आसपास आशिल्ली. तांणी बगदादच्या चौकांत केल्ल्या हल्ल्यांत 20  नागरिक जखमी जाल्ले, 17 सोंपिल्ले. दोशी थारायिल्ल्या मारेकऱ्यांक ट्रंपान डिसेंबर 2020 वर्सा माफी दिल्ली. हो अमेरिकेच्या आतंकवादाचो नमुनो. 

युक्रेन झुजांत रशिया वागनर ग्रुपाचे मारेकरी वापरत आयला. तांणी किएव लागीं धरिल्ल्या युक्रेनी सैनिकांचो शारिरीक छळ करून तांकां मारून उडयले असो आरोप लागिल्लो. वेळार पगार दिवंक नाशिल्ल्यान रागार जाल्ले वागनर सैनिक मास्को शारालागीं हल्लो चडोवपाक पाविल्ले. पुतिनान तेन्ना समेट केलो खरो, पूण उपरांत तांचो मुखेली येवगेनी प्रिगोझ्झीन आनी कमांडर दिमित्री उतकीन हांका विमान स्फोट घडोवन मारून उडयिल्ले. पुतिनाच्या आतंकवादाचो आनीक एक नमुनो. शी जिनपींगाच्या चीनांत तांचे विरोधक राजकारणी, पत्रकार, लेखक, प्रकाशक, उद्देगपती गायब जाल्ले आसतात तांचो हिशेब मेळप कुस्तार. चीनचो आदलो अध्यक्ष हू जिन ताओ सोडून बाकी आदले अध्यक्ष आयज जीते ना. 2022 ऑक्टोबरांत जिनपिंगान कम्युनिश्ट पक्षाच्या अधिवेशनांतल्यान सुरक्षा कर्मिक हू जिन ताओ हाका उबारून भायर व्हरपाचे आदेश दिल्ले. कसलोच  विरोध शी जिनपिंग खपोवन घेना.     

आतंकवाद विरोध आनी ताच्या शून्य सहनशिलतेची – झीरो टॉलरन्स- भूमिका गेल्ली  11 वर्सां 72 देशांक 151 मायत दिल्ल्या भेटींत मोदी मांडत आयल्यात. चीनाक पाच, जर्मनीक स, जपानाक सात आनी अमेरिकेक धा फावट भेटी दिल्यात. विदेश मंत्री जयशंकरानूय आपले भेटींत आमची भुमिका स्पश्ट केल्ली आसा. ह्या भेटींचेर हजारो कोटींचो दुडू खर्च जाला. देशान पहलगाम आतंकवादी हल्ल्या उपरांत ऑपरेशन सिंदूरांतल्यान पाकिस्तानाक आनी जगाक दिल्लो संदेश आयच्या प्रगत, विकसित म्हायती तंत्रज्ञानाच्या युगांत पाच मिनटांत जगाच्या सगळ्या कोनशांनी पावलो आसतलो तरी खंयच्याय देशान आमच्या आतंकवादा आड लढ्याक खंबीरपणान प्रतिसाद दिल्लो दिसलो ना. आतंकवादाच्या बाबतींत झिरो टॉलरन्स भूमिका आमी ब्रीक्स, क्वाड आनी इतर जागतिक शिखर परिशदांनी, बसकांनी मांडत आयल्यात. परत एकदा तोच संदेश दिवपा निमतान सात सांसदाच्या मुखेलपणा खाला 59 सभासदांचे प्रतिनिधी मंडळ तीस देशांत धाडपाची ‘खर्चीक मोहीमे’ची गरज कित्याक पडची ते कळना. ते तरी वेगळें अशें कितें सांगतले? 

संयुक्त राश्ट्र संस्थेची प्रासंगिकता तशी सोंपिल्ल्यात जमा. नरसंहार विरोधांत, झुजबंदीचे बाजून बसकांत बहुमतान घेतिल्ले निर्णय हट्टाक पेटिल्ले पुतिन आनी नेतनयाहू सारकिल्ले पाळपाच्या मूडांत दिसनात. रशिया, इझ्रायल विरूद्ध सुरक्षा, अर्थीक निर्बंध घाले जाल्यार तांची इश्ट राश्ट्रां तांचे वटेन उबे रावन ते निरस्त करतात. 

तीच परिस्थिती आंतरराश्ट्रीय न्यायलयाचीय जाल्या. पुतिन आनी नेतनयाहूक न्यायालयान वंशिक हत्येचे दोशी थारावन तांचेआड अटके खातीर वारंटां जारी केल्यांत. विदेशांत गेले जाल्यार तांकां अटक जावपाक शकता. ट्रंपान नेतनयाहूक अमेरिकेक येवपाचे आमंत्रण दिल्लें. तो अमेरिकेक पावचे एक दीस आदीच ट्रंपान न्यायालयाचेर आरोप लावन निर्बंध घाल्ले कारणान वारंट निरर्थक जाले. ट्रंप, पुतिन, शी जिनपिंग सारकेल्या एकाधिकारशहांनी जागतिक संस्थांची पत देवयल्या. ह्या संस्थानी घेतिल्ले चडशे निर्णय अंमलांत येवप कुस्तार जालां. 

पाकिस्तान आतंकवाद्यांक अर्थीक मजत, बळगें दिता ते जगांतल्या सगळ्या देशांक आनी संयुक्त राश्ट्रांक खबर आसा. आमच्या ऑपरेशन सिंदूराचे मजगतीं चीन पाकिस्तानाच्या संप्रभूतेचें संरक्षण करपा खातीर सक्षमपणान तांचे वटेन उबो दिसलो. झुजाच्या काळांत आंतरराश्ट्रीय मुद्रा कोशान पाकिस्तानाक $ 2.40  अब्ज रिण संमत केले. ज्या देशांत आमचे प्रतिनिधी भेट दिवपाचे आसात, तांतूतल्या कोणेंच पाकिस्तान आतंकवादाक बळगें दिवपी देश म्हूण विरोध दाखयलो ना. वित्तमंत्री निर्मला सितारमणान मुद्रा कोश मुखेली क्रिस्तालिना जॉर्जिवा आनी युरोपीयन वित्तमंत्र्यांक आमचो आक्षेप कळयिल्लो, पूण तांणी मनार घेतलें ना अशें दिसता. तेन्ना इतर देशांक, जागतिक संस्थाक, युरोपियन संघाक आमच्या प्रतिनिधी मंडळांनी भेट दिवन वेगळें कितें अशें साध्य जातलें. आमी ऑपरेशन सिंदूराची म्हायती दिवपाक अफगाणिस्तानांत दूत धाडलो. गेल्या सप्तकांत अफगाणिस्तान, पाकिस्तान आनी चीनान नव्या प्रकल्पांचे करार केल्यात. रशिया, ब्राझील, दक्षीण आफ्रिका, इजिप्त, इथिओपिया, इराण, मलेशिया, थायलंड, मालदिव्स, बांगला देश, कुवेत, तुर्किये हे चीनाच्या वटेन झुकिल्ले दिसतात. आतंकवाद्यांक आलाशिरो, अर्थीक मजत, प्रशिक्षण दिवपी देश अशी पाकिस्तानचें नांव घेवन निंदा केल्ली दिसली ना. हमास हल्ल्या उपरांत मोदी इस्रायलाच्या वटेन उबे दिसले. ऑपरेशन सिंदूराचे वेळार नेतनयाहून मोनेळ पांगुरले. 2021 वर्सा आमी ‘ब्रीक्स’ परिशदेची यजमानकी केली तेन्ना संयुक्त पत्रकांत “उपखंडांत पाकिस्तान आतंकवाद्याक उर्बा दिता” असो उल्लेख केल्लो ताका शी जिनपिंगान आक्षेप घेतलो आनी पुतिनूय ताचे वटेन दिसलो. दबावा खाला यजमान भारताक पाकिस्तानचो उल्लेख खोडून उडोवचो पडलो. प्रतिनिधी मंडळाच्या भेटी उपरांत ते 30 देश फुडारांत पाकिस्तानाक दूशण दीत आमचे वटेन उबे दिसतले अशी अपेक्षा धरप ही मुत्सद्देगिरींतली अपरिपक्वता म्हणपाची.

दीपक लाड

पर्वरी