भांगरभूंय | प्रतिनिधी
भांगरभूंय । प्रतिनिधी
मडगांवः सां जुझे दी एरियालच्या उद्देगीक वसणुकेंतलो सीहाथ व्हो फीश मील प्रकल्प बंद करपाचो आदेश गोंय प्रदूशण नियंत्रण मंडळान दिला. ह्या प्रकल्पांतलें घाणयारें उदक शेतांत सोडटात आनी थंयच्यान तें व्हाळांत वता अशें दिसून आयलां. उदकाच्या नमुन्याच्या तपासणेचो अहवाल आयल्या उपरांत मंडळान ही कारवाय करून कंपनीक 30 जून मरेन घाणयाऱ्या उदका संबंदीचो कृती अहवाल सादर करपाक सांगलां.
सां जुझे एरियल वाठारांत पोर्तुगीज इरा ह्या साकवा कडल्यान व्हाळांतलें उदक काळें जाल्ल्यान ग्रामस्थांनी सीहाथ प्रकल्पाची प्रदूशण नियंत्रण मंडळा कडेन कागाळ केल्ली. मंडळान केल्ले पळोवणेंत कंपनीतलें उदक व्हाळांत सोडटात अशें दिसून आयलें. फीश मिलांतल्या घाणयाऱ्या उदकाक लागून व्हाळांतलें तसेंच उदकाचे हेर स्रोत प्रदूशीत जातात ही गजाल लोकांनी मंडळाचे नदरेक हाडून दिल्ली.
फाटल्या बुधवारा प्रदूशण नियंत्रण मंडळाच्या अधिकाऱ्यांनी सां जुझे दी एरियल पंचायत मंडळाच्या उपस्थितींत शेत, आनी व्हाळांतलें उदकाचे नमूने घेतिल्ले. कंपनीतल्या घाणयाऱ्या उदकाक लागून व्हाळांतलें उदक दुशीत जाल्ल्याचें तपासा उपरांत सामकार आयलें. वेळ्ळीचो आमदार क्रुज सिल्वा हाणेय प्रदूशणाची दखल घेवन कंपनीचेर कारवाय करपाची मागणी केल्ली.
बिरेस्तारा प्रदूशण नियंत्रण मंडळान फीश मील प्रकल्प बंद करपाचो आदेश दिलो. तांकां कंपनीच्या जमनीपोंदच्या पायपलायनींतल्यान घाणयारें उदक सोडपाक मनाय केल्या. उदकाचे स्रोत प्रदूशण मुक्त करपा खातीर कृती अहवाल 30 जूनाक मंडळाच्या वागडी सचिवाच्या कार्यालयाक सादर करपाक कंपनीक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
