भांगरभूंय | प्रतिनिधी
कोंकणी भाशा मंडळाची मुख्यमंत्री, शिक्षण खात्या कडेन मागणी
मडगांव, प्रतिनिधी ः राज्यांतल्या कांय वाठारांनी इंग्लिश माध्यमांतल्यान मुळाव्यो शाळा सुरू करपाचे यत्न सुरू जाल्यात. आवयभाशेक प्राधान्य दिवपाचो हेतू मतींत दवरून सरकारान खंयचेच नवे इंग्लीश शाळेक परवानगी दिवची न्हय अशी मागणी कोंकणी भाशा मंडळान मुख्यमंत्री आनी शिक्षण खात्या कडेन केल्या.
भाशा मंडळान मुख्यमंत्री डॉ. प्रमोद सावंत हांकां ते विशीं पत्र बरयलां. राज्यांतल्या एका शाळेन मुळाव्या इंग्लिश शाळे खातीर हरकत ना प्रमाणपत्राची मागणी केल्या अशें भाशा मंडळाचे नदरेक आयलां. हाचीय प्रत शिक्षण सचीव आनी शिक्षण संचालकाक धाडल्या.
आवयभाशेंतल्या शिक्षणाक गोंय सरकारान प्राधान्य दिल्लें आसतना इंग्लीश मुळाव्या शाळांक परवानगी दिवपाचे यत्न राज्यांतल्या शिक्षणाक घातक थारूंक शकतात. प्राथमीक शिक्षण फकत आवयभाशेंतल्यान जावंक जाय असो उल्लेख नव्या शिक्षण धोरणांत आयला. संवसारीक पांवड्यावेल्या शिक्षकांनी तशेंच बाल शिक्षण आनी बाल मानसशास्त्रांतल्या तज्ञांनी भुरग्याचें मुळावें शिक्षण तांचे आवयभाशेंतल्यान जावंक जाय असो सिद्धांत मांडला.
नव्या इंग्लीश माध्यमांतल्या शाळांक परवानगी दिवचें नात अशी भुमिका सरकारान घेतल्या. गोंय मुक्ती उपरांत केंद्र सरकारान स्थापन केल्ल्या झा आयोगा सावन ते कांय वर्सां आदीं गोंय सरकारान स्थापन केल्ली माधव कामत समिती आनी भास्कर नायक समिती मेरेन ‘आवयभास हें मुळावे माध्यम आसचें’ असो आग्रो अहवालात धरला. तेन्नाचे मुख्यमंत्री मनोहर पर्रीकार हांणी माध्यम धोरण जाहीर करतना फुडाराक इंग्लीश माध्यमांतल्या मुळाव्या शाळांक राज्यांत परवानगी दिवचे नात हें स्पश्ट केल्ले.
इंग्लीश माध्यमांतल्यान शाळांक परवानगी दिल्यार ह्या शाळांनी शिकपी भुरग्यांच्या मानसीक, भावनीक आनी बौद्धीक उदरगतींत आडमेळीं येवंक शकतात. हें गोंयच्या आनी देशाच्या फुडारा खातीर धोक्याचें आसा. गोंयची राजभास कोंकणी. नव्या इंग्लीश शाळांक परवानगी दिल्यार गोंयांतल्या हेर भारतीय भास शाळांचेर वायट परिणाम जावंक शकता. देखून चड कोंकणी शाळा सुरू करप आनी सध्याच्या कोंकणी शाळांक फावो ती मजत करप हें गोंय सरकाराचें धोरण आसूंक जाय. देखून खंयच्याय प्रस्तावीत इंग्लीश माध्यमांतल्या मुळाव्या शाळांक परवानगी दिवपाक मंडळ विरोध करता. इंग्लीश शाळा सुरू करपा खातीर सरकारान कसलीच पावलां उबारची न्हय अशी मागणी भाशा मंडळाची अध्यक्ष अन्वेषा सिंगबाळ हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
