भांगरभूंय | प्रतिनिधी
दोन तृतियांश खासदारां वांगडा भाजपांत प्रवेश
नवी दिल्ली: राघव चड्ढा हांणी आप सोडपाचो निर्णय जाहीर केला. दिल्लींत पत्रकार परिशदेंत तांणी सांगलें, पक्षाच्या दोन तृतियांश खासदारां वांगडा आपूण भाजपांत वतां. संदीप पाठक आनी अशोक मित्तल हांचे वांगडा जाल्ले पत्रकार परिशदेंत आपचो खासदार राघव चड्ढा हांणी म्हणलें, राज्यसभेंतल्या आप वांगड्यांतले दोन तृतियांश आमी भारतीय संविधानांतल्या तरतुदींचो वापर करून भाजपांत विलीन जावपाचें थारायलां.
मुखार ताणें म्हणलें, हांवें म्हज्या रगत आनी घामान वाडयलो आनी म्हज्या तरणाट्यापणाचीं १५ वर्सां समर्पित केल्लीं आप आतां आपल्या तत्वां पासून, मुल्यां पासून आनी मुळाव्या नीती पासून पयस गेला. हो पक्ष आतां देशाच्या बर्या खातीर न्हय, तर वैयक्तीक फायद्या खातीर वावुरता. फाटल्या कांय वर्सां सावन म्हाका दिसलें की हांव चुकीच्या पक्षांतलो योग्य मनीस म्हूण. देखून आयज हांव आप पासून वेगळो जावन जनतेच्या आनीक लागीं वतलों.
आपान राघव चड्ढाक उप फुडार्याच्या पदा वयल्यान काडलो
२ एप्रीलाक आपान राघव चड्ढा हांकां पक्षाच्या राज्यसभा खासदारांच्या उपफुडार्याच्या पदा वयल्यान काडून उडयलो. हे संबंदी राज्यसभा सचिवालयाक पत्र सादर केल्लें, तातूंत पक्षाच्या कोटा वयल्यान तांकां उलोवपाचो वेळ दिवचो न्हय अशें सांगिल्लें. फागवारा हांगाच्या लव्हली प्रोफेशनल युनिव्हर्सिटीचे (एलपीयू) कुलगुरू अशोक मित्तलाक उपमुखेली म्हणून आप हांणी नेमणूक केली. राघव २०२२ वर्सा सावन पंजाबांतल्यान आपाचे राज्यसभेचे खासदार आसात. ताचो कार्यकाळ २०२८ वर्सा सोंपता
#RaghavChadda #Aap #BJP #EnteredBJP #AamAadmiParty
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
