भांगरभूंय | प्रतिनिधी
कमलाकर हळर्णकारान 700 रुपयांची घेतिल्ली लांच
पणजी: पेडणें वाठारांत फोटू स्टुडियो सुरू करपा खातीर ‘हरकत ना’ दाखलो दिवपा खातीर तेन्नाचे पेडणेंचे मुख्याधिकारी कमलाकर हळर्णकार हाणें 700 रुपयांची लांच घेतिल्ली. ह्या प्रकरणांत उत्तर गोंय जिल्हो आनी सत्र न्यायालयान दुबावीत कमलाकर हळर्णकारा आड आरोप निश्चीत करपाचो आदेश जारी केल्लो.
ह्या प्रकरणांत महेश पेडणेंकार हांणी दक्षता खात्याच्या भ्रश्टाचार विरोधी पंगडा कडेन कागाळ दाखल केल्ली. ते प्रमाण पेडणेंकार हांणी फोटू स्टुडियो सुरू करपा खातीर पेडणें पालिकेंत अर्ज दिवन ‘हरकत ना’ दाखलो मागिल्लो. पेडणेंकार ह्या दाखल्या खातीर फावटी मारताले. तेन्नाचो क्लार्क मदन शेणवी देसायान मुख्याधिकाऱ्याचे सये खातीर दाखलो प्रलंबीत आशिल्ल्याचें सांगिल्लें.
14 मार्च 2013 दिसा क्लार्क देसाय हाणें पेडणेंकार हांकां फोन करून दाखलो तयार आशिल्ल्याचें सांगलें. दाखलो घेतना मुख्याधिकाऱ्याक च्याये खातीर 300 रुपया दिवपाची सुचोवणी केली. थारिल्ले प्रमाण 15 मार्च दिसा दाखलो घेवपा खातीर पेडणेंकार गेले. तांणी तेन्नाचे मुख्याधिकारी कमलाकार हळर्णकार हांकां 300 रुपया दिले. त्या वेळार हळर्णकारान ‘300 रुपयांत कितें जाता? इतली जबाबदारी हांव घेतां’ अशें म्हणून 1000 रुपयांची मागणी केली. पेडणेंकार हांचे कडेन फक्त 700 रुपया आशिल्ले. ते तांणी हळर्णकाराक दिले. ही घडणूक पेडणेंकार हांणी मोबायलाचेर रिकॉर्ड केली. पेडणेंकार हांणी पुराव्यां सयत भ्रश्टाचार विरोधी पंगडा कडेन कागाळ दाखल केली.
पंगडाचे तेन्नाचे निरिक्षक राजन निगळे हांणी मुळावे चवकशी उपरांत तेन्नाचो मुख्याधिकारी कमलाकर हळर्णकारा सयत क्लार्क मदन शेणवी देसाय हांचे आड गुन्यांव दाखल केलो.
मजगतीं, मदन शेणवी देसाय माफीचो साक्षिदार जालो. न्यायालयान हळर्णकारा आड प्रथमदर्शनी पुरावे आशिल्ल्याचें निरिक्षण नोंद करून आरोप निश्चीत करपाचो आदेश जारी केला.
रिकॉर्ड केल्लो आवाज हळर्णकाराचो
23 जून 2015 दिसा हळर्णकाराच्या आवाजाचे नमुने तपासणे खातीर चंदिगडांतल्या न्यायवैजक प्रयोगशाळेंत धाडले. 29 जुलय 2016 दिसा आयिल्ल्या अहवालांतल्यान रिकॉर्ड केल्लो आवाज हळर्णकाराचोच आशिल्ल्याचें स्पश्ट जालें. उपरांत पंगडान न्यायालयांत आरोपपत्र दाखल केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
