भांगरभूंय | प्रतिनिधी
दुबाविताक 10 वरां भितर अटक; सोऱ्याचे घुंवळेंत जाल्लो वाद
मडगांवः मडगांवां उड्डाण पुला लागसार शेनवारा सकाळीं रविराज हॉटेला कुशीक पार्क केल्ल्या म्हाल व्हरपी जिपींत एका अनवळखी मनशाची कूड सांपडली. ती कूड भिकारी वा कामगाराची आसूं येता, असो मुळावो अदमास आशिल्लो. पूण मडगांव पुलिसांनी 10 वरां भितर खुनाचो तपास करून प्रकाश बर्ना (26) ह्या दुबाविताक अटक केली.
दक्षीण गोंय पुलीस अधिक्षक अभिषेक धानिया हांणी दिल्ले म्हायती प्रमाण खून जाल्ल्या मनशाचें नांव अमीत किरकेट्टी (32). तो आनी ताचो सांगाती प्रकाश बर्ना हे दोगूय मूळ झारखंडांतले. ते मडगांवां हमालीचें काम करताले. उड्डाण पुला लागसार खारेबादार ते एका घरांत वांगडा रावताले. शुक्रारा सोऱ्याचे घुंवळेंत तांचे मदीं वाद जालो आनी दुबावी प्रकाशान अमिताच्या पोटांत चाकू तोंपून ताचो खून खेलो. सुरवेक अमितान आपल्याक मारपेट करपाक सुरवात केल्ल्यान आपणे ताच्या पोटांत चाकू तोंपलो, अशें दुबावितान पुलिसांक सांगलें.
सीसीटीव्ही कॅमेरांत एक तरणाटोे जखमी अवस्थेंत चलत हॉटेला कडेन येता, अशी फुटेज पुलिसांक मेळिल्ली. ताका लागून तो दुसरे सुवाते वयल्यान आयला आनी म्हाल व्हरपी जिपींत आलाशिऱ्याक बसला आसूं येता, असो दुबाव पुलिसांक आशिल्लो. धारेच्या शस्त्रान वार केल्ल्याचे घाय आशिल्ल्यान पुलिसांनी खुनाचे दिशेन तपास सुरू केल्लो, अशें पुलीस अधिक्षक धानिया हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
