भांगरभूंय | प्रतिनिधी
अनैतीक संबंदांत येतालो आडसर
कूड उडयली चोर्ला घांटांत; चौगांक अटक
बेळगांव: वासनेचे भकीक पडिल्ले एके बायलेन अनैतीक संबंदांत आडसर थारिल्ल्या घोवाचो मोग्या सयत ताच्या इश्टांच्या सांगातान खून केल्ल्यान खवदळ पडला. ही घडणूक बेळगांवां घडली. एपीएमसी पुलिसांनी चौगांक अटक केल्या. रमेश कांबळे (38, रा. आंबेडकरनगर) अशें दुर्दैवी घोवाचें नांव आसा.
रमेश हो वेवसायान पेंटर आसून 28 मार्चा सावन अचकीत बेपत्ता जाल्लो. ताचे घरकान्नीन (संध्या) एपीएमसी पुलीस स्टेशनार 5 जून दिसा तशी कागाळ दाखल केल्ली. पुलिसांनी गुन्यांव दाखल करून तपास सुरू केलो तेन्ना बायलेनूच ताचो कांटो काडिल्ल्याचें मुखार आयलें.
पुलिसांनी दिल्ले म्हायती प्रमाण, बाळू बिरंजे हाचें रमेशाचे बायले कडेन अनैतीक संबंद आशिल्ले. बायल संध्यान तपास करपी पुलिसांक सांगलें की, तिचो घोव एके बायले सयत पळून गेल्लो. उपरांत पुलिसांक दुबाव आयलो आनी तांणी रमेशाची बायल संध्या आनी रमेशाच्या इश्टांची आपले तरेन चवकशी केली तेन्ना रमेशाचे बायलेन आनी इश्टांनीच ही हत्या केल्ल्याचें कबूल केलें.
दुबावीत आरोपींनी खून करून कूड गोंयांत येवन चोर्ला घांटांत उडयली. रमेशाचे बायलेनूय कबूल केलें की, तिणें प्रियकर बाळू सयत ताच्या इश्टांचे मजतीन घोवाची हत्या करून कूड गोंयांतल्या चोर्ला घांटांत उडयली.
रमेशाक न्हिदेच्यो गुळयो दिल्यो आनी उपरांत गळो अंदून खून केल्ल्याचें चवकशी वेळार सांगलें. बेळगांवच्या एपीएमसी पुलिसांनी ह्या प्रकरणांत चार दुबावीत आरोपींक अटक केल्या. रमेशाच्या कुडीचो सोद सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
