भांगरभूंय | प्रतिनिधी
चिंबलांतल्या 8 जाणांक अटक आनी सुटका
पणजी: रॉबर्ट पुलीस आनी गायड हांचे मदली बाचाबाची आडावपा खातीर गेल्ल्या नागरिकाक मारपेट केली. त्या वेळार ह्या वादाचो परिणाम धर्मीक तणावांत जावन कायदो आनी सुवेवस्था इबाडपाची शक्यताय निर्माण जाल्ल्यान पणजी पुलिसांनी चिंबलांतल्या आठ जाणांक प्रतिबंधक अटक करून उपरांत तांची सुटका केली.
पणजी पुलिसांनी दिल्ले म्हायती प्रमाण पणजेंतल्या भोवमजली पार्कींग इमारती कुशीक बिरेस्तारा सांजवेळा येरादारीची कोंयडी जाल्ल्याची म्हायती लोकांनी पुलीस यंत्रणेच्या कक्षाक दिल्ली. ते प्रमाण कक्षान वयली म्हायती रॉबर्ट वाहनांक दिली. म्हायतीची दखल घेवन रॉबर्ट एक वाहन घेवन पुलीस ते सुवातेर गेल्ले. त्या वेळार थंय आठ जाण मदींच वचून येरादारी आडायत आशिल्ल्याचें तांचे नदरेक आयले. त्या वेळार पुलिसांनी तांकां थंयच्यान वचपाक सांगलें.
ह्याच वेळार पुलीस आनी तांची बाचाबाची जाली. ह्याच वेळार एका नागरिकान मध्यस्ती करून येरादारीची कोंयडी जाल्ल्यान लोकांक त्रास जायत आशिल्ल्याचें सांगून वचपाक सांगलें. त्या वेळार ताका धक्काबुक्की केली. उपरांत त्या सगल्यांक पुलिसांनी पुलीस स्टेशनार हाडले तेन्ना त्या नागरिकांचें आनी त्या आठ जाणांचें समर्थक पुलीस स्टेशनार एकठांय जालें.
मजगतीं, आपल्याक मारपेट केल्ल्याची कागाळ मेरशीचे विद्याधर देश भंडारी हांणी आठ जाणां आड दिली. तशेंच कागाळदार आनी दुबावीत एकाच वाठारांतले आनी विरुद्ध धर्माचे आशिल्ल्यान कायदो आनी सुवेवस्था इबाडपाची शक्यताय आशिल्ल्याचें मुखार आयले उपरांत पुलिसांनी कारवाय करून आठ जाणांक प्रतिबंधक अटक केली. तातूंत चिंबलाचे मंजूर साऊ अब्दुल रज्जाक (20), मेहबूब फारूक शेख (23), अब्दुल कादर नसूल (31), मोहम्मद इस्मायल हळडेवाले (26), अत्तर इस्मायल हळडेवाले (23), उमरान बेटकर (29), जावेद शिनूर (28) आनी अब्दुल हळडेवाले (25) ह्या आठ जाणांचो आस्पाव आसा.
प्रतिबंधक अटक केल्ले आठूय जाण गायडींग करीत आशिल्ल्याचें मुखार आयलें. उपरांत त्या आठ जाणांक उपजिल्होधिकारी हांचे मुखार हजर करून बऱ्या वर्तवणुकीचे हमीचेर सुटका केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
