भांगरभूंय | प्रतिनिधी
पेडणें, प्रतिनिधी ः पेडणें तालुक्यांतल्या चिरें खणींनी पावसाच्या दिसांनी कांय तरणाट्यांक बुडून मरण येवपाच्यो घडणुको वाडत आसात. पावसाच्या दिसांनी सगळ्यो चिरे खणी उदकान भरतात. त्यो चिरें खणी धनयानी बंद करपाक जाय. तशेंच चिरें खणींच्या भोंवतणी फातर वा लांकडी कुंपन घालून त्यो बंद करपाची उपाय येवजण करची, अशे आदेश उपजिल्होधिकारी पुलिसांनी संबंदीत चिरें खणींच्या धनयांक दिवचें, जाका लागून फुडाराक चिरें खणींनी बुडून कोणाकूच मरण येवचें ना. देखून हाचेर लक्ष दिवचें अशीं मागणी नागरीकांनी केल्या.
पेडणे तालुक्यांत जी उक्ती चिरें खणीं आसात. तातूंत तुयें, पार्से, सच्चे भेटले मांद्र्यां आनी आश्वें ह्या सुवातीनी आतां मेरेन बुडून मरण आयला. मरण आयिल्ल्या उपरांत लेगीत सरकारान हें विशीं कसलीच कारवाय करूंक ना. फाटल्या चार वर्सांत तुयेंच्या चिरें खणींत वट्ट चार विद्यार्थ्यांक बुडून मरण आयल्लें. ते उपरांत पार्सेंतल्या चिरें खणींत दोन तरणाट्यांक मरण आयल्लें. मांद्र्यां सुवातेर बुडून मरण आयला. हाचे भायर आश्वें चिरें खणींत जायत्या पर्यटकांक बुडून मरण आयला. उक्त्या चिरें खणींनी पावसाच्या दिसांनी व्हड प्रमाणांत उदक भरतात. चिखल जाता. ते खातीर उदकाचो अदमास येना. आनी अशो घडणूकी घडतात.
फाटल्या सप्तका सावन राज्यांत व्हड प्रमाणांत पावस पडलो. देखून मजा घेवपाक व्हड प्रमाणात तरणाटे तळीं, न्हंयों आनी चिरें खणींनी न्हावपाक गेले. उदकाचो अदमास येवंक नाशिल्ल्यान कांय जाणांक बुडून मरण आयले. सरकार दरेका भुरग्याचेर नदर दवरूंक शकना. देखून पालकांनी आपल्या भुरग्यांचेर नियंत्रण दवरप गरजेचें. उत्तर आनी दक्षीण गोंय जिल्होधिकाऱ्यानी आयतारा अशा सुवातेर वचपाचेर बंदी घालून अधिकारी आनी पुलीस निरिक्षकांक हाचेर नदर दवरपाची जापसालदारकी दिल्या. सरकारान घेतिल्ल्या निर्णयाक आमी येवकार दितात अशें मत मांद्र्यांचे सरपंच बाळा उर्फ प्रशांत नायक हांणी मांडलें.
सरकारान पुलीस यंत्रणे वरवीं शाळांनी वचून हे संबंदी प्रसार आनी प्रचार करचो. हे संबंदी गांवां-गांवांत जागृताय मोहीम चालीक लावची. जंय पेंवपाच्यो सुवाती आसात थंय लायफ गार्ड दवरपाक जाय. अशो घडणूकी घडच्यो न्हय म्हूण सरकारान जून, जुलय आनी ऑगस्ट ह्या तीन म्हयन्यां खातीर येवजण चालीक लावपा खातीर अर्थीक तजवीज करची. आनी फुडाराक अशो घडणुकी घडच्यो न्हय म्हूण एक पावल फुडें विचार करचो अशें ऍड. अमित सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
