भांगरभूंय | प्रतिनिधी
गुरुदास पिळर्णकारः शुल्क चुकोवप्यांचेर येतलो आळाबंद; दिवचल, म्हापश्यां काम सुरू
भांगरभूंय । गणेश जावडेकार
पणजी : पालिका वाठारांतलीं घरां, इमारती तशेंच हेर आस्थापनांचें जीआयएस सर्वेक्षण करपाची प्रक्रिया सुरू जाल्या. दिवचल आनी म्हापसा पालिकेत जीआयएस सर्वेक्षण सुरू जालां. हेर सगळ्या पालिकांनी जीआयएस सर्वेक्षण सुरू जातले, अशी म्हायती शार उदरगत खात्याचे संचालक गुरूदास पिळर्णकार हांणी दिली.
नागपूरच्या मेसर्स कोलब्रो ग्रुप प्रायव्हेट लिमिटेड हे एजन्सीक जीआयएस सर्वेक्षणाचें काम दिलां. पुराय उत्तर गोंयांतल्या पालिकांचे सर्वेक्षण करपाची जापसालदारी कोलब्रो ग्रुपा कडेन आसा. हे खातीर 8 कोटींची निविदा जारी जाल्या. दक्षीण गोंयांतल्या पालिकांचें जीआयएस सर्वेक्षण करपा खातीरची निविदा जारी जावपाची आसा. आनीक 6 म्हयन्यांनी जीआयएस सर्वेक्षणाचें काम पुराय करपाची मोख आसा.
पणजे जीआयएस सर्वेक्षण आतां सुरू जातलें. हे खातीरची नोटीस पणजे म्हापालिकेन जारी केल्या. कोलब्रो ग्रुप प्रायव्हेट लिमिटेड कंपनीचे अधिकारी घर तशेंच इमारतीक भेटी दितले. तांचे सयत पालिका निरिक्षक आसतले. जीआयएस सर्वेक्षणा खातीर गरजेची म्हायती ते विचारतले. लोकांनी म्हायती दिवन तांकां सहकार्य करचें, अशें म्हापालिकेन कळयलां.
पणजेचीं घरां, इमारती, हॉटेल्स, दुकानां तशेंच हेर आस्थापनांची नोंद ते घेतले.
दिवचल पालिका वाठारांत जीआयएस सर्वेक्षणाक सुरवात जावन म्हयनो जाला. म्हापशें पालिकेचें सर्वेक्षण हालींच सुरू जालां. पणजी म्हापालिकेचें सर्वेक्षण आतां सुरू जातलें. उत्तर गोंयांत पेडणें, म्हापशें, दिवचल, सांखळी, वाळपय ह्यो पालिका आसात. तशेंच पणजे म्हापालिका आसा. सगळ्या पालिकांचें जीआयएस सर्वेक्षण कोलब्रो ग्रुप प्रायव्हेट लिमिटेड कंपनी करतली.
मडगांव, कुंकळ्ळी, काणकोण, सांगें, केपें, कुडचडें- काकोडें, फोंडें आनी मुरगांव ह्यो पालिका दक्षीण गोंयांत येतात. दक्षीण गोंयांतल्या पालिकांचें जीआयएस सर्वेक्षण करपा खातीरची निविदा अजून जारी जावंक ना.
पालिका वाठारांत कितलीं घरां आसात, कितलीं आस्थापनां आसात, हॉटेलां कितलीं आसात, हाची सविस्तर म्हायती जीआयएस सर्वेक्षणा उपरांत मेळटली. परवानो घेतले उपरांत कांय जाण घराचो वा आस्थापनाची सुवात वाडयतात. शुल्क मात आदीं निश्चीत केल्ले प्रमाण भरतात. हातूंत पालिकेची येणावळ बुडटा. जीआयएस सर्वेक्षणा उपरांत शुल्काची येणावळ वाडटली. शुल्क उणें भरतात तांकां आळाबंद येतलो, अशें गुरूदास पिळर्णकार हांणी सांगलें.
जीआयएस पद्दत लावकारी
जियोग्राफीकल इन्फोर्मेशन सिस्टम (जीआयएस) हातूंत भुगोलीक म्हायतीची नोंद जाता. पालिकेचो नकसो तयार जावन तातूंत घरां, इमारती, आस्थापनांची नोंद जातली. घर नंबर काडलो काय ते घर नकाशाचेर पळोपाक मेळटले. सगळी भुगोलीक म्हायती संगणकाचेर नोंद आसतली. हाका लागून जीआयएस सर्वेक्षणा उपरांत संगणकाचेर घर वा इमारत पळोवप शक्य जातलें. बेकायदो बांधकामा वा बेकायदो आस्थापनांचो सोद घेवप सोपें जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
