भांगरभूंय | प्रतिनिधी
अॅडव्होकेट जनरल देविदास पांगम हांची खंडपिठातं म्हायती
पणजी: पर्वरे फ्लायओव्हराच्या बांदकाम प्रकल्पाक लागून जावपी येरादारीची कोंयडी, रस्तो सुरक्षा आनी हेर विशयाचे 60 ते 70 टक्के उपाय येवजण लागू केल्या. कांय कडेन रस्त्याचें हॉटमिक्स उरलां. तशेंच रस्त्या वेले दिशाफलक लावपाचें कांय कडेन उरलां. फुडल्या दोन दिसांत ते पुराय जातलें, अशी म्हायती अॅडव्होकेट जनरल देविदास पांगम हांणी मुंबय उच्च न्यायालयाच्या गोंय खंडपिठांत दिली. हाची दखल घेवन न्यायालयान फुडली सुनावणी सोमार 6 वेर दवरल्या.
ह्या प्रकरणांत वकील मोझेस पिंटो हांणी उच्च न्यायालयांत जनहीत याचिका दाखल केल्या. हातूंत तांणी पर्वरेच्या फ्लायओव्हर बांदकाम प्रकल्पाक लागून येरादारीची कोंयडी तशेंच नागरिकांची रस्तो सुरक्षा, तेच बरोबर आपत्कालीन सेवेंत आडखळ जायत आशिल्ल्याचो दावो केला. तशेंच राज्यांतल्या विवीध मार्गां वेल्या अपघाती मरणांचे संख्ये विशींय हुस्को उक्तायला.
हे विशीं अॅडव्होकेट जनरल देविदास पांगम हांणी संबंदीत खात्याच्या अधिकाऱ्यांची बसका घेवन उपाय येवजण करपाचें निर्देश दिल्ले. तातूंत तात्पुरतें रस्त्याचें हॉटमिक्स करप, येरादारीची कोंयडी जावची न्हय म्हूण येरादारी मार्शल दवरप, धल्ल प्रदुशण टाळपा खातीर रस्त्यार उदक मारप, आपत्कालीन सेवे खातीर दोन एम्बुलन्सी दवरप, तेच बरोबर हेर उपाय येवजण लागू करपा खातीर सांगिल्लें. ह्या संदर्भांत बिरेस्तारा न्यायालयांत सुनावणी जाली तेन्ना वयल्या उपाय येवजण्यां पैकीं 60 ते 70 टक्के लागू केल्ल्याची म्हायती अॅडव्होकेट जनरल देविदास पांगम हांणी दिली.
मजगतीं, उरिल्ली 30 टक्के उपाय येवजण चालीक लावपा खातीर कंत्राटदारान न्यायालया कडेन मुजत मागल्या. ते प्रमाण उच्च न्यायालयान फुडली सुनावणी सोमार 6 वेर दवरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
