परतून जाय एनडीए सरकार

भांगरभूंय | प्रतिनिधी

मुख्यमंत्री: वन नेशन, वन इलेक्शन, सीएए व्हरतले मुखार

भाजप, मगो, अपक्षांचें शक्तीप्रदर्शन; दोनूय उमेदवारांक वेंचून हाडपाचो निश्चेव

पणजी: ‘वन नेशन वन इलेक्शन’, महिला राजकी आरक्षण, सीएए अशे देश पांवड्या वेले म्हत्वाचे निर्णय मुखार व्हरपा खातीर देशांत परतून एनडीएचें सरकार जाय. ते खातीर गोंयच्या लोकांनी लोकसभा वेंचणुकेंत भाजपाच्या दोनूय उमेदवारांक वेंचून दिवचें अशें आवाहन मुख्यमंत्री डॉ. प्रमोद सावंत हांणी केलें.

एनडीएतले घटक पक्ष आनी अपक्षांनी मंगळारा पणजेंत घेतिल्ले पत्रकार परिशदेंत ते उलयताले. ह्या वेळार तांचे सयत भाजपा प्रदेशाध्यक्ष तशेंच राज्यसभा खासदार सदानंद शेट तानावडे, आदले खासदार विनय तेंडुलकार, मंत्री सुदिन ढवळीकार, रवी नायक, मगोचे अध्यक्ष दीपक ढवळीकार, अपक्ष आमदार आलेक्स रेजिनाल्ड, आंतोन वाझ, डॉ. चंद्रकांत शेट्ये आनी आमदार जीत आरोलकर हाजीर आशिल्ले.

केंद्रांत सत्तेर आयले उपरांत प्रधानमंत्री नरेंद्र मोदी हांच्या फुडारपणा खाला एनडीए सरकारान गोंयचे उदरगती खातीर कोट्यांनी रुपयांचो निधी दिलो. काँग्रेसीन 50 वर्सांच्या कार्यकाळांत गोंयचे उदरगती खातीर जितलो निधी दिवंक नाशिल्लो ताचे परस चड निधी एनडीए सरकारान दिलो. हाचे मुखारूय गोंयचे उदरगतीचो रथ कायम सुरू दवरपा खातीर केंद्रांत परतून एनडीए सरकार येवपाची गरज आसा. ताका लागून गोंयच्या लोकांनी लोकसभा वेंचणुकेंत भाजपाच्या दोनूय उमेदवारांक जैतिवंत करून मोदी हांचे हात घटमूट करपाची गरज आसा अशें मुख्यमंत्री डॉ. प्रमोद सावंत हांणी म्हणलें.

एनडीए आघाडींत वांटेकार जाल्ले राज्यांतले मगो पक्ष तशेंच अपक्ष आमदारांची मंगळारा बसका जाली. हे बसकेंत दोनूय मतदारसंघांतल्या उमेदवारांच्या फुडल्या काळांतल्या प्रचाराचेर चर्चा केली. ह्या वेळार दोनूय मतदारसंघांत एनडीएचे उमेदवार श्रीपाद नायक आनी पल्लवी धेंपो हांकां वेंचून हाडपाचो निश्चेव मगो पक्ष आनी अपक्ष उमेदवारांनी केला. तातूंत निश्चीतपणान येस मेळटलें अशेंय मुख्यमंत्री डॉ. प्रमोद सावंत हांणी म्हणलें.

म्हादय, कोळसो, खण बंदीचो विशय काँग्रेसीक लागूनच: सुदिन

मंत्री तशेंच मगोचे ज्येश्ठ फुडारी सुदिन ढवळीकार हांणी म्हणलें, काँग्रेस पक्ष विवीध प्रस्नां वेल्यान गोंयकारांची दिशाभूल करपाचो यत्न करता. म्हादय, रेल्वे मार्ग दोट्टीकरण, कोळसो ह्या सारके खूबशे प्रस्न राज्यांत काँग्रेसीच्या काळांत सुरू जाल्ले. आतां काँग्रेसीन त्याच प्रस्नांचो आस्पाव आपल्या जाहीरनाम्यांत केला. पूण गोंयकारांक खरी परिस्थिती खबर आसा. ताका लागून गोंयकार मतदार एनडीएच्या उमेदवारांकूच वेंचून दितले असो विस्वास तांणी उक्तायलो.

विरोधकांचे आरोप फटीचे

उक्तडार शौचमुक्त (ओडीएफ) तशेंच वीज, नळ जोडणी शंबर टक्के करपाक येसस्वी थारिल्लें गोंय देशांतलें पयलें राज्य आशिल्ल्याचो सरकाराचो दावो फटीचो आशिल्ल्याचो आरोप विरोधकां कडल्यान जायत आसा. विरोधकांच्या ह्या आरोपांत तथ्य आसा? अशें मुख्यमंत्र्यांक विचारलें तेन्ना राज्यांतल्या सगल्या पंचायतींनी ओडीएफ सयत नळ, वीज, जोडण्यो शंबर टक्के आशिल्ल्याचें प्रमाणपत्र सरकाराक दिले उपरांतूच तशी घोशणा केल्या. विरोधक हाचे वेल्यान फटीचे आरोप करीत आसा अशें तांणी स्पश्ट केलें.