भांगरभूंय | प्रतिनिधी
– सुमार 70 प्रकरणांत पुलीस अधिकाऱ्यांक धाडली अवमान नोटीस
पणजीः दुबावितांक अटक केले उपरांत पुलीस अधिकारी तांचे वांगडा फोटो काडून प्रसारमाध्यमांक धाडटात. हाचेर उच्च न्यायालयान तीन वर्सां पयलीं बंदी घातल्या. तरी लेगीत हे प्रकार चालू आशिल्ल्याचे निदर्शनाक आयले उपरांत उच्च न्यायालयान ‘स्वेच्छा दखल’ घेतल्या. अशे फोटो प्रसिद्धी खातीर धाडिल्ले प्रकरणांत सुमार 70 प्रकरणांत कांय पुलीस अधिकाऱ्यांक अवमान नोटीस धाडल्या. ही म्हायती अॅडव्होकेट जनरल (एजी) देविदास पांगम हांणी आमच्या प्रतिनिधी कडेन उलयतना दिली.
दुबाविताक अटक केले उपरांत ताचे वांगडा पुलीस अधिकारी फोटो काडून प्रसारमाध्यमांक धाडटात. ते फोटो दिसाळी आनी सोशल मिडियाचेर प्रसारीत जातात. हाचेर उच्च न्यायालयान सादारण 2 ते 3 वर्सां पयलीं बंदी घातिल्ली. ते उपरांत पुलीस खात्यान सगल्या अधिकाऱ्यांक परिपत्रक जारी केल्ले. अशें आसतनाय पुलीस अधिकारी फोटो काडून प्रसिद्धी खातीर धाडटात. हे फोटो दिसाळ्यांनी आनी सोशल मिडियाचेरूय प्रसिद्ध जातात. हाचीच ‘स्वेच्छा दखल’ घेवन उच्च न्यायालयान अवमान नोटीस धाडल्या. अशा प्रकारांत 70 प्रकरणां आनी फोटो उच्च न्यायालयाचे नदरेक आयल्यात. जे अधिकारी फोटवांत दिसतात, तांकां नोटीस धाडल्या. ह्या प्रकरणांत फुडली सुनावणी 15 एप्रील दिसा जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
