भांगरभूंय | प्रतिनिधी
म्हापशें: खडपावाडो- कुचेले म्हापश्यां सरकारान सगल्या धर्मा खातीर मसंडभुंये खातीर संपंदीत केल्ले सुवातेंत अतिक्रमण करून बेकायदो रितीन बांदिल्लें आनीक एक घर मोडून उडयलें. बार्देस उपजिल्होधिकारी कचेरे वतीन काल (बिरेस्तारा) ही कारवाय केली.
हे सरकारी सुवातेंतलीं 36 पैकीं 32 बेकायदो घरां फाटल्या 12 नोव्हेंबर 2024 दिसा प्रशासनान मातयेभरवण केल्लीं. जाल्यार हे कारवाये आड सिखा झा, राजेश झा, गिरीश नायक आनी तुळशीराम मुन्नीलाल हांणी मुंबय उच्च न्यायालयांत याचिका दाखल केल्ली. पूण न्यायालयान संबंदीत याचिकादारांक स सप्तकां भितर स्वता जावन घरां मोडचीं असो आदेश दिल्लो. ते प्रमाण संबंदितांनी न्यायालयांत हमीपत्रूय दिल्लें.
उपरांत चारां मदल्या तिगांनी घर मोडपा खातीर न्यायालया कडेन अजून मुजत मागिल्ली. जाल्यार एकल्याक दिल्ले मुजतींत बांदकाम मातयेभरवण करप शक्य जावंक नाशिल्ल्यान काल उपजिल्होधिकारी कचेरे वतीन हें घर जेसीबीच्या आदारान मोडून उडयलें.
मजगतीं, म्हापशें शार पिटी शीट क्रमांक 1, चलता क्रमांक 10/3 आनी पिटी शीट क्रमांक 2, चलता क्रमांक 11/1 ह्या जमनींत सुमार 30 हजार चौ.मि. सुवातेर अतिक्रमण करून वट्ट 36 घरां बेकायदो पद्दतीन बांदिल्लीं. ही जमीन सरकारान सगल्या धर्मां खातीर मसंडभुंये खातीर संपादीत केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
