भांगरभूंय | प्रतिनिधी
-दोन दिसां पयलीं धाडिल्ली 1823 कोटींची नोटीस, वट्ट 3567 कोटींची थकबाकी
नवी दिल्लीः आयकर विभागान काँग्रेसीक नवी नोटीस धाडल्या. हातूंत 2014 ते 2017 मेरेन 1,745 कोटी रुपयांची कर मागणी केल्या. ह्या नव्या नोटिसेक लागून काँग्रेसची वट्ट कर मागणी 3,567 काेटी रुपयांचेर पावल्या.
2014-15 खातीर 63 कोटी, 2015-16 खातीर 664 कोटी रुपया अानी 2016-17 खातीर 417 कोटी रुपयांच्यो टॅक्स नोटिसो काँग्रेसीक धाडल्यात. आयटी विभागान राजकी पक्षांक दिल्ली कर सवलत रद्द केल्या आनी पुराय संकलना खातीर कर आकारला. तशेंच धाडींत काँग्रेस फुडाऱ्यां कडल्यान जप्त केल्ल्या डायरींतल्या थर्ड पार्टीन केल्ल्या नोंदींचेरूय तपास यंत्रणेन कर आकारला, अशेंय अहवालांत नमूद केला.
दोन दिसां पयलीं 1,800 कोटींची धाडिल्ली नोटीस
काँग्रेसीक आयकर विभागा कडल्यान 29 मार्चाक नोटीस धाडिल्ली. तातूंत सुमार 1,823 कोटी रुपया फारीक करपाक सांगिल्लें. ही मागणी सुचोवणी 2017-18 ते 2020-21 खातीर आसा. हातूंत कळंतरा सयत दंडाचोय आस्पाव आसा.
कर विभागाच्या फाटल्या वर्सां कडेन संबंदींत कर मागण्या खातीर पक्षाच्या खात्यांतल्यान 135 कोटी रुपया पयलींच वसूल केल्यात. पूण काँग्रेसीन हाचे आड सर्वोच्च न्यायालयांत अपील केल्ले आसून ताचेर सुनावणी जावपाची आसा.
खात्यांतले वेव्हार बेहिशेबीः दिल्ली न्यायालय
काँग्रेसीन चार वर्सां खातीर (2017-18, 2018-19, 2019-20 आनी 2020-21) आयकर मुनर्मूल्यांकन प्रक्रिया सुरू करपा विरोधांत याचिका दाखल केल्ली. दिल्ली उच्च न्यायालयाच्या खंडपिठान 29 मार्च दिसा याचिका भायरायतना काँग्रेसच्या खात्यांत जायते बेहिशोबी वेव्हार जाल्ल्याचे म्हणलें. आयकर अधिकाऱ्यां कडेन कर निर्धारणाचेर कारवाय करपा खातीर ठोस पुरावे आशिल्ले. ते खातीर ही कारवाय केल्या.
आयकर पुनर्मूल्यांकनाची कार्यवाही सुरू करपा आड काँग्रेसीन दिल्ली उच्च न्यायालयांत याचिका दाखल केल्ली. हाचे पयलीच काँग्रेसीन 2014-15 ते 201617 ह्या काळांतल्या मूल्यांकन प्रक्रियेक आव्हान दिल्लें. ते न्यायालयान भायरायलें.
8 मार्च दिसा न्यायालयान आयकर अपीलीय न्यायाधिकरणाचो (आयटीएटी) आदेश कायम दवरिल्लो. ट्रिब्युनलान 2018-19 त 100 कोटी रुपया परस चड कराच्या वसुली खातीर काँग्रेसीक जारी केल्ल्या डिमांड नोटिसेक स्थगिती दिवपाक न्हयकार दिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
