भांगरभूंय | प्रतिनिधी
पणजीः दिल्ले वेळे भितर कला अकादमीचें काम पुराय केलें ना जाल्यार कंत्राटदाराक काळे वळेरींत घालप काय ना हे विशींचो निर्णय भौशीक बांदकाम खात्याचे मुखेल अभियंते घेतले. आमकां दर्जेदार काम जाल्लें जाय आनी तें करून घेवपा खातीर आमचे यत्न चल्ल्यात अशें कला आनी संस्कृती मंत्री गोविंद गावडे हांणी सांगलें.
कला अकादमीच्या दुरुस्तीच्या कामांचो नियाळ घेवपा खातीर मंत्री गोविंद गावडे हांणी भौशीक बांदकाम खात्याच्या अधिकाऱ्यां वांगडा बसका घेतली. आमी खात्या मुखार तीन मुद्दे मांडिल्ले ते खंय पावल्यात आनी ते विशींचें काम खंय पावलां हाचेर आमी चर्चा केली. अभियंत्यान दिल्ले सुचोवणे प्रमाण आमी काम चालूच दवरलां आनी येता त्या आठ दिसां भितर आमी काम पुराय करतले अशें अधिकाऱ्यांनी आमका सांगलां अशें गोविंद गावडे हांणी बसका सोंपले उपरांत पत्रकारां कडेन उलयतना सांगलें.
सध्या कला अकादमीचो पुराय ताबो कला आनी संस्कृती खात्याक भौशीक बांदकाम खात्यान दिवंक ना. फक्त 95 टक्के कला अकादमीचो वापर करूं येता अशें पत्र भौशीक बांदकाम खात्यान आमकां बरयलां. ते प्रमाण सभाघरां खातीर कला अकादमी बुकींग घेता. पूण सगलें काम पुराय जाले उपरांतूच कला अकादमीचो ताबो आमकां दिवचो अशेंय पत्र आमी भौशीक बांदकाम खात्याक बरयलां अशें गावडे हांणी सांगलें.
स्लॅबा वेल्यान पावसाचें उदक व्हांवून वचपा खातीर बसयिल्ल्या पायपांनी पानां पडिल्लीं. पानांचो पालो पायपांनी सामकोच शिरकून उरिल्लो. देखून नेटान पावस पडलो तेन्ना उदक वयल्या स्लॅबार आडावन उरलें आनी उपरांत तें भितर झिरपलें. देखून ओलसाणेक लागून कला अकादमीचे पाखें कोसळ्ळें. आता फुडल्या पावसांत आमका काळजी घेवपाक जाय. जतनाय म्हूण आमी स्लॅबाचे वॉटर प्रुफींग केलां अशी म्हायती गावडे हांणी दिली.
कला अकादमीच्या सभाघरांत सावंड सिस्टीम जाग्यार ना अश्यो कागाळी नाटकार आनी तियात्रिस्तांनी केल्ल्यो. मंत्री गावडे हांणी हें कबूल केलां. सावंड सिस्टिमीची नोंद आमी घेतल्या आनी स्पिकरांची फ्रिक्वेनसी आमकां वाडोवपाची गरज आसा. ही सिस्टम सामकीच आधुनीक आसा देखून आमच्या तांत्रीक पंगडांक ती वापरपा खातीर तांकां गिन्यान आसप गरजेचें. हे बाबतीत तांकां प्रशिक्षण दिवप चालू आसा. आतां मेरेन तियात्रिस्ट आपले गरजे प्रमाण भायलो सावंड सिस्टीम हाडटात. कला अकादमीच्या सावंड सिस्टिमेची माक्नां देशा भायल्यान हाडची पडटात. आचारसंहीतेक लागून हें काम आडखळून उरला. येता ते 2 ते 3 म्हयन्या भितर हें काम पुराय जातलें, अशे आस्वासन गावडे हांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
