एआय आनी रोबोटिक्स भुरग्यांक बरो फुडार दिवंक शकता: सुदिन 

भांगरभूंय | प्रतिनिधी

आयतारची मुलाखत

कोंब- मडगांवची समाज सेवा संघ ही संस्था फाटलीं 90 वर्सां शिक्षणाच्या मळार आपलें योगदान दिता. महिला नुतन हें विद्यालय उबारून तांणी आज मेरेन हजारांनी भुरग्यांक शिकयल्यात आनी तांकां व्हड केल्यात. 1933 वर्सा महिलांक शिक्षण दिवपाच्या हेतान सुरू जाल्ली ही संस्था आयज शिक्षणाच्या मळार एक एक पावल मुखार मारीत आसा. अशेंच पावल मुखार घालतना तांणी आर्टिफिशयल इंटलिजंस आनी रोबोटिक्स प्रयोगशाळा स्थापन करून एक नवी उंचाय मेळयल्या. घडये गोंयांतल्या शिक्षण संस्थांतली ही पयलीच प्रयोगशाळा, जंय ल्हान ल्हान भुरगीं उमेदीन नवें तंत्रगिन्यान शिकताना आनी ताचेर संशोधन करतना दिसता. हे संस्थेक हालींच 90 वर्सां पुराय जालीं. त्या निमतान आमच्या प्रतिनिधीन संस्थेचे अध्यक्ष सुदिन नायक हांचे कडल्यान म्हायती मेळोवन घेतली, ती अशी:- 

० समाज सेवा संघ ही संस्था केन्ना सुरू जाली आनी ताचो फाटलो हेत कितें आशिल्लो, हाचेर मात्सो उजवाड घालशात?

– 1933 वर्सा मडगांवच्या आठ नागरिकांनी, जांकां लोकांक शिक्षणाच्या मळार मुखार काडपाची तळमळ आशिल्ली, ही संस्था घडयली. हेत आशिल्लो महिलांक शिक्षण दिवपाचें. तेन्ना विद्यालयाचें नांव ‘महिला विद्यालय’ अशें दिल्लें. पूण चार वर्सां उपरांत ताचें नांव बदलून महिला आनी नुतन अशें दवरलें आनी थंय सगळ्यांक शिक्षण दिवपाक सुरूवात केली. तांचो जो हेत आशिल्लो तो आमी मुखार व्हरतात आनी ते खातीर आमकां, शिक्षकां सयत पालकांचो आदार जाता.

० शिक्षण संस्थेच्या कार्या विशीं मात्शें सांगशात?

– हय! शिक्षणाच्या मळार आमचें कार्य पूर्व प्राथमिक तें धावी मेरेन चलता. म्हणल्यार शिशू भारती (पूर्व प्राथमिक) विद्या भारती (पयली तें चवथी) आनी महिला नुतन (पाचवी तें धावी) मेरेन शिक्षण दितात. ह्या तिनूय कडेन आमचीं वट्ट 1850 भुरगीं शिकतात. तशेंच सुमार 70 शिक्षक आसात. 

० तुमी रोबोटिक्स प्रयोगशाळा स्थापन केल्या, ही संकल्पना कशीं फुडें गेली आनी खरेपणांत कशी आयली? 

– आमी कोव्हिडा आदीं ‘लॅट्स रोबो’ ह्या आस्थापनाच्या सहकार्यान एक वर्ग सुरू केल्लो. हें आस्थापन सॉफ्टवॅराच्या मळार काम करता. तेन्ना लॅट्स रोबोची, जांचें कार्यालय अमेरिकेंत आसा, रेश्मा सुवर्णा ही आपले धुवेक घेवन अमेरिकेच्यान कोल्हापुरांत आयिल्ली. ती मूळ कोल्हापूरचीच. तिणें आपले धुवेक कोल्हापुरच्या विद्यालयांत शिकपाक प्रवेश घेतिल्लो. त्या विद्यालयांत रोबोटिक्स नाशिल्लें हें पळोवन तिणें तें थंय सुरू केल्लें. ते विशीं आमकां कळटकच आमी तिची भेट घेतली आनी तिच्या सहकार्यान आमीय हांगां रोबोटिक्स वर्ग सुरू केल्ले. हांवें थंय वचून पळयलें तेन्ना भुरगीं ते प्रयोग करतना दिश्टी पडले. आमकांय उमेद आयली आनी ते खातीर आमी तें पावल मारलें. 

० रोबोटिक्साची प्रयोगशाळा आसप कितली गरजेची अशें दिसता?

– प्रयोगशाळा ना जाल्यार भुरगीं ह्या मळार मुखार वचूंकच शकना. फक्त कोडिंगच शिकयले म्हूण जायना. ते कशे तरेन काम करतात हें कळपा खातीर प्रयोगशाळा हीच जायच. आमचे प्रयोगशाळेंत थ्रीडी प्रिंटर आसा. आमचीं भुरगीं प्रयोगशाळेंत रोबोर्ट तयार करतात. जे चलतात आनी उलयतात. हें केन्ना जावंक शकता, जेन्ना प्रयोगशाळा आसतली तेन्नाच. आमी ही प्रयोगशाळा पोरूं सुरू केल्ली. आमकां प्रतिसाद बरो मेळपाक लागला. सुमार 100 विद्यार्थी थंय शिकतात. 

० तुमच्या ह्या प्रयोगशाळेंत हेर शाळांतलीं भुरगीं येवन शिकपाक शकतात, काय तुमच्याच भुरग्यां खातीर ती आसा?

– सध्या हांगां आमचीं भुरगीं शिकतात. मात आतां आमी हेर शाळांतल्या भुरग्यांकय थंय शिकपाक मेळचें म्हूण सांजेच्या वेळार कमीत कमी शुल्क दवरून वर्ग सुरू करतले. हे खातीर आमचे कडेन वेगळे प्रशिक्षण घेतिल्ले शिक्षक आसात. रोबोटिक्स प्रयोगशाळा आशिल्लें हें आमचें एकूच विद्यालय गोंयांत आसा. हें शिकले उपरांत आमी भुरग्यांक प्रमाणपत्रूय दितले. ज्या भुरग्यांक हातूंत आवड आसा तांणी हें शिकचें, कारण तांकां फुडाराक ताचो खूब लाव जावंक शकता. 

० तुमच्या रोबोटिक्स प्रयोगाशाळे विशीं सांगशात?

– हातूंत स्टॅम लॅब, कोडिंग लॅब आनी रोबोटिक्स-एआय लॅब, अशे तीन प्रकार आसात. स्टॅम लॅबांत आमी दुसरी ते चवथी मेरेन, कडिंग लॅबांत आनी रोबोटिक्स लॅबांत पाचवी ते धावी मेरेनच्या विद्यार्थ्यांक शिक्षण दितात. हातूंत कंप्युटर कोडिंग, इलॅक्ट्रॉनिकची म्हायती, प्रोग्रामिंग, अशी जायती म्हायती शिकयतात आनी ती खरेपणांत हाडपाक दाखयतात. 

० शिक्षणाच्या मळार उदरगत जातली जाल्यार सगळ्यांत पयलीं कितें बदल जावंक जाय अशें दिसता?

– म्हाका दिसता सगळ्यांत पयलीं वेळा प्रमाणें अभ्यासक्रम बदलपाक जाय. तशें केल्यारूच आमचीं भुरगीं जगा वांगडा सर्त करपाक शकतलीं. कितल्याशाच भायल्या देशांनी अभ्यासक्रम सुदारणेचेर भर दितात. तें जावंक जाय. तशेंच शिक्षणा विशींचीं जीं धोरणां आसात, तांचे कडेन तडजोड करून उपकारना. हीं धोरणां सारकीं चालीक लागपाक जाय आनीक सामकें म्हत्वाचें म्हणल्यार फावोर मारून शिक्षकांची भरती जाता जाल्यार ती बंद करपाक जाय. हातूंतल्यान भुरग्यांचें लुकसाण जाता. खरोच तो भुरग्यांक सारकें शिकोवंक शकता काय ना हाचेर पारखण आसपाक जाय आनी ते उपरांतच फुडली प्रक्रिया जावंक जाय.