भांगरभूंय | प्रतिनिधी
भांगरभूंय प्रतिनिधी
कुठ्ठाळीः हिंदी भास संपन्न आसा आनी तिका वैश्विक पांवड्यार व्हरपा खातीर सरकाराचे ते दिकेन यत्न सुरू आसात. हिंदीचें सोपेपणाचो आमचें गिन्यान आनी संस्कृती प्रचार आनी प्रसारांत व्हडलें योगदान थारता. तंत्रिक मळार हिंदीचो चड प्रमाणात वापर आनी तरणाटे पिळगे मदीं हिंदीचे लोकप्रियेक लागून हिंदीचो फुडार उज्वल आसा अशें केंद्रीय राज्यमंत्री श्रीपाद नायक हांणी सांगलें.
आयतारा साजें पणजेच्या इन्स्टिट्यूट मिनेझीस ब्रागांझा सभाघऱांत आयोजीत केल्ल्या गोंय हिंदी अकादमीच्या पयल्या वर्धापन दीस कार्यावळींत मुखेल सोयरे म्हणून ते उलयताले. माचयेर आदले मंत्री चंद्रकांत चोडणकार, चंद्रकांत गवस, महाराष्ट्रांतल्या शिवछत्रपती विद्यालयाचे प्राचार्च कैलास जाधव, गोंय विद्यापिठाच्या हिंदी विभागाची मुखेली डॉ वृषाली मांद्रेकार, हिंदी अकादमीचो अध्यक्ष सुनील शेट, उपाध्यक्ष श्रीकांत पालसरकार, लक्ष्मीकांत परब, सुनयना शेट आशिल्ली.
हिंदीक आतां आंतरराष्ट्रीय पांवड्यार मान-भोवमान मेळटा. आदले प्रधानमंत्री अटल बिहारी वाजपेयी हांणी युनोचे सभेंत सगल्यांत पयलीं हिंदीतल्यान भाशण केल्लें हाची नायक हांणी याद करून दिली. हिंदीच्या प्रसारा खातीर गोंय हिंदी अकादमी यत्न करता ते तोखणाय करपा सारके आसात. हिंदी हे देशाची वळक आनी स्वाभिमान आसा. राष्ट्रभास हिंदीक लागून लोक एकमेकांक जोडटात. ताका लागून हे भाशे विशीं मोग आनी आदर बाळगवप हे दरेका भारतीयांची लागणूक आसा अशें नायक हांणी सांगलें.
नायक हांचे हस्तुकीं वृषाली मांद्रेकार, कैलास जाधव, यशवंत कामकर, प्राजक्ता परब, विनिता ऊर्फ कांचन नायक बोरकार हांचो शाल, श्रीफळ आनी यादस्तीक दिवन भोवमान केलो. अकादमीच्या ”कुमूदी” हे स्मरणिकेचें नायक हांणी प्रकाशन केलें. अकादमीचो अध्यक्ष सुनील शेट हांणी सुरवेक येवकार दिवन प्रास्तावीक केलें. सूत्रसंचालन मालिनी कांणेकरान केलें. उपकार श्रीकांत पालसरकारान मानले. स्नेहा सुतार हिणे गायिल्ल्या पसायदान कार्यावळीचो समारोप जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
