भांगरभूंय | प्रतिनिधी
श्रीलंका पंगडा आड जावपी वन डे आनी टी-20 माळे खातीर भारताच्या पंगडांची घोशणा केली. रोहित शर्माचे सुवातेर हार्दिक पांड्याक टी-20 पंगडाचो मुखेली केला. जाल्यार वन डे पंगडाचें मुखेलपद रोहित शर्मा कडेनूच दवरलां.
टी-20 माळे खातीर रोहित शर्मा आनी विराट कोहली हांकां विसव दिवपाचो निर्णय घेतला. पूण, दोगूय वन डे पंगडांत सामील जातले. ओपनर शिखर धवनाक वन डे पंगडांतल्यान भायर दवरला. ताचे सुवातेर शुभमन गिलाक घेतला.
मजगतीं, टी-20 पंगडांत शिवम मावीक संद दिल्या. फास्ट बॉलींग अश्टतासाच्या ह्या खेळगड्यान देशांतर्गत सर्तींत उत्कृश्ट बॉलींग केल्या. ताणें फाटल्या पांच मॅचींनी खेळटना 19 विकेटी घेतल्या. हातूंत दोन रणजी आनी तीन लिस्ट ए मॅचींचो आस्पाव आसा.
फास्ट बॉलर मोहम्मद शमीचें वन डे पंगडांत पुनरागमन जालां. बांगलादेशाचे भोंवडेर गेल्ल्या पंगडाचो तो वांगडी आशिल्लो. पूण, सराव करतना दुखापत जाली आनी ताका मॅची चुकल्यो.
श्रीलंकेचो पंगड जानेवारींत भारत भोंवडे येतलो. हे भोंवडेर तो भारता आड तीन टी-20 आनी तीन वन डे मॅची खेळटलो. पयली मॅच 3 जानेवारीक मुंबय जातली. ते उपरांत 5 जानेवारीक पुण्या आनी 7 जानेवारीक राजकोटांत मॅच जातली. पयली वन डे मॅच 10 जानेवारीक गुवाहाटींत, दुसरी मॅच 12 जानेवारीक कोलकातांत आनी 15 जानेवारीक त्रिवेंद्रमांत जातली.
टी-20 पंगडः हार्दिक पांड्या (मुखेली), ईशान किशन (विकेटकीपर), ऋतुराज गायकवाड, शुभमन गिल, सुर्यकुमार यादव (उप मुखेली), दीपक हुड्डा, राहुल त्रिपाठी, संजू सॅमसन, वॉशिंग्टन सुंदर, युजवेंद्र चहल, अक्षर पटेल, अर्शदीप सिंग, हर्षल पटेल, उमरान मलिक, शिवम मावी आनी मुकेश कुमार.
वन डे पंगडः रोहित शर्मा (मुखेली), शुभमन गिल, विराट कोहली, सुर्यकुमार यादव, श्रेयस अय्यर, लोकेश राहुल (विकेटकीपर), ईशान किशन (विकेटकीपर), हार्दिक पांड्या (उप मुखेली), वॉशिंग्टन सुंदर, युजवेंद्र चहल, कुलदीप यादव, अक्षर पटेल, मोहम्मद शमी, मोहम्मद सिराज, उमरान मलिक आनी अर्शदीप सिंग.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
