भांगरभूंय | प्रतिनिधी
म्हापशें: मालेभाट साळगांवां एके तळयेंत रोशन पाटील (23, सावंतवाडी) ह्या बेपत्ता तरणाट्याची कूड सांपडली. मयत तरणाटो पिळर्ण उद्देगीक वसणुकेंतले एके कंपनींत कामाक आशिल्लो. ताणें आत्महत्या केल्ली आसुये असो दुबाव पुलिसांनी उक्तायला.
शेनवारा रातपाळी केले उपरांत मयत तरणाटो बेपत्ता आशिल्लो. मालेभाट साळगांवां तो भाड्याचे कुडींत रावतालो. रावते कुडी पसून कांय अंतराचेर आशिल्ले तळयेंत ताची कूड सांपडली.
मयत बेपत्ता जाल्ल्याची म्हायती मेळटकूच ताच्या वांगडी इश्टांनी तशेंच घर धनयान सोद घेतलो. आयतारा सांजवेळ मेरेन ताचो सोद लागूंक नाशिल्ल्यान साळगांव पुलिशेंत रोशन पाटील हो बेपत्ता जाल्ल्याची कागाळ नोंद केल्ली.
आयतारा रातीं 9.30 वरांच्या सुमाराक सोदासोद करीत आसतना तळयेच्या उदकांत उफेतना ताची कूड दिसून आयली. उपरांत उजो पालोवपी दळाच्या जवानांनी मध्यान रातीं उसरां कूड भायर काडली आनी पुलिसांनी पंचनामो करून गोंय वैजकी म्हाविद्यालयांत फुडले तपासणे खातीर धाडून दिली. फुडलो तपास पुलीस निरिक्षक सचीन लोकरे हांच्या मार्गदर्शना खाला उपनिरिक्षक अतिकेश खेडेकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
