सत्तरींत रोजांची लागवड 80 टक्के नश्ट

सत्तरी म्हालांत केल्ली रोजांची लागवड.

भांगरभूंय | प्रतिनिधी

दिवाळेक रोजांचो उणाव जावपाची शक्यताय; उत्पादकांचें व्हड अर्थीक लुकसाण

भांगरभूंय । प्रतिनिधी

वाळपयः आत्मा येवजणे खाला सत्तरी म्हालां 10 हॅक्टर वाठारांत रोजांच्या फुलांची लागवड केल्ली. पूण अंदूं व्हड प्रमाणांत पावस पडिल्ल्यान ताचो वायट परिणाम हे लागवडीचेर जाला. सुमार 80 टक्के लागवड नश्ट जाल्या. ताका लागून सत्तरींत दिवाळेक रोजांचो उणाव जाणवतलो आनी लोकांच्या बोल्साक कातर लागतली.

कांय उत्पादकांच्या म्हणण्या प्रमाण कृशी खात्याच्या आत्मा येवजणे खाला वितरीत केल्लीं रोजांचे रोपे किडिल्ले आशिल्लें. ताका लागून ते नश्ट जाले आनी उत्पादकांचें व्हड प्रमाणांत अर्थीक लुकसाण जालें.

पोरूं सत्तरी म्हालांत व्हड प्रमाणांत रोजांचें उत्पादन जाल्लें. अंदूं रोपे लावन दोन म्हयने जाता म्हणल्यार रोपे सुकपाक लागले. वखदां मारून लेगीत ताचो कसलोच फायदो जावंक ना. हाका लागून सुमार 80 टक्के लागवड नश्ट जाली, अशें कांय उत्पादकांचें म्हणणें आसा. सत्तरी म्हालांत पोरूं 7 हॅक्टर सुवातेंत रोजांची लागवड केल्ली. अंदूं ती 10 हॅक्टर सुवातेंत केल्ली. ताका लागून अंदूं व्हड प्रमाणांत रोजांचें उत्पादन मेळटलें, असो अदमास आशिल्लो. दिवाळेक हेर राज्यांतल्यान व्हड प्रमाणांत रोजां गोंयच्या बाजारांनी येतात. मात ती म्हारग आशिल्ल्यान चडशा गोंयकारांक परवडनात. गोंयांतूच जर रोजांचें उत्पादन जालें जाल्यार ती सवाय मेळूं येतात, असो विचार करून कृशी खात्यान आत्मा येवजणे खाला रोजांची लागवड करपाचो यत्न केल्लो. हे खातीर कृशी खात्यान उत्पादकांक सवलतीच्या दरान रोजांचे रोपे उपलब्ध करून दिल्ले.

रोजांच्या उत्पादनांचेर पावसाचो परिणाम…

अंदूं चड प्रमाणांत पावस पडिल्ल्यान ताचो परिणाम रोजांच्या उत्पादनाचेर जाला. सुमार दोन म्हयने एकसारको पावस पडटालो. मदल्या काळांत ही लागवड वाटोवपा खातीर तांचेर वखदांची फवारणी केल्ली. मात ताचो जाय तसो फायदो जावंक ना, अशें कृशी खात्याच्या अधिकाऱ्यांनी प्रतिनिधी कडेन उलयतना सांगलें.