भांगरभूंय | प्रतिनिधी
पणजीः शिरगांव जात्रेंत जाल्ले खेटाखेटींत महसूल सचीव संदीप जॅकीस हांच्या फुडारपणा खाला चवकशी समितीन निमाणे पांच दिसांनी आपलो अहवाल सरकाराक सादर केलो. हो अहवाल शंबर पानांचो आसा. अहवालाचेर सरकार फुडलो निर्णय घेतलें. बिरेस्तारा रातीं उसरां हो अहवाल मुखेल सचीव डॉ. वी. कांडावेलू हांचे कडेन सादर केलो अशी म्हायती चवकशी समितीचे मुखेल संदीप जॅकीस हांणी दिली.
ह्या अहवालाचेर मुख्यमंत्री उलयतले, अशें सांगून तांणी फुडली म्हायती दिवपाक न्हयकार दिलो. फाटल्या शेनवारा मध्यानरातीं शिरगांव जात्रेंत जाल्ले खेटाखेटींत स जाणांक मरण आयलें. जाल्यार 70 परस चड जाण जखमी जाल्यात. तातुंतल्या कांय जाणांचेर जीएमसींत अजून उपचार चलतात.
ह्या प्रकरणाची चवकशी करपाक सरकारान शेनवाराच महसूल सचीव संदीप जॅकीस हांच्या फुडारपणा खाला समिती स्थापन केल्ली. वर्षा शर्मा (डीआयजी रेंज), प्रविमल अभिषेक (येरादारी संचालक) आनी टिकमसिंह वर्मा (पुलीस अधीक्षक, दक्षीण गोंय) हे समितीचे हेर वांगडी आशिल्ले. समितीन जिल्लोधिकारी, पुलीस, देवस्थान समिती आनी जखमींचें जबाब नोंद करून चवकशी केली. सोमारा समिती आपलो अहवाल सादर करतली अशें मुख्यमंत्र्यान सुरवेक सांगिल्लें. पूण चवकशेक कळाव जाल्ल्यान अहवालाकूय कळाव जालो. आनी काल बिरेस्तारा रातीं उसरां समितीन हो अहवाल सादर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
