भांगरभूंय | प्रतिनिधी
प्रक्रिया सुरूः मसुदो तयार करपा खातीर समित्यो स्थापन
भांगरभूंय । प्रतिनिधी
पणजी : सरकारी येणावळ वाडपा खातीर वाठारा प्रमाण जमनीचें मोल थारावपाची प्रक्रिया येणावळ खात्यान सुरू केल्या. जमनीच्या मोलाचो मसुदो तयार करपा खातीर जिल्हो पांवड्यार तशेंच म्हाल पावंड्यार समित्यांची स्थापना केल्या. ह्यो समित्यो उण्यांत उण्या दराचो मसुदो सरकाराक सादर करतल्यो. अभ्यासा उपरांत सरकार जमनीचें मोल निश्चीत करतलें.
उपजिल्होधिकाऱ्याचे अध्यक्षतेखाला म्हाल पावंड्याचेर समित्यो स्थापन जाल्यात. मामलेदार, नगर नियोजक, सहाय्यक अभियंतो (भौशीक बांधकाम खातें) हे समितीचे हेर वांगडी आसात. म्हालाचो उपनिबंधक हो समितीचो वांगडी सचीव आसतलो.
जिल्हो पावंड्याचेर वेगळी समिती स्थापन जाल्या. जिल्होधिकारी हे समितीचो अध्यक्ष आसतलो. जिल्हो निबंधक, वरीश्ठ नगरनियोजक, कार्यकारी अभियंतो (भौशीक बांधकाम खातें) हे समितीचे हेर वांगडी आसात. उपजिल्होधिकारी (येणावळ) हो समितीचो वांगडी सचीव आसतलो.
म्हाल पावंड्या वयली समिती 15 ऑक्टोबर मेरेन मसुदो वा शिफारसी जिल्होधिकाऱ्याक सादर करतली. जिल्हो पांवड्या वयली समिती 31 ऑक्टोबर मेरेन मसुदो तशेंच शिफारसी सरकाराक सादर करतली. मसुद्याच्या अभ्यासा उपरांत 1 जानेवारीक वाठारा प्रमाण जमनीचे दर अधिसुचीत जातले. जमिनीचें मोल वर्सान वर्स बदलतात. हाका लागून ही प्रक्रिया दर वर्सा जातली. पणजी, वास्को, मडगांव ह्या शार वाठारांनी जमनीचें मोल चड आसा. गांवगिऱ्या वाठारांत जमनीचें मोल उणें आसा. तशेंच रस्त्या लागसारचे जमनीचें मोल चड आसा. अभ्यास करून जमनीचें उण्यांत उणें मोल निश्चीत जातलें.
येणावळ वाटोवपा खातीर निर्णय
जमीन वा प्लॉटाची ज्या मोलान खरेदी वा विक्री जाता, त्या दरा प्रमाण स्टँप ड्युटीचो वेव्हार जायना. उण्या दरान नोंदणी करून स्टँप ड्युटी चुकोवपाचे प्रकार सर्रास जातात. हातूंत सरकाराची येणावळ बुडटा. सरकाराची येणावळ वाटोवपा खातीर वाठारा प्रमाण जमनीचे दर निश्चीत करपाचे येणावळ खात्यान थारायलां. मंत्री बाबूश मोंसेरात हांणी हे विशीं बसका घेवन जमनीचे दर निश्चीत करपाचे आदेश दिल्ले. ते प्रमाण आतां प्रक्रिया सुरू जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
