भांगरभूंय | प्रतिनिधी
संवसारीक टी-20 क्रिकेट सर्तीचे पात्रताय फेरयेंत आयर्लेण्ड पंगडान वॅस्ट इंडीजाक 9 विकेटींनी हारयलो. हे हारीक लागून दोन खेपेचो संवसारीक वस्ताद वॅस्ट इंडीजाचें आव्हान पात्रताय फेरयेंतूच सोंपलें, जाल्यार आयर्लेण्डान सुपर 12त सुवात मेळयली.
पयलीं बॅटींग करपी वॅस्ट इंडीजान आयर्लेण्डा मुखार जैता खातीर 147 धांवड्यांची मोख दवरिल्ली. आयर्लेण्डान 17.3 ओव्हरींनी फक्त एक विकेट वगडावन मोख मेळयली.
आयर्लेण्डाच्या पॉल स्टर्लिंगान सगल्यांत चड नाबाद 66 धांवड्यो केल्यो. जाल्यार लॉरकेन टकरान 35 बॉलांनी 45 धांवड्यो करून ताका बरी साथ दिली. आयर्लेण्डान सुपर 12त सुवात मेळयली, तो ग्रुप दोनांत दाखल जालो. ह्या ग्रुपांत भारताचो लेगीत आस्पाव आसा.
वॅस्ट इंडीजान टॉस जिखून पयलीं बॅटींग करपाचो निर्णय घेतिल्लो. पूण, ताची पावर प्लेंतली अवस्था 2 बाद 27 अशी जाल्ली. ते उपरांत लुईस आनी ब्रॅण्डन किंग हांणी डाव सांबाळीत भागिदारी करपाक सुरवात केली. पूण, ही जोडी ग्रेथ डॅनलेन लुईसाक (13) बाद करून फोडली. निकोलस पुरन लेगीत 13 धांवड्यो करून तंबूंत परतलो. अखेरेक अर्द शेंकड्याची खेळी करपी ब्रॅण्डन किंगान वॅस्ट इंडीजाक शेंकडो हुपून दिवपाक मजत केली.
पूण, रोव्हमन पॉवल 6 धांवड्यो करून बाद जाल्ल्यान विंडीजाक स्लॉग ओव्हरींनी आपली धांवसंख्या वाडोवपाक अपेस आयलें. ओडेन स्मिथान 12 बॉलांनी 19 धांवड्यो करीत विंडिजाक 146 धांवड्यां मेरेन पावयलो. ब्रॅण्डिन किंगान 48 बॉलांनी नाबाद 62 धांवड्यांची खेळी केली.
आयर्लेण्डा वतीन ग्रेथ डॅनलेन चार ओव्हरींनी फक्त 16 धांवड्यो दीत 3 विकेटी घेतल्यो. सिमी सिंग आनी बॅरी हांणी दरेकी एक विकेट मेळयली.
147 धांवड्यांची मोख घेवन मैदानांत देंवपी आयर्लेण्डान आक्रमक सुरवात केली. ओपनर पॉल स्टर्लिंग आनी अॅण्ड्र्यू बालबिर्ने हांणी सात ओव्हरींनी 70 धांवड्यां मेरेन पंगडाक पावयलो.
ते उपरांत अकिल हुसैनान अॅण्ड्र्यूक 37 धांवड्यांचेर बाद करून आयर्लेण्डाक पयलो धपको दिलो. पूण, नाबाद अर्द शेंकड्याची खेळी करीत स्टर्लिंगान लॉरकेन टकरा वांगडा मेळून दुसरे विकेटी खातीर नाबाद 77 धांवड्यांची भागिदारी करून विंडीजान दिल्ली मोख 17.1 ओव्हरींनी मेळयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
