भांगरभूंय | प्रतिनिधी
इफ्तार पार्टींत सगळ्या धर्मांचे लोक वांटेकार
भांगरभूंय । प्रतिनिधी
मुरगांवः वास्को पुलीस स्टेशनान 27 एप्रीलाक शांती समिती स्थापन करून मुस्लीम भावां खातीर इफ्तार पार्टीचें आयोजन केल्लें. शांती समिती कार्यावळी वेळार मुरगांव म्हालांतल्यो विवीध देवस्थान समिती, मशीद समिती आनी बिगर सरकारी संस्थेचे पदाधिकारी हाजीर आशिल्ले.
मुरगांव म्हालाचे पुलीस उपअधिक्षक निलेश राणे हांणी वरिश्ठ अधिकाऱ्यांच्या मार्गदर्शना खाला वास्को पुलीस स्टेशनांत शांती समिती स्थापन करून शांततायेचो संदेश पुराय गोंयांत पावयला. रामनमीक वास्को बायणा जाल्ल्या दोन गटांतल्या वादाक लागून धर्मीक वाद निर्माण जाल्लो. ताका लागून गृह विभागाच्या वरिश्ठ पुलीस अधिकाऱ्यांनी वास्को सयत गोंयांतल्या खंयच्याच वाठारांत कसलोच धर्मीक वाद निर्माण जावचो न्हय, हे खातीर शांती समिती स्थापन करून एक बरें पावल उखल्लां.
वास्को पुलीस स्टेशनांत मुरगांव पुलीस उपअधिक्षक निलेश राणे हाणें शांती समिती खाला कार्यावळ आयोजीत करून हाजीर आशिल्ल्या सगळ्या धर्मांच्या लोकां मुखार आपले विचार मांडले. ह्या वेळार ताच्या वांगडा गोंय काँग्रेस अल्पसंख्यांक विभागाचो अध्यक्ष नजीर खान, आदली नगराध्यक्ष तारा केरकार, क्रिस्तीन कुयेलो, एडवर्ड फर्नांडीस आनी विवीध देवस्थान समितींचे पदाधिकारी हाजीर आशिल्ले.
राणे हाणें सांगलें, राज्यांत धर्मीक एकचार वेवस्थीत उरचो हो संदेश सगळ्यां मेरेन पावोवपा खातीर म्हयन्यांतल्यान एकदां शांती समिती खाला बसका आपयतले. मजगतीं, रमजानचो म्हयनो चालू आशिल्ल्यान वास्को पुलीस स्टेशनाचेर मुस्लीम भावांक एक ल्हानसी इफ्तार पार्टी आयोजीत केल्ली. ह्या वेळार सगळ्या धर्मांतल्या लोकांनी वांटो घेतलो. ह्या वेळार नजीर खान, तारा केरकार हांणी सांगलें, वास्को पुलिसांनी एक बरो वावर केला, ते खातीर तांकां परबीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
