भांगरभूंय | प्रतिनिधी
मडगांव: वंदे भारत ह्या सेमी स्पीड रेल्वेची सुरवात मंगळारा सावन सुरू जाली. हे गाडयेचें तिकेट विमाना परस म्हारग आशिल्ल्यान कोंकण रेल्वे मार्गा वयले हे रेल्वेक प्रतिसाद मेळटलो? असो प्रस्न उप्रासतालो. बुधवारा मुंबय सावन मडगांवां आयिल्ले गाडयेंतले 80 टक्के सिट्स जाल्यार बिरेस्तारा मडगांव ते मुंबय गेल्ल्या वंदे भारत एक्स्प्रेसींतले 50 टक्के सिट्स फुल्ल आशिल्ले. ताका लागून वंदे भारताक बरो प्रतिसाद मेळत आशिल्ल्याचें दिसून येता.
गोंय ते मुंबय ह्या मार्गार वंदे भारत ह्या सेमी एक्स्प्रेस गाडयेचो शुभारंभ प्रधानमंत्री नरेंद्र मोदी हांचे हस्तुकीं मंगळारा सकाळीं व्हिडियो कॉन्फरन्सिंगा वरवीं केलो. वंदे भारत ही कोंकण रेल्वे मार्गा वयली गतीन धांवपी रेल्वे आसून अत्याधुनीक सेवा प्रवाशांक दिता. मॉन्सूनच्या काळांत वंदे भारताची गती उणी दवरिल्ल्यान ती आठ वरां बदला गोंय ते मुंबय प्रवास धा वरांचो जाला. तेच प्रमाण हेर गाडयांचीय गती उणी केल्या. ज्या गाडयांक धा वरां लागताली तांची आनीक देड ते दोन वरां वाडयल्यांत. वंदे भारत एक्स्प्रेस सुरू जायत सावन तिकेटींचो विशय हो चर्चेचो थारिल्लो. कोंकण रेल्वे मार्गा वयले खंयच्याय रेल्वेचें तिकेट ना, तितलें तिकेट वंदे भारताचें आसा. वंदे भारत रेल्वेचे तिकेटी परस विमानाचें तिकेट सवाय आशिल्ल्यान हे रेल्वेक प्रवाशांचो प्रतिसाद कितलो मेळटलो असो प्रस्न आशिल्लो.
सध्या वंदे भारत रेल्वेच्या चेर कारचे तिकेट 1970 रुपया आसून एक्झिक्युटिव्ह क्लासाचें तिकेट 3535 इतलें आसा. विमानाचें तत्काळ तिकेटूय सुमार साडे तीन हजार रुपया आसा. ताका लागून गाडयेक प्रवाशांचो प्रतिसाद मेळपाचेर प्रस्न उप्राशिल्लो. हे फाटभुंयेर कोंकण रेल्वेचे उपप्रबंधक तशेंच वरिश्ठ जनसंपर्क अधिकारी बबन घाटगे हांकां विचारलें तेन्ना, तांणी वंदे भारताक बरो प्रतिसाद मेळत आशिल्ल्याची म्हायती दिली. बुधवारा मुंबय सावन गोंयांत आयिल्ले गाडयेंतले वट्ट 500 सुवातां मदीं 80 टक्के फुल्ल आशिल्ले. जाल्यार बिरेस्तारा मडगांव सावन मुंबय गेल्ले वंदे भारताच्यो 50 टक्के सुवातो फुल्ल आशिल्ल्यो अशें तांणी सांगलें.
बरे सेवेक लागून प्रतिसाद
वंदे भारत गाडयेच्या तिकेटीचेर लक्ष ओडीत कोंकण रेल्वे मार्गा वयले प्रवासी दुसरे रेल्वेंक प्राधान्य दितले अशें म्हणटाले. पूण वंदे भारत गाडयेचें आरक्षण उक्तें जातकूच गणेशोत्सवांतले बुकींग फुल्ल जालां. ह्या काळांत तिकेटां खातीर प्रवासी वळेरी वेटींग लिस्टार आसा, हें विशेश आसून तिकेटीची पर्वा करिनासतना बरे सेवेक लागून प्रवासी प्रतिसाद दीत आशिल्ल्याचें दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
