भांगरभूंय | प्रतिनिधी
इंग्लीश फुटबॉल क्लब लिव्हरपूलान यूईएफए चॅम्पियन्स लीगाचे फायनलींत सुवात मेळयली. उमळशीक वाडोवपी मॅचींत लिव्हरपूलान 12 मिनटां भितर मॅच घुंवडायली. ताणें विलारियालाक 5-2 फरकान हारोवन फायनलींतली आपली सुवात निश्चीत केली.
सेमी फायनलीचे दुसरे लेगाच्या मध्यांतरा मेरेन 2-0 फरकान फाटीं आशिल्ल्या लिव्हरपूलान उत्कृश्ठ रितीन पुनरागमन करतना 12 मिनटां भितर तीन गोल करून पांच वर्सां भितर तिसरे खेपे फायनलींत सुवात मेळयली. मॅचीच्या 62व्या मिनटाक लिव्हरपूला वतीन फॅबिन्होन गोल करून आघाडी 1-2 अशी उणी करून दिली. पांच मिनटांनी लुईस डियाजान गोल करून स्कोर 2-2 असो बरोबरींत हाडलो. उपरांत मानेन 74 व्या मिनटाक गोल करून पंगडाक 3-2 अशा फरकान जैत मेळोवन दिलें.
लिव्हरपूल स खेपे ही लीग जिखल्या. जाल्यार फाटल्या पांच वर्सांनी तिसरे खेपे फायनलींत पावला. 2018-19त ताणें किताब जिखिल्लो. जाल्यार 2017-18त उपवस्ताद थारिल्लो. 2020-21त चॅल्सीन किताब जिखिल्लो.
फायनलींत तो रियाल माद्रीद आनी मॅन्चॅस्टर सिटी ह्या क्लबा मदल्या जैतिवंता आड खेळटलो.
चॅम्पियन्स लीगेच्या इतिहासांत स्पेनीश क्लब रियाल माद्रिदान सगल्यांत चड 13 खेपे किताब जिखला. ताच्या उपरांत इटालीयन क्लब मिलानाचो क्रम लागता. ताणें सात खेपे वस्तादपण जोडलां. लिव्हरपूल आनी जर्मनीचो क्लब बायर्न म्युनिच हाणें दरेकी स खेपे किताब जिखला. लिव्हरपूल हे खेपे जिखता जाल्यार तो मिलानाची बरोबरी करतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
