भांगरभूंय | प्रतिनिधी
-खेळां संघटणांचो कार्यावळींचेर बहिश्कार
पणजी : राज्यांतल्या विवीध खेळां संघटणांनी आयज 8 सप्टेंबराक जावपी राष्ट्रीय खेळां सर्तीच्या मशालीच्या अनावरण कार्यावळीचेर बहिश्कार घालपाचे थारायला. मुख्यमंत्री डॉ. प्रमोद सावंत हांणी दिल्ल्या आस्वासना प्रमाण खेळां संघटणांक शिबिरा खातीर निधी मेळूंक नाशिल्ल्यान हो निर्णय घेतला. गोंय ऑलिम्पीक संघटणेचे सरचिटणीस गुरूदत्त भक्ता हांणी ही म्हायती दिली. ही कार्यावळ आयज दनपारां 4.30 वरांचेर राजभवन दरबार सभाघरांत जावपाची आसा.
राष्ट्रीय खेळां सर्ती खातीर खेळां शिबीर 8 सप्टेंबराच्यान सुरू जावप गरजेचें. कारण नेमा प्रमाण सर्तींच्या 45 दीस पयली खेळां शिबीर घेवप गरजेचें आसता. शिबिरां खातीर खर्च लेगीत चड आसता. मुख्यमंत्री डॉ. प्रमोद सावंत हांणी आमकां शिबिरां खातीर तशेंच खेळां साधनां खातीर निधी दिवपाचें आस्वासन दिल्लें. संघटणे प्रमाण 20 ते 25 लाखां मेरेन निधी दिवपाचे आशिल्ले. आमी मुख्यमंत्र्यांक हाचे पयलींच पत्र धाडून शिबिरा पयलीं 80 टक्के निधी दिवचो, अशी मागणी केल्ली. पूण अजुनूय हो निधी मेळूंक ना. फाल्यां मेरेन निधी मेळपाची शक्यताय ना, अशें भक्ता हांणी म्हणलें.
ते खातीर आमी आयज जावपी मशाल अनावरण तशेंच कार्यावळींचेर बहिश्कार घालपाचे थारायला. गोंय ऑलिम्पीक संघटणेचे अध्यक्ष आनी केंद्रीय मंत्री श्रीपाद नायक सध्या दिल्लींत आसात. ते गोंयांत आयले उपरांत हे विशीं आमी तांचे वांगडा चर्चा करतले, अशेंय गुरूदत्त भक्ता हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
