भांगरभूंय | प्रतिनिधी
चार घरां जाल्लीं मातयेभरवण; 25 घरां गेल्लीं उदका खाला
फोंडें: गांजे-उसगांवां पोरूं वर्सा म्हादय न्हंयेक हुंवार येवन थळाव्यांचीं चार घरां मातयेभरवण जाल्लीं. सुमार 25 परस चड घरां उदका खाला गेल्लीं. म्हादय न्हंयेक तशेंच दुदसागर न्हंयेक हुंवार येवन आयज 23 जुलयाक एक वर्स पुराय जाता. तरी लेगीत पोरूं वर्साचो दीसभराचो उटंगाराचो पावस अजुनूय थळाव्यांच्या दोळ्या मुखार येता. हुंवाराक लागून थळाव्यांचे कपडे, कागदपत्रां आनी हेर साहित्य पुरायपणान पेड्डेर जावन व्हड लुकसाण जाल्लें. समाजसेवक, विवीध संस्था, सरकाराची मजत आनी हाता कडेन आशिल्ल्या पयशांतल्यान मातयेभरवण जाल्लीं घरां परतून उबीं करून स्थिती पूर्वपदार येवपाक थळाव्यांक खर कश्ट घेवचे पडले.
पोरूं वर्सा म्हादय न्हंयेक 23 जुलय दिसा हुंवार येवन थळाव्यांचीं चार घरां कोसळिल्लीं. तशेंच हेर सुमार 25 घरां उदका खाला गेल्ल्यान थळाव्यांनी लागींच आशिल्ल्या दोंगराळ वाठारांत धांव घेवन जीव वाटायिल्लो. हुंवारांत थळाव्यांचें व्हड प्रमाणांत लुकसाण जाल्लें. मातयेभरवण जाल्ल्या चार घर धनयांक दरेकी 2 लाख रुपयांची मजत जाल्यार उदका खाला गेल्ल्या घरांक 40 ते 50 हजार रुपया दिल्ले.
तशेंच हेर विवीध समाजीक संस्था आनी समाजसेवकांनी अर्थीक तशेंच हेर मजत केल्ली. पोरूं वर्सा घरां मातयेभरवण जाल्ल्यान तीन गणपती देवळांत पुजिल्ले. थळाव्यांनी मेळिल्ले मजतींतल्यान आनी स्वताच्या खर्चान परतून घरां उबारलीं.
मजगतीं, रगडा न्हंयेंक हुंवार आयिल्ल्यान उधळशे-साकोड्ड्यां एके जाण्टे बायलेक उदकांत बुडून मरण आयिल्लें. तशेंच खूबशा जाणांचीं घरां उदका खाला गेल्लीं. दुदसागर न्हंयेक हुंवार आयिल्ल्यान मुर्डी-खांडेपारा तीन घरां कोसळिल्लीं.
तशेंच दावकोण-धारबांदोड्यां लेगीत सुमार 30 परस अदीक घरां उदका खाला गेल्लीं. सरकारान त्या वेळार कांय जाणांक अर्थीक मजत केल्ली. पूण कांय घर धनी अजुनूय अर्थीक मजतीची वाट पळयतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
