भांगरभूंय | प्रतिनिधी
रस्तो सुरक्षा वेवस्थापन लोकसंवाद कार्यावळ थारली सोपस्कार
पणजीः रस्तो सुरक्षा वेवस्थापनाचेर लोकांच्यो सुचोवण्यो आनी प्रस्ताव आयकून घेवपाक लागून मुख्यमंत्री डॉ. प्रमोद सावंत हांच्या संकल्पनेंतल्यान शुक्रारा आयोजीत केल्ल्या लोकसंवाद कार्यावळीक संबंदीत सरकारी खातीं आनी प्रशासकीय अधिकाऱ्यांनी मात आडनदर केल्ल्याचे स्पश्टपणान जाणवलें. मुख्यमंत्री डॉ. प्रमोद सावंत, येरादारी मंत्री मॉवीन गुदीन्हो आनी भौशीक बांदकाम मंत्री निलेश काब्राल हांच्या उक्तावण्याच्या भाशणा उपरांत ते गेले आनी फाटल्यान ल्हव ल्हव भौशीक बांदकाम खातें आनी येरादारी खात्याच्या अधिकाऱ्यांनीय कूस मारिल्ल्यान ही कार्यावळ म्हणल्यार फकत दोळ्यांक उदक लावपी सोपस्कार थारल्याची प्रतिक्रिया हातूंत वांटेकार जाल्ल्या लोकांनी पत्रकारां कडेन उलयतना दिली.
गोंयांत हालीच्या काळार रस्ते अपघातांत बरीच वाड जाल्या. रस्तो अपघातांत बळी वचपी लोकांचो आंकडो वाडिल्ल्यान भिरांकुळाची परिस्थिती निर्माण झाल्या. रस्ते अपघात उणें करतनाच रस्तो सुरक्षा नेमांक पाळो दिवप आनी सुरक्षीत येरादारी खातीर कितें करूं येता हे विशीं लोकांचीं मतां जाणून घेवपाक लागून मुख्यमंत्री डॉ. प्रमोद सावंत हांणी पयलेच खेपे लोकसंवादाच्या कार्यावळीची संकल्पना मांडली. ही संकल्पना भौशीक बांदकाम खातें आनी येरादारी खात्यान मान्य केले उपरांत शुक्रारा मिनेझीस ब्रागांझा सभाघरांत हे कार्यावळीचें आयोजन केल्लें. विशेश म्हणल्यार हे कार्यावळीची जागृताय मुख्यमंत्री कार्यालयांतल्यानूच जाली, मात येरादारी आनी भौशीक बांदकाम खात्यान अशी कार्यावळ आयोजीत केल्ल्यांचे लोकांक सांगूक कांयच फुडाकार घेवंक ना, अशेंय दिसून आयलें.
सकाळीं कार्यावळीचें उक्तावण जाले उपरांत कांय खीण मुख्यमंत्री आनी दोगूय मंत्री बसलें. ते उपरांत पयलीं भौशीक बांदकाम मंत्री निलेश काब्राल आणि ते उपरांत येरादारी मंत्री मॉवीन गुदीन्हो कार्यावळींतल्यान भायर सरले. सांजे 5 वरां मेरेन ही कार्यावळ चल्ली जाल्यार अधिकारी हाजीर आसतले अशें मुख्यमंत्री डॉ. सावंत हांणी आपल्या उक्तावणाच्या भाशणांतल्यान सांगिल्लें. येरादारी विभागाचे अधिकारी लोकांच्यो सुचोवण्यो नोंद करून घेवपाचें काम करताले पूण रस्तो सुरक्षा वेवस्थापनांत म्हत्वाची भुमीका अाशिल्ल्या येरादारी खातें आनी भौशीक बांदकाम खात्याच्या अधिकाऱ्यांनी हे कार्यावळीक मातूय गंभीरतायेन घेवंक ना, अशेंय ह्या वेळार दिसून आयलें. मुखेल म्हणल्यार भौशीक बांदकाम खात्याचे प्रधान मुखेल अभियंते उत्तम पार्सेकार हे कार्यावळीक हाजीर रावूंक ना. येरादारी खात्याचे संचालक राजन सातार्डेकार हांणीय येरादारी मंत्री गेले उपरांत कार्यावळींतल्यान कूस मारली. भौशीक बांदकाम खात्याचे कांय अधिकारी हाजीर अशिल्ले पूण रस्तो सुरक्षे विशीं म्हत्वाची जबाबदारी अाशिल्ले अधिकारी मात हे कार्यावळीक दिसूंक ना. हे कार्यावळींत सुमार 25 ते 30 जाणांनी आपल्यो सुचोवण्यो आनी प्रस्ताव मांडले. पूण तांचे कडेन संबंदीत खात्यांनी कितलें लक्ष दिलें वा कितें नोंद करून घेतलें हे विशीं लोकांनी दुबाव उक्तायला.
राज्य आनी जिल्हो रस्तो सुरक्षा मंडळां गायब
रस्तो सुरक्षेच्या विशयाचेर अभ्यास करप आनी ताची कार्यवाही करपा हे खातीर राज्य पांवड्यार राज्य रस्तो सुरक्षा मंडळ आनी जिल्हो पांवड्यार जिल्हो रस्तो सुरक्षा मंडळां स्थापन केल्यात. राज्य रस्तो सुरक्षा मंडळाचे मुखेलपण येरादारी मंत्र्या कडेन जाल्यार जिल्हो रस्तो सुरक्षा मंडळाचे फुडारपण जिल्होधिका ऱ्यांकडेन आसा. कार्यावळीक सुरूवात जाले उपरांत येरादारी मंत्री गेलेच पूण जिल्होधिकाऱ्यांनी मात हे कार्यावळी कडेन फाट फिरयली. ह्या मंडळांच्या बसकांचे इतिवृत्त येरादारी खात्यांच्या संकेतस्थळांचेर घालपाचें बंधन आसा पूण तशें जायना. ह्या मंडळांच्या कामा विशीं लोकां मदीं जागृताय जावपाक जाय. सर्वोच्च न्यायालयाच्या रस्तो सुरक्षा समितीची ह्या मंडळांच्या कामांचेर देखरेख आसता पूण गोंयांत मात ह्या मंडळांचें काम गंभीरपणान चलना, हेंच आयच्या कार्यावळींतल्यान दिसून आयलां.
रस्तो सुरक्षा धोरण आनी कृती आराखड्याचें कितें
सर्वोच्च न्यायालयान रस्तो सुरक्षेचो विशय गंभीरपणान घेतले उपरांत केंद्र सरकार आनी राज्य सरकाराक रस्तो सुरक्षा धोरण आनी कृती आराखडो तयार करपाचे आदेश दिल्ले. ह्या आदेशाक लागून राज्य सरकारच्या येरादारी खात्यान 2015 त राज्याचें रस्तो सुरक्षा धोरण आनी कृती आराखडो अधिसूचीत केल्लो. ह्या आराखड्यांत 2020 मेरेन रस्तो अपघात 50 टक्के उणें करपाची मोख दवरिल्ली. ह्या धोरणाचें कितें जालें, असो प्रस्न आयचे कार्यावळींत उपस्थीत केलो जाल्यार ताचेर उलोवपाक येरादारी खात्याचे कोणूच अधिकारी हाजीर नाशिल्ले. पुलीस म्हासंचालक, पुलीस म्हानिरीक्षक हे हाजीर रावले पूण भौशीक बांदकाम खातें आनी येरादारी खात्याचे सचीव मात हाजीर रावंक नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
