भांगरभूंय | प्रतिनिधी
मंत्र्यां सयत देश- विदेशी पर्यटक जाले वांटेकार
भांगरभूंय । प्रतिनिधी
माशेलः माशेलांतल्या देवकीकृष्ण संस्थानाच्या वर्सुकी आषाढी एकादशीच्या सप्ता निमतान दर वर्सा जावपी चिखलकालो अंदूं राज्य उत्सव म्हूण मनयलो. ताका लागून भावीक, गोंयच्या वाठारांतल्या लोकां सयत कांय देशी- विदेशी पर्यटकांनीय वांटो घेतिल्लो. चिखलकाल्याच्या इतिहासांत वयलेच खेपे थळावे आमदार तशेंच कला आनी संस्कृती मंत्री तेचवरी पर्यटन मंत्री रोहन खंवटे अखेर मेरेन चिखलकाल्यांत वांटेकार जाले.
30 जूनाक चिखलकाल्या दिसा सकाळीं 11.30 वरांच्या सुमाराक माशेलांतल्या देऊळवाड्या वयले लोक देवकीकृष्ण देवळा कडेन जमले. आंगाक तेल काडचे खातीर सर्गेस्त लक्ष्मीकांत गोवेकार हांच्या दुकानांत गेले. थंय तांकां आंगाक तेल लावचे खातीर फुकट तेल दितात. तेल लायले उपरांत सगळे देवकीकृष्ण देवळा कडेन जमले, तेन्ना ह्या चिखलकाल्याच्या मुखेल्यांनी लोकगीत गावन ‘गोपाळ गडी या रे’ असो उलो मारलो. उपरांत हरिनामाचो गजर घालीत सगले जाण दाडशंकर देवळांत वचून देवाचें दर्शन घेतलें आनी दरेकाच्या कपलाक नाम लायलो. ते उपरांत खेळगडे जय विठ्ठल हरी विठ्ठलाच्या गजरांत देवकीकृष्ण देवळाक प्रदशिणा घालून देवळांत आयले. थंय दिवलेक गजरांत फेरे घातले. ह्या वेळार पुरयता कडल्यान सगळ्यांच्या आंगार तीर्थ शिंपडायलें. उपरांत दिवलेंतलें तेल सगळ्यांनी आंगाक लावन ते देवकीकृष्ण मैदानाचेर आयले. थंय आंगवण पावोवपा हाडिल्ले परंपरीक खाद्यपदार्थ प्रसाद म्हूण हाजीर आशिल्ल्यांक वांटलो. ते उपरांत परंपरीक चिखलकाल्याक सुरवात जाली. तातूंत विवीध खेळ खेळ्ळे उपरांत दोन गटां मदीं शक्तीप्रदर्शन, न्हवरो- व्हंकल केले उपरांत तांकां एकठांय हाडले. ते उपरांत धंयहांडी फोडली आनी सगळे न्हावपाक तळयेर गेले. देवकीकृष्ण देवळांत आरती, तीर्थप्रसाद आनी गाराणें घातले उपरांत चिखलकालो सोंपलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
