भांगरभूंय | प्रतिनिधी
मुख्यमंत्र्यांची पक्षाच्या केंद्रीय फुडाऱ्यां कडेन चर्चा; एका नव्या मंत्र्याचो जातलो आस्पाव
भांगरभूंय । प्रतिनिधी
पणजी : गोंयच्या मंत्रीमंडळांत रोखडोच फेरबदल जातना एका नव्या मंत्र्याचो मंत्रीमंडळात आसपाव जातलो. मुख्यमंत्री डॉ. प्रमोद सावंत हांणी केंद्रीय फुडाऱ्यां कडेन हे विशीं चर्चा केल्या, अशी म्हायती गोपांनी दिली. एका मंत्र्यांक ‘डिच्चू’ दिवपाचो म्हूर्त थारले उपरांत नव्या मंत्र्याचो सोपूत सुवाळो जातलो.
सप्तकभरात मुख्यमंत्री डॉ. प्रमोद सावंत हे दोन खेपे दिल्ली गेले. एके भेटी वेळार तांचे सयत प्रदेश भाजप अध्यक्ष सदानंद शेट तानावडे हाजीर आशिल्ले. केंद्रीय गृहमंत्री अमीत शाह, राष्ट्रीय अध्यक्ष जे. पी. नड्डा हांचे कडेन मुख्यमंत्र्यांनी चर्चा केल्या.
दिगंबर कामत आनी आलेक्स सिक्वेरा हांकां मंत्रिपद मेळपाचें लागीं लागीं निश्चीत जालां. एकाचो सोपूत सुवाळो पयलीं जातलो. एका मंत्र्याक काडले उपरांत नव्या मंत्र्याचो सोपूत सुवाळो जातलो. दोनूय नवे मंत्री दक्षीण गोंयांतले आसतले.
दिगंबर कामत आनी आलेक्स सिक्वेरा हे वजनदार फुडारी. मडगांवां भोवसंख्य हिंदू मतदार आसात. दिगंबर कामत हांच्या आदारान मडगांवां व्हड आघाडी मेळ्ळी, जाल्यार दक्षीण गोंयची सुवात जिखप शक्य आसा. दिगंबर कामत हे ज्येश्ठ फुडारी, तशेंच दक्षीण गोंयांत अल्पसंख्याकांचीं मतां लक्षणीय आसात. हाका लागून मंत्रीमंडळातल्या क्रिस्तांव मंत्र्यांचो आंकडो वाडटलो, तो उणो जावचो ना.
पयलीं एका मंत्र्याक मंत्रीमंडळांतल्यान भायर काडून उपरांत एका नव्या मंत्र्याक सोपूत दितले. कांय दिसा उपरांत दुसऱ्याचो सोपूत सुवाळो जातलो, अशी व्यूहरचना आसा.
पयलीं उत्तरेच्या एका आनी उपरांत दक्षीण गोंयांतल्या एका मंत्र्याक ‘डिच्चू’ मेळटलो. मंत्रीमंडळांतल्यान कोणाक काडचे, हाचेर आजून एकमत जावंक ना. हाका लागून मंत्रीमंडळ फेरबदलाक उशीर जाता. मंत्र्यांच्या खात्यां मदीं लेगीत बदल जातलो. नगरनियोजन, भौशीक बांधकाम हीं खातीं दुसऱ्या मंत्र्यां कडेन वचपाची चिन्नां आसात.
दिगंबर कामत, आलेक्स सिक्वेरा, मायकल लोबो, केदार नायक, डिलायला लोबो, राजेश फळदेसाय, संकल्प आमोणकार, रूडाल्फ फर्नांडीस ह्या आठ आमदारांनी वेगळो गट स्थापन करून भाजपात प्रवेश केल्लो. चवथी उपरांत फाटल्या सप्टेंबरांत तांचो हो प्रवेश जाल्लो. आठ आमदारां मदल्या एकाय आमदाराक मंत्रिपद मेळूंक ना. मंत्रीमंडळात बदल जातलो, अशें सुतोवाच मुख्यमंत्री डॉ. प्रमोद सावंत हांणी तीन म्हयन्यां आदीं केल्लें. कर्नाटक वेंचणुके उपरांत बदल जातलो, अशें तांणी सुचीत केल्लें. मंत्रीपदा विशी कांय आमदारां कडल्यान विचारणा सुरू आसा.
उत्तर गोंयांतल्यान श्रीपाद नायक
लोकसभा वेंचणुकेक आतां सुमार एक वर्स उरलां. भारतीय जनता पक्षान लोकसभा वेंचणुकेची तयारी सुरू केल्या. हे विशीं दिल्ली भेटींत लोकसभेच्या दोनूय सुवातां विशीं चर्चा जाली. उत्तर गोंयची उमेदवारी केंद्रीय मंत्री श्रीपाद नायक हांकांच मेळटली. दक्षीण गोंयच्या उमेदवाराची चाचपणी सुरू आसा. दक्षीण गोंयची सुवात जिखपा खातीर दक्षीण गोंयांतल्या सगळ्या आमदारांचो आदार गरजेचो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
