भांगरभूंय | प्रतिनिधी
भांगरभूंय । प्रतिनिधी
म्हापशेंः वेल्डिंग करना फेरीबोट कामगाराच्या भोकार खोट मारिल्ल्यान ताका लायटीचो शॉक बशिल्ल्यान गुन्यांवकाराक 25 हजार रुपयांची भरपाय दिवपाचो आदेश म्हापशेंच्या पयलो वर्ग न्यायालयान दिला. हें खोट प्रकरण 10 जुलय 2009 दिसा सांजेच्या 7.30च्या सुमाराक पोंबुर्फा फेरी धक्क्यार घडल्लें.
पोंबुर्फा फेरी धक्क्यार दोनापावला नावाचे फेरीबोटीचें वेल्डिंगाचें काम न्हंय येरादारी खात्याचे कर्मचारी तिळू कुंडयकार आनी ताचे वांगडी करताले. त्या वेळार शर्मेश मयेकार (माडेल- चोडण) हो आपले दुचाकीन थंय आयलो. काम बंद करून फेरीबोट सुरू करपाचो दम दिवंन उपरांत ताणे वेल्डिंग करपी तिळूच्या भोकाचेर खोट मारली. ताका लागून तो लायटीचे वायरीचेर पडून ताका शॉक आयलो.
खोट मारल्ल्याक कोणूय वळखनाशिल्ले. तिळू कुंडयकारान म्हापशें पुलिसांत हे विशीं कागाळ केली. मोटरसायकलीच्या नंबराच्या आदारान पुलिसांनी शर्मेश हाका सोदून काडून ताका अटक केली. तेन्नाचो पुलीस उपनिरीक्षक संदीप केसरकारान ताचे आड म्हापशें न्यायालायंत आरोपपत्र दाखल केल्लें. न्यायाधीश निलिमा काणकोणकार हिणे सरकारी कर्मचाऱ्याक मारपेट केल्ल्याच्या आरोपा खाला शर्मेशाक दोशी थारायलें आनी तिळू कुंडयकाराक 25 हजार रुपयांची भरपाय दिवपाक सांगला. शिवाय बरी वागणुकेची हमी म्हणून न्यायालयांत 50 हजार रुपये जमा करपाक सांगल्यात. एक वर्स भर प्रोबेशन अधिकाऱ्याचे नदरे खाला रावपाकूय ताका सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
