भांगरभूंय | प्रतिनिधी
अॅड. उदय भेंब्रेः विशाल खांडेपारकाराच्या चार पुस्तकांचें लोकार्पण
मडगांवः आयज पुस्तकांचो आंकडो सेगीत वाडत आसा. हे खातीर फुडारांत भारतीय साहित्यांत कोंकणी साहित्यांचो दर्जो कसो वाडचो हाचो विचार आमी करूंक जाय. पुस्तकांचो दर्जो वाडप सोंपे काम न्हय. तरीय हें काम करपा खातीर बरें वातारवण, बऱ्यो सुविधा, संस्थां आनी चिकाटी जाय आसता. तेन्नाच हीं कामां फळादीक जातलीं. तेच वांगडा पुस्तकां निर्माण करतना, बरे वाचक निर्माण करपाक जाय अशें स. चंद्रकांत केणीबाब सदांच म्हणटाले अशें अॅड. उदय भेंब्रे हांणी म्हणलें.
हिरक महोत्सवा निमतान वर्धा प्रकाशनान लेखक विशाल सिनाय खांडेपारकार हांच्या चार पुस्तकांचीं उजवाडावणी व्हड दबाज्यान जालीं. सुवाळ्याक मुखेल सोयरे म्हूण जेश्ठ साहित्यीक आनी संघटक अॅड. उदय भेंब्रे हांचे हस्तुकीं जड काशांव (कथांझेलो), पेद्रु ब्राज कुर्रैय आफोन्स, (रोमींत, चरित्र), सार (समिक्षा लेख), हांणी देश घडयलो (चरित्रां) ह्या पुस्तकांचीं उजवाडावणी जाली. हो सुवाळो कोंकणी भाशा मंडळांतल्या सभाघरांत घडोवन हाडलो.
मुखार उलयतना अॅड. भेंब्रे हांणी म्हणलें, पुस्तकां छापून हाडूंक जातात, पूण वाचक वर्ग खंयच्यान हाडटलो. हालींच वाचन प्रस्नांचेर आपणें भुरग्यांचेर प्रयोग लेगीत केल्लो. वाचन संस्कृती वाडपाक जाय अशें आपलें ठाम मत आसा अशें सांगून तांणी म्हणलें, कोंकणींत एकाच वांगडा खूबशीं पुस्तकां एका तेंपार उजवाडावपाची परंपरा आमचे कवी र. वि. पंडीत हांणी घाल्ली. आयज ही परंपरा चालू आसा आनी ती आमी जपल्या. कोंकणींत खूब पुस्तकां उजवाडाक येतात, ही आमकां अभिमानाची गजाल. अशें पयलीं घडनाशिल्लें. देखून विशाल खांडेपारकार आनी वर्धा प्रकाशनाक परबीं फावता. आमकां ल्हान लेखपाची गरज ना. व्हड राज्यांनी प्रमाण आसात अशें अॅड. भेंब्रे हांणी म्हणलें.
ह्या पुस्तकांचेर डॉ राजेंद्र हेगडे हांणी पेद्रुब्राज कुर्रैय आफोन्स ह्या पुस्तकाचेर आपलें उलोवप केलें. साहित्यीक प्रा. अनंत अग्नी हांणी सार (समिक्षा लेख) आनी हांणी देश घडयलो (चरित्रां) ह्या दोन पुस्तकांचेर उलोवप केलें. जाल्यार जड काशांव (कथांझेलो) पुस्तकाचेर साहित्यीक विन्सी क्वाद्रुस हांणी आपले विचार मांडले.
ह्या वेळार माचयेर वर्धा प्रकाशनाचे धनी वर्धा सिनाय खांडेपारकार, प्रा. अनंत अग्नी, लिप्यांतरकार एडवीन फर्नांडीस, लेखक विशाल सिनाय खांडेपारकार, कुवेट कोंकणी केद्राचें अध्यक्ष एल्वीनो रोड्रिगीस, मानाची सोयरी कोंकणी भाशा मंडळाची अध्यक्ष अन्वेषा सिंगबाळ, मानाचे सोयरे म्हूण निवृत्त सनदी अधिकारी अरविंद भाटीकार, खास आमंत्रीत पेद्रू कुर्रैय ब्राज आफोंस, साहित्यीक विन्सी क्वाद्रुस, डॉ. राजेंद्र हेगडे आनी खास सोयरे म्हूण नारायण मावजो हाजीर आसले.
प्रास्तावीक आनी येवकाराचें उलोवप लेखक विशाल सिनाय खांडेपारकार हांणी करतना म्हणलें- फाटल्या दोन वर्सांतल्या कोवीड म्हामारीच्या काळांत ह्या पुस्तकांचें बरोवप जालें. जड काश्यांव कथांझेलो बरयतना पाद्री आनी इश्ट परिवारान तेंको आनी सहकार्य दिलें. फुडारांत समिक्षा आनी कथां लेखनाचे प्रकार हाताळटलों अशें तांणी म्हणलें.
अध्यक्ष अन्वेषा सिंगबाळ आनी अरविंद भाटीकार हांणी आपले विचार उक्तायले.
वर्धा प्रकाशनाचे वतीन वेदा सिनाय खांडेपारकारान उपकार मानले. मानेस्तांक फुलां आनी यादस्तिकां वर्धा सिनाय खांडेपारकारान भेटयलीं.
पुराय सुवाळ्याचें सुत्रसंचालन प्रा. रघुवीर देसाय आनी निता नायक हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
