भांगरभूंय | प्रतिनिधी
दक्षीण आफ्रिकेचे भोंवडेर वचपा खातीर भारताचो क्रिकेट पंगड काल सकाळीं भायर सरलो. पंगडा वांगडा मुखेल प्रशिक्षक राहुल द्रविड, बॅटींग प्रशिक्षक विक्रम राठोड आनी तांचो सहाय्यक स्टाफ लेगीत गेला. दक्षीण आफ्रिकेचे भोंवडेर भारत पयलीं तीन टी-20 मॅची, उपरांत तीन वन डे मॅची आनी अखेरेक दोन टॅस्ट मॅची खेळटलो.
अणभवी बॅट्समन विराट कोहलीक हे भोंवडे खातीर टी-20 आनी वन डे माळे खातीर विसव दिला. ताणें स्वता जावन विसव दिवपाची मागणी केल्ली. रोहित शर्मान लेगीत टी-20 आनी वन डे मॅचींतल्यान विसव घेतला. दोगूय टॅस्ट माळे खातीर उपलब्ध आसतले.
तिनूय फॉर्मेटा खातीर वट्ट् 31 खेळगड्यांची निवड केल्या. फकत ऋतुराज गायकवाड, श्रेयस अय्यर आनी मुकेश कुमार हांची तिनूय फॉर्मेटा खातीर पंगडांनी निवड केल्या.
टी-20 माळे खातीर सुर्यकुमार यादव मुखेलपद सांबाळटलो, वन डे माळेंत लोकेश राहुल आनी टॅस्ट माळेंत रोहत शर्मा मुखेली आसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
