भांगरभूंय | प्रतिनिधी
भांगरभूंय । प्रतिनिधी
पणजी : लोकसभेच्यो दोनूय सुवातो जिखचे खातीर आतां सावन तयारी सुरू करात, व्यूहरचनेची आंखणी करात, असो सल्लो केंद्रीय गृहमंत्री अमीत शाह आनी हेर फुडाऱ्यांनी दिला. दिल्लीचे बसकेंत हाजेरी लायले उपरांत मुख्यमंत्री डॉ. प्रमोद सावंत बिरेस्तारा गोंयांत पावले. प्रदेश अध्यक्ष सदानंद तानावडे हे लेगीत मुख्यमंत्र्यां सयत दिल्लींत जाल्ले बसकेंत हाजीर आशिल्ले.
दिल्लींत लोकसभा वेंचणुकेचे तयारे संबंदान चर्चा जाली. भाजप शासीत राज्यांच्या मुख्यमंत्र्यांची राष्ट्रीय अध्यक्ष जे. पी. नड्डा हांणी बसका घेतली. सचीव बी. एल. संतोष, केंद्रीय गृहमंत्री अमीत शाह बसकेक हाजीर आशिल्ले. गोंयांतल्या दोनूय सुवातांचेर चर्चा जाली, अशें मुख्यमंत्री डॉ. प्रमोद सावंत हांणी सांगलें. मंत्रीमंडळ फेरबदलाचेर कितें चर्चा चर्चा, ह्या प्रस्नाचेर मात मुख्यमंत्र्यांनी कसलेंच भाश्य करूंक ना.
फुडल्या वर्सा म्हणल्यार 2024 त लोकसभा वेंचणूक जातली. फाटले वेंचणुकेंत भाजपान उत्तर गोंयची सुवात जिखली, पूण दक्षीण गोंयांत मात हार खवची पडली. फुडल्या वर्सा दोनूय सुवातो जिखपा खातीर आतां सावनूच तयारेक लागात, असो सल्लो बसकेंत दिलो. दोनूय सुवातां विशीं खोलायेन चर्चा जाली, अशी म्हायती प्रदेश अध्यक्ष सदानंद शेट तानावडे हांणी दिली. बुधवारा राती राष्ट्रीय अध्यक्ष जे. पी. नड्डा, सचीव बी. एल. संतोष हांचे कडेन बसका जाली. बिरेस्तारा सकाळीं केंद्रीय गृहमंत्री अमीत शाह आनी मुख्यमंत्री डॉ. प्रमोद सावंत हांचे मदीं चर्चा जाली, अशी म्हायती गोपांनी दिली.
मंत्रीमंडळ फेरबदला विशीं निर्णय ना
तरेकवार कार्यावळींक हाजेरी लायले उपरांत मंत्रीमंडळ बसका घेवन मुख्यमंत्री डॉ. प्रमोद सावंत गडबडीत बिरेस्तारा दिल्ली गेल्ले. मंत्रीमंडळ फेरबदला विशीं निर्णय जातलो, अशी चर्चा आशिल्ली. मंत्रीमंडळ फेरबदला विशीं केंद्रीय फुडाऱ्यां कडेन चर्चा जाली काय ना, हे विशी कोणूच कितें सांगपाक तयार ना. मंत्रीमंडळ फेरबदलाचेर चर्चा जाली काय ना, ह्या प्रस्नाचेर मुख्यमंत्री डॉ. प्रमोद सावंत हांणी कसलेंच भाश्य करूंक ना.
कोणाक काडचे तें थारना…?
दिगंबर कामत, आलेक्स सिक्वोरा, मायकल लोबो, केदार नायक, डिलायला लोबो, संकल्प आमोणकार, राजेश फळदेसाय, रुडाल्फ फर्नांडीस हांणी सप्टेंबर 2022 त वेगळो गट स्थापन करून भाजपांत प्रवेश केल्लो. तांच्या भाजपा प्रवेशाक 9 म्हयने जाले तरीय अजून एकल्याकूय मंत्रीपद मेळूंक ना. दिगंबर कामत आनी आलेक्स सिक्वेरा हांकां मंत्रीपद मेळपाची चर्चा आसा. मंत्रीमंडळांतल्यान खंयच्या मंत्र्यांक काडचे हाचेर निर्णय जायनाशिल्ल्यान मंत्रीमंडळ फेरबदलाक कळाव जाता, अशी चर्चा आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
